قازاقستان • 04 جەلتوقسان، 2020

الماتىنىڭ ەكولوگياسىن جاقسارتۋدىڭ جول كارتاسى تالقىلاندى

4 رەت كورسەتىلدى

الماتىدا قر ەكولوگيا، گەولوگيا جانە تابيعي رەسۋرستار مينيسترلىگى ەكولوگيالىق باقىلاۋ جانە رەتتەۋ كوميتەتىنىڭ توراعاسى زۇلفۇحار جولداسوۆ قالانىڭ ەكوبەلسەندىلەرىمەن جانە ۇيىمدار وكىلدەرىمەن كەزدەسۋ وتكىزدى. شارادا الماتىنىڭ ەكولوگيالىق پروبلەمالارىن كەشەندى تۇردە شەشۋگە باعىتتالعان جول كارتاسى تالقىلاندى.

«بۇگىنگى كەزدەسۋگە ەنەرگەتيكا، ۇلتتىق ەكونوميكا، يندۋستريا جانە ينفراقۇرىلىمدىق دامۋ، ىشكى ىستەر مينيسترلىكتەرى مەن اكىمدىك وكىلدەرى قاتىسىپ وتىر. سەبەبى ۇكىمەت دەڭگەيىندە قابىلدانعان جول كارتاسىن بىرلەسە جۇزەگە اسىرامىز. ونىڭ ورىندالۋى بويىنشا تۇراقتى تۇردە حالىققا بايانداپ وتىرۋ ماڭىزدى. وسى كەزدەسۋدىڭ ماقساتى دا سول»،- دەدى جيىن بارىسىندا زۇلفۇحار جولداسوۆ.

ايتا كەتەيىك، جۇرتشىلىقپەن، اكىمدىكتەرمەن جانە تابيعات پايدالانۋشىلارمەن بىرلەسكەن جۇمىس ناتيجەسىندە قابىلدانعان الماتىنىڭ ەكولوگياسىن جاقسارتۋ جول كارتاسىندا جيىرما ءىس-شارا قاراستىرىلعان. ولاردىڭ ىشىندە: جەو-2 جانە جەو-3 گازعا اۋىستىرۋ، قالاعا ىرگەلەس جاتقان جەكە سەكتور اۋداندارىن گازداندىرۋ، كوممۋنالدىق قىزمەتتەر مەن قوعامدىق كولىكتىڭ اۆتوكولىگىن سىعىلعان تابيعي گازعا اۋىستىرۋ، ديزەل وتىنىمەن قوعامدىق كولىككە كەزەڭ-كەزەڭىمەن تىيىم سالۋ، كوگالداندىرۋ جانە ت.ب. بار.

«الماتىنىڭ اينالاسىنداعى ءۇي-جايلاردىڭ 50%-ى كومىر جاعادى. سوندىقتان الماتى وبلىسى مەن قالا اكىمشىلىگى جانە ەنەرگەتيكا مينيسترلىگى وسى اۋماقتاردى گازداندىرۋمەن اينالىسادى. جەكە سەكتور مەن جەس اسەرىنەن 2019 جىلعى ەسەپ بويىنشا الماتى قالاسىنداعى اتموسفەراعا شىققان شىعارىندىلار 144 مىڭ توننانى قۇرادى. ءبىز وسى كورتەتكىشتى 4 جىل ىشىندە 79 مىڭ تونناعا ازايتۋدى جوسپارلاپ وتىرمىز. ياعني الماتى جوعارى لاستانۋ يندەكسىنەن ورتاشا دەڭگەيگە تۇسەدى»،- دەدى زۇلفۇحار جولداسوۆ.

قازىر ەنەرگەتيكا مينيسترلىگىمەن بىرگە «سامۇرىق-ەنەرگو» كومپانياسى 2-ءشى جىلۋ ەلەكتر ستانتسياسىن گازعا كوشىرۋ جوباسىن قۋات نارىعى ارقىلى ارقىلى قارجىلاندىرۋ ماسەلەسىن قاراستىرىپ جاتىر. جول كارتاسىنىڭ بۇل باعىتى بويىنشا «سامۇرىق-ەنەرگو»-نىڭ ءوندىرىس جانە اكتيۆتەردى باسقارۋ بويىنشا باسقارۋشى ديرەكتورى سەرىك تۇيتەباەۆ باياندادى.

«قۇرىلىس كەستەسى تىكەلەي قارجىلاندىرۋعا بايلانىستى. سونىمەن بىرگە سىرتقى گازداندىرۋ بويىنشا ءتاريفتىڭ حالىق ءۇشىن اسا جوعارى بولماۋى ماسەلەسى بار. ءبىز باعا قاتتى وسپەس ءۇشىن قارجىلاندىرۋ تۋرالى رەسپۋبليكالىق بيۋدجەتپەن قاتار قالالىق بيۋدجەتكە سۇرانىس جاسادىق. الماتىنىڭ 2-ءشى جەس-ءىن تابيعي گازعا كوشىرۋ ونىڭ شىعارىندىلارىن 83%-عا، ياعني 37 مىڭ توننادان 6 مىڭ تونناعا ازايتادى»،- دەدى ول.

سوڭعى جاڭالىقتار

دوللار ارزانداپ جاتىر

ەكونوميكا • بۇگىن، 11:37

قالادا قار بورايدى...

ايماقتار • بۇگىن، 10:47

ۇقساس جاڭالىقتار