شاھار باسشىسىنىڭ ايتۋىنشا, جاڭا سپورت كەشەنى مۇمكىندىگى شەكتەۋلى جاندارعا جاتتىعۋ جاساۋعا قولايلى جاعداي تۋعىزىپ, مەگاپوليستە سالاماتتى ءومىر سالتىن ورنىقتىرۋعا سەپتىگىن تيگىزەدى. بۇل – شىمكەنتتىڭ اتىن حالىقارالىق دودالاردا تانىتىپ جۇرگەن سپورتشىلاردىڭ شەبەرلىگىن شىڭداۋعا مول مۇمكىندىك. اكىم اتالعان جوبالار پرەزيدەنت قاسىم-جومارت توقاەۆتىڭ ينكليۋزيۆتى سپورتتى دامىتۋ جانە سپورتپەن شۇعىلدانۋعا جايلى ورتا قالىپتاستىرۋ جونىندەگى تاپسىرمالارىن ورىنداۋ اياسىندا جۇزەگە اسىرىلىپ جاتقانىن جەتكىزدى.
قالانىڭ جاڭا شاعىن اۋداندارىنىڭ بىرىندە بوي كوتەرەتىن نىساندا فۋتبول الاڭى, امبەباپ سپورت زالدارى, ءجۇزۋ باسسەينى, اۆتوتۇراق قاراستىرىلعان. مۇندا ازاماتتار جەكپە-جەك, بي, ۇستەل ويىندارى, ارمرەستلينگ, پاۋەرليفتينگ سياقتى سپورت تۇرلەرىمەن اينالىسا الادى. سونداي-اق كەشەن اۋماعى ۆوركاۋت ايماعىمەن, جۇگىرۋ, ۆەلوسيپەد جولاقتارىمەن قامتىلماقشى.
قالالىق دەنەشىنىقتىرۋ جانە سپورت باسقارماسى باسشىسىنىڭ ۋاقىتشا مىندەتىن اتقارۋشى قانات جولدىقاراەۆتىڭ مالىمدەۋىنشە, جاڭا كەشەندە اربامەن بيلەۋگە, ۇستەل تەننيسىن ويناۋعا تولىق جاعداي جاسالادى. نىسان حالىقارالىق ستاندارتتارعا ساي سالىناتىندىقتان, بولاشاقتا ەلىمىزدىڭ ءتۇرلى تۋرنيرلەرىن, ازيا چەمپيوناتتارىن وسىندا وتكىزۋ جوسپارلانىپ وتىر. بۇگىندە مۇمكىندىگى شەكتەۋلى جاندار قالاداعى بەيىمدەلگەن سپورت كەشەندەرىندە جاتتىعىپ جۇرگەنىمەن, ولارعا ارنايى مامانداندىرىلعان ورتالىق اۋاداي قاجەت ەدى.
جاڭا كەشەننىڭ سالىناتىنىنا اسىرەسە سپورتشىلار قۋانىشتى. سولاردىڭ ءبىرى – توكيودا وتكەن سۋردليمپيادا ويىندارىنىڭ ەركىن كۇرەستەن چەمپيونى پەرنەش شاديار. جاسوسپىرىمدەر مەن جاستار اراسىنداعى الەم بىرىنشىلىگىنىڭ كۇمىس جۇلدەگەرى سپورتپەن 2012 جىلدان بەرى اينالىسادى. العاشقى باپكەرى عالىمجان ومار ونى 6-سىنىپتان باستاپ جاتتىقتىرعان.
– قازىردە سپورت زالدارى قالانىڭ ءار بۇرىشىندا ورنالاسقان. ماسەلەن, كۇرەس زالى ءبىر جەردە بولسا, باسسەينگە بارۋ ءۇشىن قالانىڭ ەكىنشى شەتىنە قاتىناۋعا تۋرا كەلەدى. ال جاڭا عيمارات بارلىق جاتتىعۋ زالىن بىرىكتىرگەن بىرىڭعاي كەشەن بولعالى تۇر. نىساننىڭ تەزىرەك پايدالانۋعا بەرىلۋىن اسىعا كۇتەمىز, – دەيدى سپورتشى.
پەرنەش قازىر ەستۋ قابىلەتى ناشار بالالارعا ساباق بەرەدى. جاتتىقتىرۋشىلىق قىزمەتپەن قاتار, ەل كۋبوگى, ازيا, الەم چەمپيوناتتارىنا قىزۋ دايىندالىپ ءجۇر. باستى ماقساتى – 2029 جىلى گرەكيادا وتەتىن سۋردليمپيادا ويىندارىنىڭ جۇلدەگەرى اتانۋ.
ىرگەتاسى قالانعان ەكىنشى نىسان – پەريناتالدىق ورتالىق قۇرىلىسى دا مەملەكەت باسشىسىنىڭ تاپسىرماسىمەن قولعا الىنعان. پرەزيدەنت ۇكىمەتكە انا مەن بالانى قورعاۋ جۇيەسىن نىعايتۋدى مىندەتتەگەن بولاتىن. دەموگرافيالىق ءوسىمى جوعارى مەگاپوليستى زاماناۋي پەرزەنتحانامەن قامتاماسىز ەتۋ ماقساتىندا جوباعا مەملەكەت تاراپىنان ارنايى قارجى بولىنگەن.
قالالىق دەنساۋلىق ساقتاۋ باسقارماسى باسشىسىنىڭ ورىنباسارى مىندەتىن اتقارۋشى يننا گلازەبنايانىڭ ايتۋىنشا, 200 توسەك-ورىنعا شاقتالعان مەديتسينالىق ورتالىق وزىق ۇلگىدەگى قۇرىلعىلارمەن, زەرتحانامەن جابدىقتالادى. قۇرىلىس كەلەسى جىلدىڭ سوڭىندا اياقتالىپ, ەل يگىلىگىنە بەرىلەدى دەپ جوسپارلانىپ وتىر. سونداي-اق جاڭا جۇمىس ورىندارى اشىلادى. ماماننىڭ سوزىنە سۇيەنسەك, قازىر شاھاردا اۋماقتىق ءبولىنىس بويىنشا 4 پەرزەنتحانا قىزمەت كورسەتەدى. ونىڭ ىشىندە №1 پەريناتالدىق ورتالىق ءتۇرلى پاتولوگياسى بار جۇكتى ايەلدەردى قابىلدايدى. ال قۇرىلىسى باستالعان جاڭا نىسان «№2 قالالىق پەريناتالدىق ورتالىق» اتانىپ, نەگىزىنەن اۋىر پاتولوگيالىق جاعدايداعى انالار مەن سالماعى 500 گرامنان باستاپ شالا تۋعان سابيلەردى كۇتۋگە ماشىقتانادى. بۇل ءوز كەزەگىندە قالاداعى وزگە پەرزەنتحانالارعا تۇسەتىن جۇكتەمەنى ەداۋىر ازايتادى.
شىمكەنت
