فوتو: Pixabay.com
BBC مالىمەتىنشە, لاينەردە 90 جاستاعى جولاۋشى كوز جۇمعاننان كەيىن جاعداي ۋشىعا تۇسكەن. مارقۇمدا قۇسۋ مەن ءىش ءوتۋ بەلگىلەرى بايقالعان, بۇل نوروۆيرۋس ينفەكتسياسىنا ءتان سيمپتومدار رەتىندە سيپاتتالىپ وتىر.
فرانتسيا دەنساۋلىق ساقتاۋ ورگاندارى بۇل جاعدايدىڭ حانتاۆيرۋسپەن بايلانىسى جوق ەكەنىن رەسمي تۇردە جوققا شىعاردى. ماماندار اتاپ وتكەندەي, قازىرگى سيمپتومدار نوروۆيرۋسقا نەمەسە تاعامنان ۋلانۋعا ۇقساس بولۋى مۇمكىن.
كرۋيزدىك كومپانيا وكىلدەرى ءمايىتتىڭ ناقتى ءولىم سەبەبى ءالى انىقتالماعانىن مالىمدەدى. ال فرانتسيا دەنساۋلىق ساقتاۋ مينيسترلىگىنىڭ دەرەگىنشە, لاينەر بورتىندا تاعى شامامەن 50 ادامدا ءدال وسىنداي بەلگىلەر بايقالعان.
كەمىرگىشتەردەن كەلەتىن قاۋىپ: حانتاۆيرۋستىڭ العاشقى بەلگىلەرى قانداي؟
بوردو بيلىگى ءۇش جولاۋشىنىڭ كايۋتالارىندا وقشاۋلانعانىن, ال قالعان جولاۋشىلاردىڭ قۇرلىققا شىعۋىنا تىيىم سالىنعانىن حابارلادى. كەمەدە سانيتارلىق قاۋىپسىزدىكتى كۇشەيتۋ ماقساتىندا جاپپاي دەزينفەكتسيا جۇمىستارى جۇرگىزىلۋدە.
كرۋيز 6 مامىر كۇنى شەتلاند ارالدارىنان باستالىپ, بەلفاست پەن ليۆەرپۋل پورتتارىنا توقتاعان. مامانداردىڭ ايتۋىنشا, اۋرۋ بەلگىلەرى ليۆەرپۋلدەن كەيىن پايدا بولىپ, 11 مامىردا شارىقتاۋ شەگىنە جەتكەن.
دەنساۋلىق ساقتاۋ ورگاندارى سيمپتومداردىڭ تاعامنان ۋلانۋمەن بايلانىستى بولۋى مۇمكىن ەكەنىن دە جوققا شىعارماي وتىر. دەگەنمەن, بيلىك بۇعان دەيىن باسقا كرۋيزدىك لاينەردە تىركەلگەن حانتاۆيرۋس وشاقتارىمەن بۇل جاعدايدىڭ بايلانىسى جوق ەكەنىن ناقتىلادى.
