جۇمىس ساپارى ءبورلى اۋدانىنان باستالىپ, اگەنتتىك توراعاسى سەرۆيستىك اكىمدىككە تابان تىرەدى. اكىمدىككە جىل باسىنان بەرى 1200 الەۋمەتتىك قىزمەت العان مىڭعا جۋىق ازامات ءوتىنىش ءبىلدىردى, ونىڭ 800-ءى ونلاين تۇردە بەرىلدى.
كورشىلەس شىڭعىرلاۋ اۋدانىندا اگەنتتىكتىڭ جۇمىس توبى مەن كورنەكتى قوعام قايراتكەرلەرى جاڭا سەرۆيستىك اكىمدىك اشتى. وندا تۇرعىنداردىڭ جايلى جاعدايىن ارتتىرۋعا سەپتىگىن تيگىزەتىن 54 ءتۇرلى مەملەكەتتىك قىزمەت كورسەتىلەتىن بولادى. اۋدان مەكتەپتەرىنىڭ بىرىندە "ە-اسحانا" تسيفرلى جوباسىن جۇزەگە اسىرۋ تۋرالى باستاما كوتەرگەن "ادال ۇرپاق" كلۋبىنىڭ قىزمەتى تانىستىرىلدى.
سونىمەن قاتار ا.شپەكباەۆ ءبىر مەزگىلدە 300 ادامدى قابىلداي الاتىن جانە سپورتتىڭ 19 ءتۇرى بويىنشا جاتتىعاتىن قاراشىعاناق سپورت كەشەنىنە باردى. اگەنتتىك باسشىسىنىڭ ايتۋىنشا, سپورت كەشەنىندە وقۋشىلار ءۇشىن بارلىق جاعداي جاسالعان, سونىڭ ارقاسىندا سپورتشىلارعا جاقسى جاعداي ىزدەپ, باسقا قالالارعا كەتۋدىڭ قاجەتى جوق.
اگەنتتىك توراعاسى "قاراشىعاناق پەترولەۋم وپەرەيتينگ ب.ۆ." كومپانياسىن ارالاۋ بارىسىندا ءوندىرۋشى سالالارداعى جەمقورلىقتىڭ الدىن الۋدىڭ ستراتەگيالىق ماڭىزدىلىعىن اتاپ ءوتىپ, كورپوراتيۆتىك كومپلاەنس-قىزمەتى جۇمىسىنىڭ ناتيجەلەرىمەن تانىستى.
"مەملەكەت باسشىسىنىڭ ساياسي ەرىك-جىگەرىنىڭ ارقاسىندا ءبىز كۆازيمەملەكەتتىك سەكتوردا عانا ەمەس, جەكە كورپوراتيۆتىك سەكتوردا دا سىبايلاس جەمقورلىققا قارسى ءتيىمدى كومپلاەنستى ەنگىزۋ ءۇشىن سەنىمدى قۇقىقتىق نەگىز قالادىق. Integrity يدەولوگياسىن ناسيحاتتاۋ ءدال وسىنداي ءىرى سالالىق كومپانيالاردان باستالۋى ءتيىس. كاسىپكەرلەر تازالىق پەن پاراساتتىلىق ستاندارتتارىن ساقتاۋعا نەعۇرلىم كوپ كوڭىل بولسە, سوعۇرلىم تەزىرەك باسەكەگە قابىلەتتىلىككە قول جەتكىزەمىز", دەدى ا.شپەكباەۆ.
ەستەرىڭىزگە سالا كەتسەك, ا.ج. 17 قازانىنان باستاپ كۆازيمەملەكەتتىك سەكتور ۇيىمدارىندا پاراساتتىلىقتىڭ كورپوراتيۆتىك ستاندارتتارىن ساقتاۋعا جاۋاپتى جەمقورلىققا قارسى كومپلاەنس-قىزمەتتەر ينستيتۋتى زاڭنامالىق دەڭگەيدە ەنگىزىلدى.
سونداي-اق, سىبايلاس جەمقورلىققا قارسى قىزمەت باسشىسى باسشىلاردىڭ ءوز ۇجىمدارىندا جەمقورلىقتى جويۋ جانە ونىڭ الدىن الۋمەن اينالىسۋ مىندەتى قۇر سوزبەن ەمەس, ءىس جۇزىندە بولۋى كەرەكتىگىن باسا ايتتى.
وسىدان كەيىن اگەنتتىك توراعاسى مەملەكەتتىك كىرىستەر باسقارماسىنا بارىپ, شىڭعىرلاۋ اۋدانىنىڭ جۇرتشىلىعىمەن, بيزنەس-قوعامداستىعىمەن جانە اكتيۆىمەن كەزدەستى.
ول جەرگىلىكتى بيۋدجەتتەردىڭ وڭتايلى جۇمسالۋىنا باقىلاۋدى كۇشەيتۋ قاجەتتىگىن اتاي وتىرىپ: "اگەنتتىك "اشىق بيۋدجەتتەردىڭ ينتەراكتيۆتى كارتاسى" نەگىزىندە "اشىق بيۋدجەت" بىرەگەي جوباسىن ىسكە اسىرۋدا. ول قوعامدىق باقىلاۋعا جانە ازاماتتاردىڭ قارجىلىق ساۋاتتىلىعىن ارتتىرۋعا جاڭا سەرپىن بەرەدى. ونى ىسكە اسىرۋمەن اگەنتتىكتىڭ اۋماقتىق دەپارتامەنتتەرىنىڭ قىزمەتكەرلەرىنەن, "ادالدىق الاڭى" جوبالىق كەڭسەلەرىنىڭ مۇشەلەرىنەن جانە ازاماتتىق قوعام ينستيتۋتتارىنىڭ وكىلدەرىنەن تۇراتىن ارنايى جۇمىس توبى اينالىسادى. سوندىقتان جۇرتشىلىقتى جەمقورلىققا قارسى تەحنولوگيالاردىڭ زاماناۋي قۇرالدارىن بەلسەندى قولدانۋعا شاقىرامىن", دەدى اگەنتتىك باسشىسى.
كۇن سوڭىندا ا. شپەكباەۆ "ادالدىق الاڭى" رەسپۋبليكالىق جوبالىق كەڭسەسىنىڭ باسشىسى ت.بايعۇلوۆپەن جانە "ادال كومەك" جوباسىنىڭ جەتەكشىسى ا.وماروۆامەن "حالىق ءۇنى" جوباسى اياسىندا ازاماتتاردى قابىلدادى.
