پارلامەنت • 03 جەلتوقسان، 2020

پارلامەنت ەڭبەك زاڭناماسىنا تۇزەتۋلەر ەنگىزدى

14 رەت كورسەتىلدى

قازاقستان پارلامەنتى پەرسونال ۇسىنۋعا قاتىستى قىزمەت كورسەتۋ بويىنشا كەيبىر زاڭناما اكتىلەرىن ەكىنشى وقىلىمدا ماقۇلدادى، دەپ حابارلايدى Egemen.kz

بايانداما وقىعان سەناتور سەرگەي ەرشوۆ قۇقىقتىق رەتتەۋدىڭ جوعىنان جالدانىپ جاسايتىن جۇمىسشىلاردىڭ قۇقىعى ورەسكەل بۇزىلعان جاعدايلار تۋرالى ايتتى. 

ونىڭ مالىمەتىنشە، شتاتتاعى قىزمەتكەرلەرمەن بىردەي قىزمەت اتقاراتىن جۇمىسشىلار جۇمىستىڭ كۇردەلىگى، مولشەرى مەن ساپاسى، سونىمەن قاتار بىلىك دەڭگەيى بىردەي بولسا دا از جالاقى الادى.
 
"ولار سالالىق كەلىسىمدەر شارتتارىمەن قورعالماعان، ەڭبەك جاعدايىنداعى زالال ءۇشىن ۇستەمەاقى المايدى، ۇجىمدىق كەلىسىمشارت قاتىسۋشىسى ەمەس، سايكەسىنشە، ەشقانداي دا الەۋمەتتىك پاكەتى جوق. جاراقات العان جاعدايدا، ءتىپتى قازا بولعاندا قاجەتتى تۇردە قورعالمايدى، سەبەبى قىزمەت سالاسىنداعى الەۋمەتتىك ساقتاندىرۋ جۇيەسىندە ساقتانبايدى"، دەيدى سەناتور.

ونىڭ ايتۋىنشا، دەپۋتاتتار اركىمنىڭ دە قاۋىپسىزدىك پەن گيگيەنا تالاپتارى ساقتالاتىن ەڭبەك شارتتارىن الۋعا قۇقىعى بار بولعاندىقتان جانە قانداي دا ءبىر ديسكريميناتسياسىز سىياقى الۋعا قۇقىعى بار بولعاندىقتان، وسىنداي زاڭ جوباسىن كوتەرىپ وتىر.

"وسى جوبا اياسىنداعى زاڭنامالىق باستامالار جۇمىسپەن قامتۋدىڭ يكەمدى نىساندارىن ەنگىزۋ، ولاردى نورماتيۆتىك رەتتەۋ، ەڭبەك موبيلدىگىن ارتتىرۋ ءۇشىن قوسىمشا پارمەندى تەتىكتەردى ازىرلەۋ تۋرالى كوپتەگەن ماسەلەنى شەشەدى. زاڭ جوباسىندا ازاماتتىق، ەڭبەك جانە كاسىپكەرلىك كودەكستەرگە جانە "حالىقتى جۇمىسپەن قامتۋ تۋرالى"، "قىزمەتكەر ەڭبەك (قىزمەتتىك) مىندەتتەرىن اتقارعان كەزدە ونى جازاتايىم وقيعالاردان مىندەتتى ساقتاندىرۋ تۋرالى" ەكى زاڭعا وزگەرىستەر مەن تولىقتىرۋلار ەنگىزۋ كوزدەلگەن"، دەپ حابارلادى سەناتور.

ازاماتتىق كودەكسكە وتەلمەلى قىزمەت كورسەتۋ شارتىنىڭ جاڭا ءتۇرى - پەرسونالدى ۇسىنۋ بويىنشا قىزمەت كورسەتۋگە ارنالعان شارت ەنگىزىلەدى، وعان سايكەس ءبىر تاراپ (جىبەرۋشى) ءوز قىزمەتكەرىن ەكىنشى تاراپتىڭ (قابىلداۋشى) مۇددەسىندە، باسقارۋىمەن جانە باقىلاۋىمەن جۇمىستى ورىنداۋ ءۇشىن جىبەرەدى.

ەڭبەك كودەكسىنە مىنا تۇزەتۋلەر ەنگىزىلىپ وتىر:

  • جىبەرۋشى تاراپتىڭ قىزمەتكەرلەرىنە قاتىستى ەڭبەكاقى تولەۋ سالاسىندا كەمسىتۋگە تىيىم سالىنادى;
  • قولدانىستاعى زاڭناماعا سايكەس اۋىر جۇمىستاردا، ەڭبەك جاعدايلارى زيان جانە (نەمەسە) قاۋىپتى جۇمىستاردا ىستەيتىن جىبەرۋشى تاراپتىڭ قىزمەتكەرلەرى ءۇشىن جىل سايىنعى اقى تولەنەتىن قوسىمشا ەڭبەك دەمالىستارى كوزدەلەدى;
  • ەڭبەگى اۋىر جۇمىستاردا، ەڭبەك جاعدايلارى زيان جانە (نەمەسە) قاۋىپتى جۇمىستاردا جۇزەگە اسىرىلاتىن جىبەرۋشى تاراپتىڭ قىزمەتكەرلەرىنە جوعارى لاۋازىمدىق ايلىقاقىلار نەمەسە قوسىمشا اقىلار بەلگىلەنەدى;
  • ەڭبەگى اۋىر جۇمىستاردا، ەڭبەك جاعدايلارى زيان جانە (نەمەسە) قاۋىپتى جۇمىستاردا جۇزەگە اسىرىلاتىن جىبەرۋشى تاراپتىڭ قىزمەتكەرلەرىنە جۇمىس ۋاقىتىنىڭ قىسقارتىلعان ۇزاقتىعى كوزدەلەدى.

سونىمەن قاتار، دەپۋتاتتار وندىرىستىك نىسانداردى ەڭبەك جاعدايلارى بويىنشا اتتەستاتتاۋ ناتيجەلەرى بەرىلمەگەن جاعدايدا جىبەرۋشى تاراپقا قابىلداۋشى تاراپپەن پەرسونالدى ۇسىنۋ بويىنشا قىزمەتتەر كورسەتۋگە شارتتار جاساسۋعا تىيىم سالۋدى ۇسىندى.

زاڭدا جۇمىس بەرۋشىنىڭ جىبەرۋشى تاراپتىڭ قىزمەتكەرلەرى الكوگولدىك، ەسىرتكىلىك، ۋىتقۇمارلىق ماساڭ كۇيدە بولعان جاعدايدا ولاردى جۇمىستان شەتتەتۋ مىندەتى بەكىتىلگەن. سونىمەن قاتار، جىبەرۋشى تاراپ قىزمەتكەرىنىڭ قابىلداۋشى تاراپتىڭ اكتىلەرىنە سايكەس پروفيلاكتيكالىق مەديتسينالىق تەكسەرۋدەن ءوتۋ مىندەتى دە بەكىتىلگەن.

ەڭبەك كودەكسى "جىبەرۋشى تاراپ"، "جىبەرۋشى تاراپ قىزمەتكەرلەرى"، "قابىلداۋشى تاراپ"، "قابىلداۋشى تاراپ اكتىلەرى" جانە "پەرسونالدى بەرۋ" سياقتى جاڭا انىقتامالارمەن تولىقتىرىلادى.

كاسىپكەرلىك كودەكسكە جىبەرۋشى تاراپ جۇمىسكەرلەرىنىڭ ەڭبەگىن پايدالاناتىن كاسىپكەرلىك سۋبەكتىلەرى جۇمىسكەرلەرىنىڭ جىلدىق ورتاشا سانى جىبەرۋشى تاراپتىڭ جۇمىسكەرلەرى ەسكەرىلە وتىرىپ ايقىندالاتىن نورما ەنگىزىلەدى.

سونداي-اق، جۇمىس بەرۋشى رۇقساتتار بويىنشا تارتاتىن شەتەلدىك جۇمىس كۇشىنىڭ سانى پەرسونالدى بەرۋ جونىندەگى شارت اياسىندا ەڭبەك قىزمەتىن جۇزەگە اسىراتىن قىزمەتكەرلەردى ەسكەرە وتىرىپ، قازاقستاندىق كادرلاردىڭ سانىمەن پايىزدىق اراقاتىناسقا سايكەس كەلۋى ءتيىس بولۋىن كوزدەلەدى.

اۋتستاففينگ – بۇل قىزمەتكەرلەردى كومپانيا شتاتىنا شىعارۋ. اۋتستاففينگ كەزىندە پەرسونال ناقتى جۇمىس بەرۋشى بولىپ وتىرعان فيرمامەن ەمەس، دەلدال ۇيىممەن نەمەسە اۋتستاففەرمەن ەڭبەك شارتتارىن جاساسادى.

زاڭ ەل پرەزيدەنتىنە قول قويۋعا جىبەرىلەدى.

سوڭعى جاڭالىقتار

جىلجىمالى زەرتحانالار جولعا شىقتى

مەديتسينا • بۇگىن، 21:25

بيىل 200 جاڭا مەكتەپ سالىنادى

ءبىلىم • بۇگىن، 14:47

ۇقساس جاڭالىقتار