كينو تۋىندىنىڭ كوزدەگەن ماقساتى – 2018 جىل قازاقستانداعى وزبەكستان جىلى, ال 2019 جىل وزبەكستانداعى قازاقستان جىلى اياسىندا ەلارالىق دوستىق پەن ىنتىماقتاستىقتى, تۇركى حالىقتارى اراسىنداعى باۋىرلاستىقتى ناسيحاتتاۋ ەكەن.
فيلمگە وزەك بولعان وقيعا – وزبەكستاندىق باحشيللو اتتى اقساقال نەمەرەسىمەن بىرگە قوجا احمەت ياساۋي كەسەنەسىنە زيارات ەتۋگە جولعا شىعىپ, جول-جونەكەي قازاقتىڭ قوناقجايلىعى مەن باۋىرمالدىعى, ەكى حالىقتىڭ ءبىر-بىرىنە دەگەن مەيىرىمى جايلى اڭگىمەلەپ, اكەسى ابدۋللانىڭ سارسەن اتتى قازاقپەن دوستىعى, ول اڭ اۋلاۋ كەزىندە اكەسىن ولىمنەن قۇتقارعانى, ابدۋللا مەن سارسەن ءبىر-بىرىمەن اينىماس دوس بولۋعا سەرتتەسكەنى جايلى ەستەلىكتەر نەگىزىندە تۇزىلگەن.
باحشيللو اقساقال قازاقستان شەكاراسىنا كىرگەننەن كەيىن بايىرعى دوسى ورالبايدىڭ شاڭىراعىنا قوناق بولادى. دومبىرامەن ءان ايتىپ, سىر شەرتىسكەن سوڭ ورالباي دوسى مەن نەمەرەسىنە ات-تۇيە مىنگىزىپ, تۇركىستانعا شىعارىپ سالادى. ءسويتىپ جولعا شىققان وزبەك اقساقالى جول بويى نەمەرەسى انۆارعا قوجا احمەت ءياساۋيدىڭ تاريحى ءھام تۇركىستان جايلى قىزىقتى اڭگىمەلەر ايتادى. بۇنىڭ ءبارى كوركەم سيۋجەت پەن تۋىندىعا وزەك بولادى.
فيلم سوڭىندا, جولاۋشىلار تۇركىستانعا كەلىپ, ياساۋيگە قۇران باعىشتاپ, زيارات جاسايدى. مامانداردىڭ ايتۋىنشا, فيلم قىزىقتى وقيعالارمەن ساباقتاستىرىلعان, مازمۇنى دا تەرەڭ. تۋىندى رەجيسسەرى حيلول ناسيموۆتىڭ ايتۋىنشا, كينو 2021 جىلى جارىققا شىعادى.
