قۇرامىنا سالالىق جانە جەرگىلىكتى كاسىپوداقتار فيليالدارى توراعالارىنىڭ, كاسىپوداق بەلسەندىلەرىنىڭ قاتارىنان 16 مۇشە كىرەتىن شتابتى «ۇستاز» قالالىق جەرگىلىكتى كاسىپوداعىنىڭ توراعاسى سەرىكجان بايعۇتدينوۆ باسقارادى.
– الداعى جىلى 10 قاڭتاردا وتەتىن پارلامەنت ءماجىلىسى مەن ءماسليحاتتار دەپۋتاتتارىنىڭ سايلاۋىنا بايلانىستى كاسىپوداقتار فەدەراتسياسى سايلاۋعا بايقاۋشى رەتىندە قاتىسۋ تۋرالى ءوتىنىش جاسادى. الدىمىزدا ەكى مىندەت تۇر. بىرىنشىدەن, جۇمىس بەرۋشىلەردىڭ ءوز قىزمەتكەرلەرىنە قىسىم جاساماۋى ماڭىزدى. ەكىنشىدەن, ءبىز سايلاۋ پروتسەسىنىڭ ەل زاڭناماسىنا سايكەس ءوتۋىن قاداعالاۋىمىز كەرەك. ءبىزدىڭ نەگىزگى مىندەتىمىز – وسىنداي ماڭىزدى پروتسەستە دەموكراتيا قۇندىلىقتارىنىڭ دامۋىن جانە ادامنىڭ تاڭداۋ ەركىندىگىن زاڭ شەڭبەرىندە قامتاماسىز ەتۋ. سول سەبەپتى بايقاۋشىلاردىڭ اشىق ءارى ادال جۇمىسىن ۇيىمداستىرۋ قاجەت.
كاسىپوداقتار فەدەراتسياسى سايلاۋ پروتسەستەرىنىڭ اشىقتىعىن جانە تىكەلەي داۋىس بەرۋ كۇنىندە باقىلاۋدى تولىق قامتاماسىز ەتەتىنىنە سەنىمدى. الماتى قالاسى بويىنشا اۋماقتىق كاسىپوداقتار بىرلەستىگى بۇل جۇمىسقا بەلسەنە قاتىسادى. بۇگىن قالادا 507 سايلاۋ ۋچاسكەسىندە داۋىس بەرۋ بارىسىن قاداعالايتىن 715 مۇشە ۇيىمنان 1014 تاۋەلسىز بايقاۋشى تىركەلدى. كوروناۆيرۋس جاعدايىن ەسكەرە وتىرىپ, ءار سايلاۋ ۋچاسكەسىندە ەكى كاسىپوداق وكىلىنەن بولادى.
– الماتىداعى سالالىق جانە جەرگىلىكتى كاسىپوداقتاردىڭ بارلىق فيليالدارى كاسىپوداقتار فەدەراتسياسىنىڭ الداعى سايلاۋعا بايقاۋشى رەتىندە قاتىسۋ تۋرالى ۇندەۋىن قولداعانى ماڭىزدى. ءبىزدىڭ سايلاۋ كەزىندە بايقاۋشى رەتىندە تاجىريبەمىز جەتكىلىكتى. سونداي-اق سايلاۋدىڭ قيىن پاندەميا جاعدايىندا وتەتىنىن ەسكەرگەنىمىز ءجون. سول سەبەپتى پروتسەستىڭ قاۋىپسىز, بارلىق سانيتارلىق تالاپتارعا ساي وتۋىنە ىقپال ەتۋىمىز كەرەك, – دەپ اتاپ ءوتتى س.بايعۇتدينوۆ.
شتاب كاسىپوداق بايقاۋشىلارىنىڭ جۇمىسىن ءۇش باعىت بويىنشا ۇيىمداستىرادى. بۇل – وقىتۋ, ۇيىمداستىرۋ جۇمىسى جانە باق-پەن ءوزارا ءىس-قيمىل. مۇندا حالىقارالىق بايقاۋشىلارمەن جانە شەتەلدىك جۋرناليستەرمەن كەزدەسۋلەر وتەدى. جوسپارلانعان شارالاردىڭ ءبىرى – اۋماقتىق كاسىپوداقتار بىرلەستىگى مۇشەلەرىنىڭ قالالىق ۇيىمداردىڭ ۇجىمدارىمەن جانە جۇمىس بەرۋشىلەرىمەن كەزدەسۋلەرى.
سايلاۋدىڭ اشىقتىعىن قامتاماسىز ەتۋ ءۇشىن كاسىپوداق بايقاۋشىلارى ارنايى دايىندىقتان وتەدى. شتاب جانىندا بايقاۋشىلار مەكتەبى جۇمىس ىستەيتىن بولادى. مۇندا وقىتۋ مەن ترەنينگتەر ونلاين فورماتتا نەمەسە بارلىق قاۋىپسىزدىك شارالارىن ساقتاي وتىرىپ 50 ادامعا وتەدى. تاجىريبەلى دارىسكەرلەر بايقاۋشىلاردى «سايلاۋ تۋرالى» زاڭمەن تانىستىرىپ, قۇقىقتارى مەن مىندەتتەرىن تۇسىندىرەدى. سونداي-اق ولارمەن پاندەميا كەزىندەگى ساقتىق شارالارى بويىنشا ءتۇسىندىرۋ جۇمىستارى جۇرگىزىلەدى.
