– قازىرگى زامانعا ساي مىقتى مەملەكەتتىك اپپارات قۇرۋ ءىسى تۇڭعىش پرەزيدەنت – ەلباسى نۇرسۇلتان نازارباەۆتىڭ ەسىمىمەن تىعىز بايلانىستى ەكەنى داۋسىز. تاۋەلسىزدىكتىڭ ەلەڭ-الاڭ شاعىندا الدىمىزدا سىن-قاتەرلەر تۇردى. وسىعان وراي ەلباسى جاڭا جاعدايلارعا توتەپ بەرەتىن مەملەكەتتىك باسقارۋ جۇيەسىن قالىپتاستىرۋدى كوزدەدى. ويتكەنى تاۋەلسىز قازاقستاننىڭ باسەكەگە قابىلەتتىلىگىن ارتتىرۋدا مەملەكەتتىك اپپاراتتىڭ كادرلىق الەۋەتى ماڭىزدى ءرول اتقاراتىنىن جاقسى ءتۇسىندى. مەملەكەتتىك اپپاراتتىڭ ساپاسى كەز كەلگەن ەلدىڭ دامۋ پروتسەسىندە شەشۋشى فاكتورعا يە. سوندىقتان بۇل ەلدىڭ ستراتەگيالىق باسىمدىقتارىنىڭ ءتيىمدى ورىندالۋىن قامتاماسىز ەتۋى تۇرعىسىنان ەرەكشە ماڭىزدى بولدى. ەلباسىنىڭ ساياسي ەرىك-جىگەرىنىڭ ناتيجەسىندە قازاقستان پوستكەڭەستىك ەلدەر اراسىندا وسى باعىتتا العاش بولىپ جۇيەلى قادامدار جاسادى, – دەدى وبلىس اكىمى ماحامبەت دوسمۇحامبەتوۆ.
اكىمنىڭ اتاپ وتۋىنشە, وڭىردە مەملەكەتتىك قىزمەتشىلەرگە الەۋمەتتىك-ەكونوميكالىق تۇرعىدان قولداۋ جاسالىپ وتىر. جىل باسىندا جەرگىلىكتى اتقارۋشى ورگاندار فاكتورلى-بالدىق شكالاعا نەگىزدەلگەن ەڭبەكاقى تولەۋدىڭ جاڭا جۇيەسىنە كوشتى. قاناتقاقتى مودەلدىڭ ەنگىزىلۋى جەرگىلىكتى كادرلار اراسىنداعى جۇمىس اۋىستىرۋدىڭ ازايۋىنا سەپتىگىن تيگىزدى. ماسەلەن, مەملەكەتتىك قىزمەتشىلەردىڭ اۋىسۋى بىلتىرعىدان 2,6%-عا دەيىن ازايدى. بۇل مەملەكەتتىك اپپاراتتاعى تۇراقتىلىقتى قامتاماسىز ەتۋگە مۇمكىندىك بەردى. سونىمەن قاتار جالاقى مولشەرىنىڭ ءوسۋى مەملەكەتتىك قىزمەتكە دەگەن قىزىعۋشىلىقتى ارتتىردى.
– بوس لاۋازىمدارعا جاريالانعان كونكۋرستاردا ءبىر ورىنعا قاتىسۋشىلاردىڭ سانى 50%-عا ءوستى. سونىڭ ناتيجەسىندە مەملەكەتتىك اپپارات بىلىكتى كادرلارمەن تولىعىپ وتىر. قازىر وبلىس اكىمدىگىندەگى مەملەكەتتىك قىزمەتكەرلەردىڭ ساپالىق قۇرامى دا ارتتى. مەملەكەتتىك قىزمەتكەرلەر قاتارى 1 عىلىم دوكتورى, 2 عىلىم كانديداتى, 3 PhD دوكتورى جانە «بولاشاق» باعدارلاماسىنىڭ 3 تۇلەگىمەن تولىقتى. ال بوس لاۋازىمداردىڭ سانى وتكەن جىلعىدان 4,1%-عا دەيىن ازايىپ وتىر, – دەيدى وبلىس اكىمى.
تۇڭعىش پرەزيدەنت كۇنىنە ورايلاستىرىلعان كونفەرەنتسيادا ءتورت وزەكتى ماسەلە تالقىعا ءتۇستى. قاتىسۋشىلار مەملەكەتتىك اپپاراتتىڭ ىلگەرى دامۋى, اۋىلدىق وكرۋگ اكىمدەرىنىڭ مارتەبەسى سىندى ماسەلەلەر اياسىندا وي ءبولىسىپ, پىكىر الماستى.
ەكىنشى شارا – مەملەكەتتىك قىزمەتشىلەر اللەياسى. بۇرىن اتىراۋدا مۇنداي ورىن بولعان ەمەس. مەملەكەتتىك قىزمەت ىستەرى اگەنتتىگى اتىراۋ وبلىسى بويىنشا دەپارتامەنتىنىڭ باسشىسى سالاۋات مۇكسىموۆتىڭ ايتۋىنشا, اللەيادا اينەكتەن جاسالعان 11 ستەندتە ەلىمىز تاۋەلسىزدىك العان كەزدەن بەرى مەملەكەتتىك قىزمەتتى دامىتۋدىڭ ماڭىزدى ءۇش كەزەڭى قامتىلىپ وتىر. سونداي-اق مەملەكەتتىك قىزمەتتىڭ اشىقتىعى مەن ترانسپارەنتتىلىگىنىڭ كورىنىسى سيپاتتالىپتى.
– بۇل اللەيا «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋعا ۇلەس قوسىپ جۇرگەن مەملەكەتتىك قىزمەتشىلەردىڭ ەڭبەگىن ۇلىقتاۋ ءۇشىن اشىلدى. مۇندا اينەكتەن جاساقتالعان ستەندتەر مەن مەملەكەتتىك قىزمەتكە جاڭادان كەلگەن قىزمەتشىلەردىڭ اشىق اسپان استىندا انت قابىلداۋىنا ارنالعان الاڭ بار, – دەيدى س.مۇكسىموۆ.
اتىراۋ وبلىسى
