جوبانىڭ ماقساتى – قازاق مەملەكەتتىلىگىن قالىپتاستىرۋدا ەلەۋلى جەتىستىكتەرىمەن تانىلعان قازاق حالقىنىڭ تاريحىنداعى ۇلى تۇلعالاردىڭ, سونىڭ ىشىندە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ءرولى مەن قىزمەتىن ناسيحاتتاۋ.
اتالعان جوبا اياسىندا ەڭ الدىمەن بەلگىلى مەملەكەت, قوعام جانە مادەنيەت قايراتكەرلەرىنىڭ قاتىسۋىمەن «بىرىندە – ءبىرىنشى تۇلعا جونىندە» اتتى دوڭگەلەك ۇستەل ۇيىمداستىرىلدى.
سالتاناتتى باسقوسۋدا ءسوز العان ۇلتتىق مۋزەيدىڭ ديرەكتورى ارىستانبەك مۇحامەدي ۇلى: «ەلباسىمىز – تاۋەلسىز قازاقستاننىڭ عاجاپ ارحيتەكتورى. سەبەبى نۇرسۇلتان نازارباەۆتىڭ جۇيەلى جۇرگىزگەن سارابدال ساياساتىنىڭ ارقاسىندا تامىرلى تاريحىمىز جاڭاشا جاڭعىردى. 30 جىلدىڭ ىشىندە ەل ءومىرىنىڭ بارلىق سالالارى تۇرلەندى», دەدى.
ءوز كەزەگىندە بەلگىلى مەملەكەت جانە قوعام قايراتكەرى, فيلولوگيا عىلىمدارىنىڭ دوكتورى, پروفەسسور مىرزاتاي جولداسبەكوۆ: «ەلباسى ن.نازارباەۆ تاۋەلسىز قازاقستاندى وسى دەڭگەيگە جەتكىزۋدە ەرەن ەڭبەك ءسىڭىردى. ويتكەنى كەز كەلگەن ەلدى الەمگە تانىتۋدان گورى, ونى مويىنداتۋ قيىنعا سوعادى. ءبىر سوزبەن ايتقاندا, ەلباسى – تەڭدەسى جوق ەرلىكپەن, دانالىقپەن جارقىن بولاشاقتىڭ ىرگەتاسىن قالاعان دارا تۇلعا», دەپ اتاپ ءوتتى.
دوڭگەلەك ۇستەل بارىسىندا قوعام قايراتكەرى, تاريح عىلىمدارىنىڭ دوكتورى, پروفەسسور ومىرزاق وزعانباەۆ, قوعام قايراتكەرى ورازكۇل اسانعازى, ساتيريك-جازۋشى كوپەن امىربەك, قازاقستاننىڭ ەڭبەك سىڭىرگەن ءارتىسى مايرا ءىلياسوۆا, ۇلتتىق اكادەميالىق كىتاپحانا ديرەكتورى ءۇمىتحان مۇڭالباەۆا ءسوز سويلەپ, ەلباسى ن.نازارباەۆتىڭ باسشىلىعىمەن جۇرگىزىلگەن ساياسي, الەۋمەتتىك, ەكونوميكالىق رەفورمالارعا توقتالىپ, ولاردىڭ قوعام ءۇشىن ماڭىزىن اشىپ كورسەتتى.
دوڭگەلەك ۇستەل اياقتالعان سوڭ ۇلتتىق مۋزەيدىڭ قورىنان جاساقتالعان « ۇلى دالانىڭ ۇلى تۇلعالارى» كورمەسى جانە تانىمال قازاقستاندىق فوتوگراف تۇرار قازانعاپوۆتىڭ «بىرىندە – ءبىرىنشى تۇلعا جونىندە» جەكە فوتوكورمەسى اشىلدى.
تۇساۋكەسەر راسىمىندە تالانتتى فوتوگراف تۇرار قازانعاپوۆ, «وردا FM» راديوسىنىڭ باس ديرەكتورى ەرجان ءجۇنىسوۆ ءسوز سويلەپ, ەلباسىمىزدىڭ قوعامدى دەموكراتيالاندىرۋ ينستيتۋتىن نىعايتۋداعى, حالىقتى بىرىكتىرۋ پروتسەسىندەگى, بەيبىتشىلىك پەن كەلىسىمدى ناسيحاتتاۋداعى ءرولىن اتاپ ءوتتى.
« ۇلى دالانىڭ ۇلى تۇلعالارى» اتتى كورمەدە الەمدىك مادەنيەت پەن وركەنيەتتىڭ دامۋىندا ەلەۋلى ءىز قالدىرعان ءابۋ ناسىر ءال-فارابي, قۇرمانعازى ساعىرباي ۇلى, اباي قۇنانباەۆ, جامبىل جاباەۆ, نۇرسۇلتان نازارباەۆ جانە باسقا دا كوپتەگەن تاريحي تۇلعاعا ارنالعان كوركەم شىعارمالار ۇسىنىلدى.
ال تۇرار قازانعاپوۆتىڭ «بىرىندە – ءبىرىنشى تۇلعا جونىندە» جەكە فوتوكورمەسىندە اۆتوردىڭ تاۋەلسىز قازاقستاندى دامىتۋ مەن نىعايتۋعا ەلەۋلى ۇلەس قوسقان قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ءومىرى مەن ەڭبەك جولىنا ارنالعان 40-تان استام تۋىندىسى ۇسىنىلدى.
