وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, جاياۋ جۇرگىنشىلەردىڭ جولدى كەز-كەلگەن جەردەن كەسىپ ءوتۋ ازايماي وتىر. ولار ساۋدا ورتالىقتارى مەن قيىلىستاردىڭ تۇسىنان كەسىپ ءوتىپ, جول قوزعالىسى ەرەجەلەرىن بۇزادى.
«جاياۋ جۇرگىنشىلەر ءوز ارەكەتىن «دۇكەنگە نەمەسە ايالداماعا بارۋ ءۇشىن جولدى كەسىپ وتكەن وڭاي. وتكەل تىم الىس, نە بولماسا وعان بارۋعا ۋاقىت جوق» دەپ تۇسىندىرەدى. الايدا, وسىنداي قۇقىق بۇزۋشىلىقتىڭ سوڭى قايعىلى جاعدايمەن اياقتالاتىنىن ەسكەرمەيدى. ماسەلەن, 56 جاستاعى جۇرگىزۋشى «Daewoo» كولىگىمەن س.داتوۆ كوشەسىندە ورنالاسقان «Sinoil» جانار-جاعارماي بەكەتى تۇسىندا جولدىڭ تىيىم سالىنعان بولىگىنەن وتكەن ادامدى قاعىپ كەتتى. جاياۋ جۇرگىنشى اۋرۋحانادا كوز جۇمدى» دەپ حابارلادى دەپارتامەنتتىڭ ءباسپاسوز قىزمەتى.
جىل باسىنان بەرى اتىراۋ قالاسىندا پاترۋلدىك پوليتسيا قىزمەتكەرلەرى 5715 جاياۋ جۇرگىنشىنى اكىمشىلىك جاۋاپكەرشىلىككە تارتىپ, ارقايسىسىنا 8334 تەڭگە كولەمىندە ايىپپۇل سالعان. سونداي-اق, كولىك قاققان 25 جاياۋ جۇرگىنشىنىڭ 15-ءى بەلگىلەنبەگەن جەردەن وتكەن.
