55 كيلو سالماقتىڭ جارتىلاي فينالىندا الماتىلىق قورلان جاقانشا تالدىقورعاندىق مارلان مۇقاشەۆتى ۇتسا، جامبىلدىق جانسەرىك سارسەمبيەۆ قىزىلجارلىق امانعالي بەكبولاتوۆتان باسىم ءتۇستى. قوس مىقتى اقتىق سىندا جولىقتى. كوپشىلىك بۇل جەكپە-جەكتە جاقانشانىڭ ۇتاتىنىنا سەنىمدى بولدى. وسىعان دەيىن ازيا بىرىنشىلىگىندە ءۇش رەت جۇلدەگەرلەر قاتارىنان كورىنگەن ول بىلتىر نۇر-سۇلتاندا وتكەن الەم چەمپيوناتىندا كۇمىس مەدالدى يەلەندى. سارسەمبيەۆ تە ونداي اتاقتىڭ ءبىرى دە جوق. بىراق ول مىنەزدى جىگىت ەكەن. ايگىلى قارسىلاسىمەن قايمىقپاي ايقاسقان جانسەرىك باس جۇلدەنى جەڭىپ الدى. قورلان كۇمىستى قاناعات تۇتتى. جارتىلاي فينالدا ولارعا جول بەرگەن قوس بالۋان قولا مەدالدى يەلەندى.  

60 كيلو سالماق دارەجەسىنىڭ فاۆوريتتەرى مەيرامبەك ايناعۇلوۆ پەن ايدوس سۇلتانعالي ەكەنى ءسوزسىز. ەكەۋى دە دۇنيەجۇزىلىك دودالاردا دارالانعان دۇلدۇلدەر. 26 جاستاعى مەيرامبەك 2017 جانە 2019 جىلدارى جۇلدەگەرلەر قاتارىنا قوسىلدى. پاريجدە ول كۇمىس السا، نۇر-سۇلتاندا قولاعا قول سوزدى. ودان بولەك، اقتوبە وبلىسىنىڭ وكىلى ازيا ويىندارىندا ءۇشىنشى ساتىعا تابان تىرەسە، ازيا بىرىنشىلىگىندە ءبىر كۇمىس پەن ەكى قولانى قورجىنعا سالدى. 24 جاستاعى ايدوس 2018 جىلى بۋداپەشتە ۇيىمداستىرىلعان الەم چەمپيوناتىندا قولا مەدالدى موينىنا ءىلدى. قىزىلوردالىق سپورتشىنىڭ باسقا دا اتاقتارى از ەمەس. وسى جايتتىڭ بارلىعىن وي ەلەگىنەن وتكىزگەن ماماندار باستى تارتىس ايتۋلى قوس ساڭلاق اراسىندا ءوربيدى دەپ توپشالادى. بىراق بۇل جورامال جوققا شىقتى. ايناعۇلوۆ شيرەك فينالدا وسكەمەندىك ەرنار فيداحمەتوۆكە جول بەردى.

فينالدا ايدوس سۇلتانعالي ەرنار فيداحمەتوۆتەن باسىم تۇسسە، مەيرامبەك ايناعۇلوۆ پەن اقمولالىق داستان زارلىحانوۆ قولا مەدالدى ەنشىلەدى.

63 كيلو سالماقتا قورلاننىڭ تۋعان اعاسى باعلان جاقانشا دا اقتىق سىنعا دەيىن القىنباي جەتتى. بىراق ول دا شەشۋشى تۇستا ءسۇرىندى. الماتىلىق ورەننىڭ جامبىلدىق سۇلتان اسەت ۇلىنا ءالى جەتپەدى. نۇر-سۇلتاندىق اساۋحات مۇحاماديەۆ پەن تالدىقورعاندىق عالىم قابدۋناساروۆ قولا مەدالدى ەنشىلەدى.

67 كيلو سالماقتاعى المات كەبىسباەۆتىڭ جانكەشتىلىگىنە سۇيسىنبەۋ مۇمكىن ەمەس. جاسى 33-كە تاياپ قالعان الماتتتىڭ حالىقارالىق ارەنادا قازاق ەلى نامىسىن قورعاپ جۇرگەنىنە 12 جىلدان اسا ۋاقىت بولدى. سول ارالىقتا سەمەي ءوڭىرىنىڭ ورەنى الەم چەمپيوناتىندا ءتورت رەت جانە ازيا ويىندارىندا ەكى رەت جۇلدە الدى. اراسىندا كۇمىسى مەن قولاسى دا بار. كەبىسباەۆ ەكى مارتە ازيا چەمپيونى اتانىپ، تاعى ەكى رەت كۇمىسپەن كۇپتەلدى. لوندون مەن ريو وليمپيادالارىندا باق سىنادى. سوڭعى جارىسىندا ول بەسىنشى ورىنعا تابان تىرەدى. بيىلعى ەل بىرىنشىلىگىندە كەبىسباەۆقا مەيىرجان شەرماحانبەت لايىقتى قارسىلىق كورسەتەدى دەپ ويلادىق. بىراق جاس دارىن باستاپقى باسەكەلەردىڭ بىرىندە سولتۇستىك قازاقستان وبلىسىنىڭ بالۋانى دانيار قالەنوۆكە 3:5 ەسەبىمەن ۇتىلدى.  

ناتيجەسىندە المات بارلىق قارسىلاسىن قاپى قالدىرىپ، باس جۇلدەنى قانجىعاسىنا بايلادى. اقتىق ايقاستا ول الماتى وبلىسىنىڭ وكىلى نۇربەك قىزىروۆتى 7:5 ەسەبىمەن ۇتتى. اقتوبەلىك تاڭىربەرگەن ناۋرىزباەۆ پەن شىمكەنتتىك ءادىلحان ساتاەۆ جۇلدەگەرلەر قاتارىنا قوسىلدى. 

72 كيلو سالماق دارەجەسىنىڭ فينالىندا اتىراۋلىق كاھارمان قيسمەتوۆ پەن الماتىلىق ازات سادىقوۆ كۇش سىناستى. بۇل باسەكە العاشقىسىنىڭ پايداسىنا شەشىلدى. تەمىرلان ءومىرباي (الماتى قالاسى) مەن ولجاس سۇلەيمەن (قىزىلوردا) ءۇشىنشى ساتىعا تابان تىرەدى.  

77 كيلو سالماقتا باس جۇلدە ءۇشىن تارتىس الماتى وبلىسىنىڭ قوس ساڭلاعى – اسحات دىلمۇحامەدوۆ پەن دەمەۋ جادىراەۆتىڭ اراسىندا ءوتتى. بۇل باسەكەنى بارشا ماماندار تاپجىلماي تاماشالادى. ءبىراز جىلدان بەرى وسى سالماقتىڭ تىزگىنى اسحاتتىڭ قولىندا. ونىڭ ازيا چەمپيونى جانە سول جارىستىڭ ءۇش دۇركىن جۇلدەگەرى دەگەن اتاقتارى بار. الەمدىك دودالاردا دىلمۇحامەدوۆ جەڭىس تۇعىرىنا سىنىق سۇيەم قالعاندا ءسۇرىنىپ ءجۇر. دەمەۋ 2017 جىلى پاريجدە وتكەن الەم چەمپيوناتىنىڭ كۇمىس جۇلدەگەرى. قۇرلىقتىڭ باستى دوداسىندا ەكى رەت جەڭىس تۇعىرىنا كوتەرىلدى. بىراق بۇل اتاقتارعا ول ءسال جەڭىل سالماقتاردا قول جەتكىزدى. سوعان قاراماستان جادىراەۆ الماتىداعى جارىستا ءوزىن جاقسى قىرىنان كورسەتتى. فينالدا دەمەۋ اسحاتتان 7:3 ەسەبىمەن ايلاسىن اسىرىپ، ەل چەمپيونى اتاندى. ازيا چەمپيوندارى ماكسات ەرەجەپوۆ پەن تەمىرلان شادۋكاەۆ قولا مەدالدى قورجىنعا سالدى.    

82 كيلو سالماقتا ميراس بارشىلىقوۆتىڭ باعى جاندى. قوستانايلىق سپورتشى فينالدا شىمكەنتتىك ءشامىل باتىروۆقا شاڭ قاپتىرىپ كەتتى. تەمىرلان بايعانين (قوستاناي) مەن قۋانىشبەك دوسجانوۆ (اقتوبە) ءۇشىنشى ورىندى يەلەندى.  

87 كيلو سالماق دارەجەسىندە ازيا چەمپيونى نۇرسۇلتان تۇرسىنوۆتىڭ تۇعىرى بيىك بولدى. بىرنەشە جىل سپورتتان شەتتەتىلگەن شىعىستىڭ شىمىر جىگىتى بوز كىلەمدى ابدەن ساعىنىپ قالعان ەكەن. الاتاۋ باۋرايىندا ول تاماشا ونەر كورسەتتى. جارىستى باسىنان اياعىنا دەيىن ءبىر دەممەن وتكىزگەن نۇرسۇلتان فينالدا ەلوردالىق ازامات كۇستىباەۆتىڭ تاس-تالقانىن شىعاردى. ەسەپ – 9:1. ەلمار ۋكالي (شىمكەنت) مەن ابدۋلازيز كوچەرادزە (الماتى) ءۇشىنشى ورىنداردى يەمدەندى.

97 كيلو سالماقتا ەرۇلان ىسقاقوۆتىڭ تەگەۋرىنىنە ەشكىم شىدامادى. ازيا ويىندارىنىڭ ەكى دۇركىن قولا جۇلدەگەرى، ازيا چەمپيونى دەگەن اتاعى بار قاراعاندىنىڭ قىرانى فينالدا سىر بويىنىڭ سايىپقىرانى ولجاس سىرلىبايعا سان سوقتىرسا، مەيىربەك قورداباي (جامبىل) مەن سالاۋات احمەتقالي (شقو) جۇلدەگەرلەر ساناتىنا قوسىلدى.  

130 كيلو سالماقتىڭ فينالىندا شىمكەنتتىك ءالىمحان سىزدىقوۆ پەن اقمولالىق تالعات جيەنتاەۆ كۇش سىناستى. بۇل باسەكە وڭتۇستىكتەن كەلگەن الىپتىڭ اسىعى الشىسىنان ءتۇستى. اقتوبەلىك اسىلبەك جانىبەك ۇلى مەن قوستانايلىق مانسۇر شادۋكاەۆ ءۇشىنشى ساتىلارعا جايعاستى. ءبىر ايتا كەتەرلىگى، ەلىمىزدىڭ ەڭ ۇزدىك بالۋاندارى نۇرماحان تىناليەۆ پەن دامير كۇزەمباەۆ ايتۋلى دوداعا قاتىسپادى.