قازاق ۇلتتىق ونەر ۋنيۆەرسيتەتىنىڭ رەكتورى, قازاقستاننىڭ حالىق ءارتىسى, قازاقستان ەڭبەك ەرى, قر تۇڭعىش پرەزيدەنتى - ەلباسىنىڭ مەملەكەتتىك بەيبىتشىلىك جانە پروگرەسس سىيلىعىنىڭ لاۋرەاتى ايمان مۇساقوجاەۆا شاعىن باعدارلامالار توپتاماسىنىڭ كەيىپكەرى بولدى. ول 1998 جىلى ەلباسىنىڭ باستاماسىمەن جاڭا استانادا سالىنعان قازاق ۇلتتىق مۋزىكا اكادەمياسىنىڭ (قازنام) قۇرىلۋ تاريحى تۋرالى ايتىپ بەردى.
"1997 جىلى ەلوردانى اقمولاعا كوشىرۋ يدەياسى پايدا بولدى. ءبىز, ەنەرگياعا تولى جاستار, مەملەكەت قۇرىلىسىنا دا قاتىسقىمىز كەلدى. ءبىز وسىندا كەلىپ, قازاق ۇلتتىق مۋزىكا اكادەمياسىن قۇرۋ جوباسىن جۇزەگە اسىرعىمىز كەلەتىنىن ايتتىق. نۇرسۇلتان ءابىش ۇلى, ۇكىمەت جانە اكىم قىزمەتىن اتقارعان ادىلبەك جاقسىبەكوۆ تە ايانىپ قالمادى. بۇگىندە ءبىز 22-ءشى جىل جۇمىس ىستەپ جاتىرمىز. قازاق ۇلتتىق مۋزىكا اكادەمياسى رەتىندە 10 جىل جۇمىس ىستەدىك. ەندىگى اتاۋى - قازاق ۇلتتىق ونەر ۋنيۆەرسيتەتى. ءبىزدىڭ وقۋ ورنىمىزدىڭ قالىپتاسۋ كەزەڭىندە نۇرسۇلتان ءابىش ۇلى بىزگە كوپ كومەك كورسەتتى. ۇكىمەتتى دە, ءبىلىم مينيسترلىگىن دە, مادەنيەت مينيسترلىگىن دە قولدادى. وسى كەزەڭدە ەلىمىزدە ارتىستەردىڭ جاڭا بۋىنى – ديماش قۇدايبەرگەن, سۇندەت بايعوجين, لاۋرا احمەتوۆا ءوستى. بۇلار – ءبىزدىڭ مادەنيەتىمىزدى تانىتىپ جۇرگەن ناعىز دارابوزدار. ەلباسى نۇرسۇلتان ءابىش ۇلى نازارباەۆ ۇلى ميسسيا ورىندادى. نۇرسۇلتان ءابىش ۇلى نۇر-سۇلتاندا مادەنيەتتى قالىپتاستىرا باستاعان ۋاقىتتى ءبىز “رەنەسسانس” ياعني قازاقستاندىق مادەنيەتتى قايتا جاڭعىرتۋ كەزەڭى دەپ اتايمىز", – دەيدى ايمان مۇساقوجاەۆا.
