سەناتتا ارال تەڭىزىندەگى سۋعا دەگەن تاۋەلدىكتى ازايتۋ تۋرالى تالقىلاندى

ەكولوگيا • 27 قاراشا، 2020

سەناتتا ارال تەڭىزىندەگى سۋعا تاۋەلدىكتى ازايتۋ تۋرالى تالقىلاندى

34 رەت كورسەتىلدى

بۇگىن قىزىلوردا وبلىسىندا ساراتس-2 – "سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ" جوباسىنىڭ اياسىندا قوعامدىق تىڭداۋ ءوتتى. اتالعان شارا پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ باستاماسىمەن ۇيىمداستىرىلىپ وتىر، دەپ حابارلايدى Egemen.kz

ايىم ءداۋىت

شاراعا كوميتەت توراعاسى مۇرات باقتيار ۇلى، سەناتور اقمارال ءالنازاروۆا، سونداي-اق قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار مينيسترلىگى سۋ رەسۋرستارى كوميتەتىنىڭ توراعاسى، جەرگىلىكتى اتقارۋشى ورگانداردىڭ، ءىرى كۇرىش شارۋاشىلىقتارىنىڭ باسشىلارى،بەلگىلى سۋ ماماندارى، قوعام بەلسەندىلەرى قاتىستى.

قوعامدىق تىڭداۋ جۇمىسىنا توراعالىق ەتكەن مۇرات باقتيار ۇلى ءوز سوزىندە ساراتس-1 – عاسىر جوباسى ەلباسى ن.ءا. نازارباەۆتىڭ تىكەلەي تاپسىرماسىمەن جۇزەگە اسىپ، قىزىلوردا وبلىسىنىڭ الەۋمەتتىك-ەكونوميكالىق دامۋىنا وڭ ىقپال ەتكەنىن اتاپ ءوتتى.

"ساراتس-1 جوباسىنىڭ جۇزەگە اسىرىلۋىنىڭ ناتيجەسىندە سىرداريا وزەنىنە جانە سولتۇستىك ارال تەڭىزىنە قۇيىلاتىن سۋدىڭ كولەمى كوبەيىپ، وڭىردەگى كوپتەگەن بيولوگيالىق ءتۇر قالپىنا كەلىپ، سۋارمالى جەرلەردىڭ سۋمەن قامتاماسىز ەتىلۋى جاقسارتىلدى. بۇل ءوز كەزەگىندە كولەمى 20-30 مىڭ گەكتاردان اساتىن بىرنەشە ءىرى كولدەردىڭ قالپىنا كەلۋىنە، بالىق شارۋاشىلىعىنىڭ دامۋىنا مۇمكىندىك بەرىپ وتىر. تەڭىزدە بۇرىن جوعالىپ كەتكەن بالىقتىڭ 13 ءتۇرى قايتا كورىنىس تاپتى، بالىق اۋلاۋ كولەمى 400 توننادان 6 مىڭ تونناعا جەتتى. تەڭىز ارال قالاسىنا 75 شاقىرىمنان 17 شاقىرىمعا دەيىن جاقىندادى"، دەدى مۇرات باقتيار ۇلى.

قوعامدىق تىڭداۋعا قاتىسۋشىلار سولتۇستىك ارال تەڭىزىنىڭ بوگەتىن ۇلعايتۋدىڭ بىرقاتار نۇسقالارىن تالقىعا سالدى. سەناتور مۇرات باقتيار ۇلى بۇل باعىتتا ورتاق شەشىمگە كەلىپ، ناقتى ىسكە كوشەتىن ۋاقىت جەتكەنىن ايتتى.

"تەحنيكالىق-ەكونوميكالىق نەگىزدەمەنى ازىرلەۋ بارىسىندا كومپيۋتەرلىك مودەلدەۋ جاساۋ ارقىلى سولتۇستىك ارال تەڭىزىنىڭ اۋماعىن ۇلعايتۋدىڭ ءبىر نەمەسە ەكى دەڭگەيلى نۇسقالارى بويىنشا تۇپكىلىكتى شەشىم قابىلداۋدى قاجەت دەپ پايىمدايمىز. وسىعان بايلانىستى، دۇنيەجۇزىلىك بانكتىڭ گرانتى ەسەبىنەن جوبانىڭ تەحنيكالىق-ەكونوميكالىق نەگىزدەمەسىن ازىرلەۋدى جەدەلدەتۋ قاجەتتىگىن ۇسىنامىز. بۇگىنگى كۇنى ارال ءوڭىرىنىڭ حالقى وسى جوبانىڭ جاقىن ارادا ىسكە اساتىندىعىنا ءۇمىت ارتىپ وتىر"، دەدى سەناتور.

ءوز سوزىندە مۇرات باقتيار ۇلى وبلىستا سۋ قويمالارىن سالۋدىڭ اسا وزەكتى ەكەنىنە دە نازار اۋدارتتى.

"قىزىلوردا وبلىسىندا قىسقى تاسقىن سۋ جيناقتاۋ ءۇشىن سۋ جيناۋ كولەمى 2،3 ملرد تەكشە مەتر بولاتىن 6 سۋ قويماسىن سالۋ جوبالارىنىڭ قۇجاتتامالارى ازىرلەنۋدە. سونىڭ ىشىندە، بيىل سۋ جيناۋ كولەمى 600 ملن تەكشە مەتر بولاتىن "كۇمىسكەتكەن" جانە كولەمى 775 ملن تەكشە مەتر سۋ جينايتىن "قاراوزەك" سۋ قويمالارىنىڭ جوبالاۋ سمەتالىق قۇجاتتامالارى ازىرلەنەتىن بولادى. سوندىقتان، 2021 جىلدان باستاپ قۇرىلىس جۇمىستارىن باستاۋدى قاجەت ەتەدى. اتالعان جوبالار جۇزەگە اسىرىلعان جاعدايدا، جوعارى تۇرعان مەملەكەتتەردەن سۋعا دەگەن تاۋەلدىكتى ازايتىپ، اۋىل شارۋاشىلىعىن دامىتۋعا مۇمكىندىكتەر بەرەر ەدى"، دەدى مۇرات باقتيار ۇلى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز