قاراشا, جەلتوقسان مەن ارعى ءبىر-ەكى ايدا ەلىمىزدىڭ قوعامدىق-ساياسي ومىرىندە ورىن الاتىن وقيعالارعا ابايشا قاراۋعا تالپىنىپ, ولاردىڭ بۇگىنگى الەۋمەتتىك الەۋەتىنە باسا نازار اۋدارعاندى ءجون كوردىك. ويتكەنى قازىر كوپ نارسەنىڭ ءتۇپ قازىعى الەمدى جايلاپ وتىرعان ىندەت, سونىڭ تاراۋ دەڭگەيى, حالىقتىڭ ءومىر ءسۇرۋ, تىرلىك كەشۋ, جان باعۋى – ءبارى وسىعان كەلىپ تىرەلۋدە. دەمەك, وسىنداي سىن ساعاتتا حالىق پەن قوعام جۇدىرىقتاي جۇمىلۋى شارت. الايدا كوروناۆيرۋس ىندەتىنەن ساقتاندىرۋ باعىتىندا قابىلدانىپ جاتقان ورىندى شەشىمدەردى اياقاستى ەتىپ, باسقاسىن ايتپاعاندا, ءتىپتى بەتپەردە كيۋ مەن الەۋمەتتىك قاشىقتىقتى ساقتاۋ سياقتى قاراپايىم سانيتارلىق تالاپتاردىڭ ورىندالماۋى جاعدايدى ودان بەتەر ۋشىقتىرۋدا. وسىنداي جاعداياتتاردىڭ ورىن الۋىنىڭ باستى سەبەپتەرىنىڭ ءبىرى – مەملەكەتتىڭ تۇرعىنداردىڭ تۇرعىلىقتى جەرلەرىندە حالىقپەن تىكەلەي بايلانىس ورناتىپ, ولارمەن جۇمىس ىستەۋدىڭ مەحانيزمدەرى مەن ءادىس-تاسىلدەرىن مەڭگەرە الماي وتىرعانىندا. پاتەر يەلەرى كووپەراتيۆتەرىنەن باستاپ, باسقا دا اۋداندىق جانە قالالىق ۇيىمدار مەن مەكەمەلەردىڭ حابارلاندىرۋ ءىلىپ, اقشالاي ايىپپۇل سالامىز دەپ قورقىتقاننان باسقا ەشتەڭە ىستەمەيدى. ەشكىمگە ەشتەڭە كەرەك ەمەس, وعان باستارىن اۋىرتىپ جاتقان ادام دا جوق. جاپپاي نەمقۇرايدىلىق پەن جاساندىلىق.
كوپشىلىك ءجيى باراتىن ورىنداردىڭ, اسىرەسە دۇكەن يەلەرىنىڭ ىندەتتىڭ تارالۋىنا توسقاۋىل بولارلىقتاي ارەكەتتەرى سەزىلمەيدى. سىرتقى ەسىككە «بەتپەردەسىز كىرۋگە بولمايدى» دەپ جازىلعان ءبىر جاپىراق قاعازدى ءىلىپ قويىپ, وزدەرى بەتپەردە كيمەي, ونى تاقپاي كىرگەندەرگە ەسكەرتۋ جاساعانسىپ, ساۋداسىن ودان ءارى الاڭسىز جالعاستىرۋدا. وكىنىشتىسى, حالقىمىزدىڭ «ساقتىقتا قورلىق جوق» دەگەن دانالىعى مۇلدەم ەسكەرۋسىز قالىپ وتىر. وعان بۇگىنگى تۋىنداعان احۋالدىڭ ءوزى دالەل. باسقا دا كىشىگىرىم دۇكەندەردە سانيتارلىق-ەپيدەميالىق تالاپتاردىڭ تولىقتاي ورىندالماۋىنان پاندەميانىڭ تارالۋى ۇدەپ, «قىزىل-سارى» ايماقتاردىڭ سانى ءوسىپ بارادى. قازىر بارلىق كۇش ىندەتتى اۋىزدىقتاۋعا جۇمسالۋى كەرەك. بۇل – ونلاين تۇرىندە عانا ىستەلەتىن شارۋا ەمەس, ول ادامنىڭ تىكەلەي ارالاسۋىن, شىنايى باعالاۋ مەن جۇرەكپەن سەزىنۋىن تالاپ ەتەتىن ورتاق ءىس. ويتكەنى جالعان ەسەپ پەن ۇرانشىل باياندامالار تۇبىمىزگە جەتەتىنىن تۇسىنەر كەز كەلگەن ءتارىزدى. ماسقارا بولعاندا, كوروناۆيرۋستى اۋىزدىقتاۋعا ارنايى بولىنگەن قارجىنىڭ ءوزى جەمقورلاردىڭ قارماعىنا ىلىگۋدە. وسىنى كورە وتىرىپ, ۇيات تۋرالى دا, ادامگەرشىلىك جايلى دا اڭگىمە قوزعاۋدىڭ ءوزى قيىن.
وسى كەزەڭدە اتقارىلاتىن ساياسي-الەۋمەتتىك ءمانى زور شارالاردىڭ قاتارىنا پارلامەنت سايلاۋىن جاتقىزۋعا بولادى. قاڭتار ايىنا بەلگىلەنىپ وتىرعان ءماجىلىس پەن ءماسليحاتتار دەپۋتاتتارى سايلاۋىنىڭ وزىندىك ەرەكشەلىگى, ونىڭ وزەكتىلىگى ءبىرىنشى كەزەكتە مەملەكەت باسشىسى ق.توقاەۆتىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى مەن «حالىق ۇنىنە قۇلاق اساتىن مەملەكەت» تۇجىرىمداماسىن شىن مانىندە ىسكە اسىرۋدىڭ العاشقى ءارى جاۋاپتى قادامى ەكەنىندە. وسىنداي اۋقىمدى جۇمىستىڭ ناتيجەلى بولۋىنىڭ باستى شارتتارىنىڭ ءبىرى – پاندەميا جاعدايىنداعى سايلاۋ ناۋقانى مەن داۋىس بەرۋ كەزىندە بارلىق دەڭگەيدەگى سايلاۋ كوميسسيالارىنىڭ جۇمىستارىنىڭ تالاپتارعا ساي ۇيىمداستىرىلىپ, بارلىق قاجەتتى سانيتارلىق نورمالاردى ساقتاۋ بويىنشا شارالار قولدانىلىپ, ءتيىستى جاعدايلاردىڭ جاسالۋىن قامتاماسىز ەتۋ. سايلاۋعا تۇسەتىن ساياسي كۇشتەردىڭ بارلىعىنىڭ دا بۇگىنگى تاڭداعى باستى مىندەتى حالىقتى پاندەميادان امان ساقتاپ, سايلاۋ الدىنداعى ۇگىت جۇرگىزۋى قوعامدى وسى ىسكە جۇمىلدىرۋعا دا باعىتتالعانى ابزال. مۇندا سايلاۋشىلاردىڭ الەۋمەتتىك سانالىلىق تانىتۋىنىڭ دا ماڭىزى وتە زور.
قالاي بولعاندا دا ەڭ باستىسى, پرەزيدەنت ايتقانداي, پارلامەنتتىڭ ىقپالدىلىعى مەن ءماسليحاتتاردىڭ ايماقتاردىڭ الەۋمەتتىك-ەكونوميكالىق, قوعامدىق-ساياسي دامۋىنداعى ءرولىن ارتتىرۋعا, ولاردىڭ حالىققا جاقىن بولۋىنا قول جەتكىزۋ. ەڭ باستىسى, سايلاۋ بارىسى مەن داۋىس بەرەتىن كۇنى ەشبىر زاڭبۇزۋشىلىقتارعا جول بەرىلمەسە بولعانى. الداعى سايلاۋعا ۇلكەن جاۋاپكەرشىلىكپەن قاراعانىمىز ابزال. سەبەبى ونىڭ استارىندا «حالىقتىڭ سەنىمى» دەگەن قاسيەتتى ۇعىم مەن ەلدىڭ بولاشاق تاعدىرى تۇر... ويتكەنى, سەنىم جوق جەردە ىنتىماق تا, قوعامنىڭ بەرەكە-بىرلىگى دە بولمايدى. ابايشا ايتساق: ء«بىرىڭدى, قازاق, ءبىرىڭ دوس, كورمەسەڭ ءىستىڭ – ءبارى بوس».
