باس پروكۋراتۋرا بىرىككەن اراب امىرلىگى دۋباي قالاسىندا تۇتقىندالعان قازاقستاننىڭ 12 ازاماتى ماسەلەسىمەن اينالىسپايتىنىن, بۇل ءىستى ەلىمىزدىڭ ىشكى ساياسات قۇرىلىمى باقىلاۋى قاجەتتىگىن مالىمدەدى. بۇل تۋرالى Total.kz حابارلادى.
وسىعان دەيىن بىرقاتار بۇقارالىق اقپارات قۇرالدارى بەتىندە جاريالانعانداي, بىرىككەن اراب امىرلىگى اسا اۋىر قىلمىس بويىنشا ەلىمىزدىڭ 10 ازاماتىنا ىزدەۋ جاريالاعان. ال جاقىندا عانا دۋباي پوليتسياسىنىڭ قولىنا تۇسكەن ءبىزدىڭ 12 ازاماتتىڭ ماسەلەسىمەن سىرتقى ىستەر مينيسترلىگى اينالىسۋدا.
باس پروكۋراتۋرانىڭ رەسمي وكىلى نۇرداۋلەت سۇيىندىكوۆ جۋرناليستەرگە بەرگەن سۇحباتىندا تۇتقىنعا الىنعان 12 ازاماتقا قاتىستى بايلامدى سىرتقى ىستەر مينيسترلىگىنىڭ تۇجىرىمىنان كەيىن ايتۋعا بولاتىنىن, سونداي-اق, قاشقىن ەكس-بانكير مۇحتار ءابىلازوۆتىڭ ايەلى الما شالاباەۆاعا قاتىستى تەرگەۋ ءىسىنىڭ اياقتالماعانىن اتاپ ءوتتى. قازىر ونىڭ جالعان قۇجات جاساتقانى تۋرالى ايعاقتار جان-جاقتى تەكسەرىلۋدە. وسى جانە وزگە ماسەلە بويىنشا ونىڭ جۇرگەن جەرلەرىنە سۇراۋ سالىنعان. سوندىقتان ولاردان جاۋاپ كەلگەنشە, ناقتى مالىمەت جاريالاۋعا ەرتەرەك. ال م. ءابىلازوۆتىڭ وزىنە قاتىستى فرانتسيادا 5 جەلتوقساندا كەزەكتى سوت وتىرىسى وتكىزىلەتىنى بەلگىلى بولدى. ول انگليا جوعارعى سوتىنىڭ شەشىمى بويىنشا ەلىمىزگە 300 ملن. دوللار قايتارۋى ءتيىس.
باقىتبەك كەنەش ۇلى.
دەرەككوز: Total.kz
