ايماقتار • 26 قاراشا، 2020

مونيتورينگتىك توپتار جۇمىسى كۇشەيتىلەدى

88 رەت كورسەتىلدى

وبلىستىق سانيتاريالىق-ەپيدەميولوگيالىق باقىلاۋ دەپار­تا­مەنتىنىڭ مالىمەتىنە سۇيەنسەك، 28 ناۋرىز بەن 23 قاراشا ارا­لى­عىن­دا كوروناۆيرۋس ينفەكتسياسىنىڭ 11 549 جاعدايى تىركەلدى. قا­ۋىپتى ىندەتتىڭ 3 459 ناۋقاستا سيمپتومدى، ال 8 090 پاتسيەنتتە سيمپ­تومسىز ءتۇرى انىقتالىپ وتىر.

اتىراۋ قالاسىندا – 5 555، جىلىوي اۋدانىندا – 4 242، ونىڭ ىشىندە تەڭىز كەن ورنىندا – 3 133، قۇلسارى قالاسىندا – 1 109، يندەر اۋدانىندا – 361، يساتاي اۋدانىندا – 251، قىزىلقوعا اۋدانىندا – 435، قۇرمانعازى اۋدانىندا – 185، ماقات اۋدانىندا – 285، ماحامبەت اۋدانىندا 235 قاۋىپتى ىندەتتىڭ بەلگىسى راستالدى. تەك سوڭعى ەكى تاۋلىكتە كوروناۆيرۋس ينفەكتسياسىن 36 ادام جۇقتىردى.

ال 5 ماۋسىم مەن 20 قاراشا ارالىعىندا مونيتورينگتىك توپتار 15 122 نىسانعا 6 120 تەكسەرىس جۇرگىزدى. سونىڭ ناتيجەسىندە 2 005 ماتەريال جيناقتالىپ، 86 ملن تەڭگەگە جۋىق ايىپپۇل سالىنىپ وتىر. ونىڭ ىشىندە شەكتەۋ شارالارىن بۇزعان 579 اكىمشىلىك ءىس جەكە جانە زاڭدى تۇلعالارعا تولتىرىلدى. دەگەنمەن سالا ماماندارى وڭىردەگى ەپيدەميالىق احۋالدى تۇراقتى دەپ سانايدى.

وبلىس اكىمى ماحامبەت دوسمۇحامبەتوۆ سOVID-19 ىندە­تىنىڭ تارالۋىن ودان ءارى بولدىرماۋ ماقساتىندا قۇرىلعان مونيتورينگتىك توپتاردىڭ جۇ­مىسىن تالداۋ ماقساتىندا ارنايى كەڭەس وتكىزدى. وندا دەن­ساۋلىق ساقتاۋ باسقارماسى، پوليتسيا، سانيتاريالىق-ەپيدە­ميولوگيالىق باقىلاۋ دەپار­تامەنتتەرى، «اتامەكەن» ۇكپ-نىڭ وڭىرلىك فيليالىنىڭ باسشىلارى، قالا، اۋدان اكىمدەرى اتقارىلعان جۇمىستارى تۋرالى ەسەپ بەرىپ، ۇسىنىستارىن جەتكىزدى.

– قازىر الەم ەلدەرىندەگى احۋال كۇردەلەنە ءتۇستى. ەلىمىزدىڭ كەيبىر وڭىرلەرىندە ىندەتتىڭ تارالۋى اۋقىمى بايقالادى. سوندىقتان كەز كەلگەن ۋاقىتتا دايىن بولۋىمىز كەرەك. قاۋىپتى ىندەتتىڭ الدىن الۋ ءۇشىن مونيتورينگتىك توپتار اسىرەسە دەمالىس كۇندەرى باقىلاۋدى كۇشەيتىپ، حالىققا ءتۇسىندىرۋ، ەسكەرتۋ جۇمىسىن جانداندىرعانى ءجون، – دەدى م.دوسمۇحامبەتوۆ.

سونداي-اق شەكارا بەكەتىندە ەلىمىزگە كەلۋشىلەرگە باقىلاۋدى كۇشەيتۋ، سەنبى-جەكسەنبى كۇندەرى تەكسەرىس شارالارىن كوبەيتۋ، كاسىپكەرلەردى كارانتين شارالارىن بىرنەشە رەت بۇزعان جاعدايدا ليتسەنزياسىنان ايىرۋ ماسەلەلەرى تالقىعا سالىندى. ءوڭىر باسشىسى مەملەكەتتىك باس سانيتارلىق دارىگەردىڭ قاۋلىسىندا كورسەتىلگەن تالاپتاردى قاتاڭ ساقتاۋدى، مونيتورينگتىك توپ جۇمىسىن تۇراقتى زەردەلەپ وتىرۋدى تاپسىردى.

 

اتىراۋ وبلىسى

 

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

ۇقساس جاڭالىقتار