باقىلاۋ بولماي قىلمىس ازايمايدى

كەشە باس پروكۋرور قايرات ءماميدىڭ ءتور­اعالىق ەتۋىمەن ەلىمىزدىڭ قۇقىق قورعاۋ ورگاندارى ۇيلەستىرۋ كەڭەسىنىڭ كەزەكتى ءماجىلىسى بولىپ ءوتتى. ونىڭ جۇمىسىنا پرەزيدەنت اكىمشىلىگى باسشى­سى­نىڭ ورىنباسارى ت.دوناقوۆ, ءبىلىم جانە عى­لىم ءمينيسترى ج.تۇيمەباەۆ, ادام قۇقىقتارى ءجونىن­دەگى ۋاكىل ا.شاكىروۆ, پارلامەنت دەپۋتات­تارى جانە مەملەكەتتىك ورگانداردىڭ وكىلدەرى قاتىستى. ماجىلىستە جاسوسپىرىمدەر اراسىنداعى قىلمىس­تىق ارەكەتتەردىڭ جيىلەپ جانە ۇدەمەلى سيپات الىپ بارا جاتقاندىعى ءسوز بولدى. حالىقتىڭ تۇرمىسى تۇزە­لىپ, الەۋمەتتىك جاعداي جاقسارعان سايىن ءجاسوسپى­رىمدەر قىلمىسىنىڭ ازايۋ ورنىنا, ونىڭ ءتۇرلى سيپاتتا ەتەك الۋى الاڭداتادى. سوندىقتان دا بولسا كەرەك, بۇل ماسەلە تۋرالى مەملەكەت باسشىسى وتكەن جىلعى قاراشادا حالىقپەن وتكىزىلگەن تىكەلەي جەلى بارىسىندا اتاپ كورسەتتى. ەلباسى كامەلەتكە تولماعاندار اراسىنداعى قىلمىستىڭ تارالۋىمەن كۇرەستى كۇشەيتۋ قاجەتتىگىن ايتتى. بىراق جاعداي ءالى ءماز ەمەس كورىنەدى. ماجىلىستە باس پروكۋراتۋرانىڭ كەلتىرگەن جاسوسپىرىمدەر قىلمىسى تۋرالى تىڭ مالىمەتتەرى جاعانى ۇستاتادى. ولار ايماقتارعا شىعىپ تەكسەرۋلەر جۇرگىزگەن. ناتيجەسىندە بەلگىلى بولعانداي, كەيبىر وڭىرلەردە, اسىرەسە, تاراز قالاسىندا جاعداي كۇردەلى كۇيىندە قالىپ وتىر جانە ونداعى ورتا وقۋ ورىندارىندا بوپسالاۋ, اقشا جيناۋ جانە بۇزاقىلىق دەرەكتەرى جيىلەپ كەتكەن. ءماجىلىس بارىسىندا باس پروكۋرور قۇقىقتىق ىقپال ەتۋ شارالارىنىڭ تيىمدىلىگىن ارتتىرۋ, ال­دىن-الۋ جۇمىستارىن ساپالى جۇرگىزۋ, ءجاسوسپى­رىم­دەردى قىلمىستىق ەلەمەنتتەردىڭ ىقپالىنان با­رىن­شا قورعاۋ, سونداي-اق ولاردىڭ قۇقىقتارىنىڭ بۇزىلۋىنىڭ ۋاقتىلى جولىن كەسۋ قاجەتتىلىگىن اتاپ كورسەتتى. بۇگىن ءبىز وسى ءبىر كۇردەلى ماسەلە­لەردى ۇيلەستىرۋ كەڭەسىنىڭ مۇشەلەرىمەن شەشۋدىڭ جولدارىن, كامەلەتكە تولماعاندار اراسىنداعى قۇقىق بۇزۋشىلىقتارمەن كۇرەستىڭ جاي-كۇيىن, سونداي-اق قۇقىق قورعاۋ جانە ۋاكىلەتتى ورگانداردىڭ جۇمىس تيىمدىلىگىن ارتتىرۋعا باعىتتالعان شارالاردى تالقىلادىق, دەيدى باس پروكۋرور قايرات ءمامي. الەكساندر تاسبولاتوۆ.