الماتىدا 300-دان استام جوبا جۇزەگە اسادى

ايماقتار • 26 قاراشا، 2019

قالا تۇرعىندارى تاڭداعان 300-دان اسا جوبا جۇزەگە اسادى

40 رەت كورسەتىلدى

الماتىدا «بيۋدجەتكە قاتىسۋ» قالالىق جوباسى اياسىندا وسى جىلدىڭ تامىز ايىندا اباتتاندىرۋ بويىنشا تۇرعىنداردىڭ ۇسىنىستارىنا داۋىس بەرۋ باستالعان بولاتىن. ەندى وسى ۇسىنىستاردىڭ قورىتىندىسى جاريالانىپ وتىر.

ەلۆيرا سەرىكقىزى

قالا تۇرعىندارىنىڭ ۇسىنىستارى budget.open-almaty.kz پورتالى ارقىلى قابىلدانعان. 11-23 قاراشا ارالىعىندا وتكەن داۋىس بەرۋ كەزىندە قالا تۇرعىندارى ۇزدىك ۇسىنىستاردى وزدەرى انىقتادى. داۋىس بەرۋ budget.open-almaty.kz پورتالىندا ەتسق نەمەسە جسن (SMS-كود) پايدالانۋ ارقىلى ونلاين، سونداي-اق اۋداندىق اكىمدىكتەر مەن Open Almaty فرونت-وفيسىندە (اباي داڭعىلى، 90) جازباشا داۋىس بەرۋ تۇرىندە وتكىزىلدى.

پورتالعا تۇرعىنداردان 795 جوبالىق ۇسىنىس ءتۇسىپ، ونىڭ 448-ءى داۋىسقا سالىنعان. ناتيجەسىندە 28 576 الماتىلىق داۋىس بەرسە، ونىڭ 27 476-سى ونلاين، 1113-ءى جازباشا تۇردە بەرىلگەن. وسىلايشا، «بيۋدجەتكە قاتىسۋ» اياسىندا 2021 جىلى 343 جوبا ىسكە اساتىن بولادى (المالى اۋدانى - 73، ناۋرىزباي اۋدانى – 61، تۇركسىب اۋدانى – 54، بوستاندىق اۋدانى – 49، مەدەۋ اۋدانى – 34، الاتاۋ اۋدانى – 31، اۋەزوۆ اۋدانى – 22، جەتىسۋ اۋدانى – 19).

قالا تۇرعىندارىنىڭ ەڭ كوپ داۋىس جيناعان جوبالارى قاتارىندا: بوستاندىق اۋدانىندا №3 وقۋشىلار ءۇيىنىڭ اۋماعىن اباتتاندىرۋ (458)، الاتاۋ اۋدانىندا «اتلەتتەر قالاشىعى» تك اۋماعىن اباتتاندىرۋ (424)، المالى اۋدانىندا شەۆچەنكو كوشەسى، 167 مەكەنجايىنداعى اۋلانى جاڭارتۋ جانە كوگالداندىرۋ (387)، مەدەۋ اۋدانىندا №168 مەكتەپكە ءوتۋ ءۇشىن ابىلعازى وزەنى ارقىلى جاياۋ جۇرگىنشىلەر كوپىرى مەن پاندۋسى بار باسپالداق سالۋ (349)، تۇركسىب اۋدانىندا «قازاقستان جاستارىنا پاتريوتتىق ءتالىم بەرۋ» تاقىرىبىنا مۋرال سالۋ (325)، اۋەزوۆ اۋدانىنداعى «مامىر-1» ىقشاماۋدانىندا بالالار ويىن الاڭىن كۇردەلى جوندەۋ (147)، ناۋرىزباي اۋدانىنداعى تاستىبۇلاق ىقشاماۋدانىندا جول بويىندا جابىق ارىق جۇيەسىن ورناتۋ (132)، جەتىسۋ اۋدانىنداعى كوكجيەك ىقشاماۋدانىندا جەكپە-جەك ورتالىعىن اشۋ (112) بار.

الماتى قالاسى قوعامدىق كەڭەسىنىڭ مۇشەلەرى تۇرعىنداردىڭ داۋىسىن ساناپ، باستامالارعا ءوز باعاسىن بەردى. قوعامدىق كەڭەس مۇشەسى مۇرات ابدىشۇكىروۆتىڭ ايتۋىنشا، «بيۋدجەتكە قاتىسۋ» جوباسى بويىنشا قاعاز تۇرىندە داۋىس بەرۋ ناتيجەسىن ساناۋعا ءبىر كۇن كەتتى. بۇل تۇرعىندار ءوز اۋدانىن اباتتاندىرۋ ءۇشىن داۋىس بەرۋگە بەلسەندى قاتىسقاندىعىن بىلدىرەدى. وسى ورايدا تۇرعىنداردىڭ پىكىرىن ەسكەرە وتىرىپ، قالانى دامىتۋ ءۇشىن «بيۋدجەتكە قاتىسۋدى» تۇراقتى تۇردە وتكىزۋ كەرەك. تاجىريبە كورسەتكەندەي، قالا تۇرعىندارىنىڭ بەلسەندىلىگى مەن جوباعا دەگەن قىزىعۋشىلىعى جىل سايىن ارتىپ كەلەدى.

الماتى قالاسى بوستاندىق اۋدانى مۇگەدەكتەر قوعامىنىڭ باسقارما توراعاسى ۇلان ىڭكاربەكوۆ تۇرعىنداردىڭ بەلسەندىلىگى ارتقانىن اتاپ ءوتىپ، ءار اۋداندا ورتا ەسەپپەن 100 جوبادان ۇسىنىلعانىن جەتكىزدى. سونىڭ ىشىندە داۋىس بەرۋگە قالا تۇرعىندارىنا قاجەت جانە ەڭ ماڭىزدى جوبالار جىبەرىلدى.

الماتى قالاسى قوعامدىق كەڭەسىنىڭ ساراپشىسى دميتري ۆاسيلەۆتىڭ پىكىرىنشە، «بيۋدجەتكە قاتىسۋدىڭ» كاتەگوريالارىن كوبەيتىپ، اباتتاندىرۋدان بولەك، الەۋمەتتىك نىسانداردى، دەمالىس ورتالىقتارىن اشۋ مۇمكىندىگىن قاراستىرۋ قاجەت.

الماتى قالاسىنىڭ اكىمدىگى 2019 جىلى «بيۋدجەتكە قاتىسۋ» پيلوتتىق جوباسىن جۇزەگە اسىرعان بولاتىن. بۇل جوبالارعا قالانىڭ 8 اۋدانىنا جەرگىلىكتى بيۋدجەتتەن 500 ملن تەڭگەدەن بولىنگەن. بيىلعى جىلى بۇل كورسەتكىش 6،4 ملرد تەڭگەگە دەيىن ءوسىپ (2019 جىلى 4 ملرد تەڭگە)، ءار اۋدانعا شاققاندا 800 ملن تەڭگەدەن كەلەدى. قالاعا قوسىلعان اۋماقتاردى دامىتۋ ماقساتىندا «بيۋدجەتكە قاتىسۋ» اياسىندا ناۋرىزباي جانە الاتاۋ اۋداندارىنا 500 ملن تەڭگەدەن ءبولۋ قاراستىرىلعان. وسىلايشا، اتالعان ەكى اۋداننىڭ ارقايسىسىنا 1،3 ملرد تەڭگەدەن بولىنەتىن بولادى.

الماتى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز