ەرەكشە كۇتىمدى قاجەت ەتەتىن وقۋشى فارابي ساماليكوۆ دوسى مۇحتار ورازبايمەن بىرگە اياق-قولدى وڭالتۋعا ارنالعان جاتتىعۋ قۇرالىن ويلاپ تاپتى. ەكەۋى «FM Team» كومانداسىن قۇرىپ, نۇرسۇلتان نازارباەۆ قورى ۇيىمداستىرعان روبوتتەحنيكادان «KazRoboProject» جاس كونسترۋكتورلار بايقاۋىنا قاتىسىپ, جەڭىمپاز اتاندى.
ءوز ونەرتابىسىنىڭ ءمانى مەن قولدانىستاعى ماڭىزى جايىندا فارابي ساماليكوۆ بىلاي دەيدى: «ەرەكشە قاجەتتىلىكتەرى بار ادامدار ءۇشىن ترەناجەر جاساۋ يدەياسى كەزدەيسوق كەلگەن جوق. مەن ءوزىم سال اۋرۋىنا شالدىققاندار قاتارىنانمىن. سوندىقتان مەن ءوزىم سياقتى جانە باسقا اۋرۋلاردان زارداپ شەگەتىن ادامدار ءۇشىن جاتتىعۋدىڭ قانشالىقتى ماڭىزدى ەكەنىن بىلەمىن».
ونىڭ ايتۋىنشا, ولاردىڭ بەلسەندى جانە ءپاسسيۆتى ترەناجەرىن ۇنەمى قولدانۋ بۇلشىقەت اتروفياسىن تومەندەتۋگە, فيزيكالىق كۇشتى ارتتىرۋعا كومەكتەسەدى. قۇرىلعى باسقا ەلدەرگە قاراعاندا الدەقايدا ارزان. ال قازاقستاندا مۇنداي قۇرىلعىعا سۇرانىس كوپ. ايتا كەتۋ كەرەك, فارابي مەن مۇحتار ترەناجەردىڭ مودەلىن جاساپ قانا قويماي, ونى جان-جاقتى سىناقتان وتكىزۋدى دە ويلاستىرعان.
– دامۋ جوسپارى دايىن تۇر. ونىڭ جۇزەگە اسۋىن 4 كەزەڭگە بولدىك. ءبىرىنشى كەزەڭدە پروتوتيپ جاسايمىز. ەكىنشى كەزەڭدە العاشقى سىناقتان وتەدى. بۇدان ءارى انىقتالعان ەسكەرتۋلەردى ەسكەرە وتىرىپ, تەحنولوگيانى جەتىلدىرۋ جۇمىستارى جۇرگىزىلەدى. ال تەستىلەۋدى اتىراۋداعى «بولاشاق» وڭالتۋ ورتالىعىنىڭ بازاسىندا وتكىزەمىز دەپ وتىرمىز. ومىردە كەز كەلگەن نارسە بولۋى مۇمكىن, بىراق ءۇمىتىڭىزدى ۇزبەڭىز. ويتكەنى ادام الدىندا ۇلكەن ماقسات قويۋى كەرەك. وسى نارسە كەز كەلگەن قيىندىقتى جەڭىپ شىعۋعا كومەكتەسەدى, – دەيدى فارابي.
