سۋرەتتە: سپورت شەبەرى باۋىرجان قۇلجانوۆ ءوز ۇيىندەگى مۋزەيىن تانىستىرىپ تۇر.
سپورتتىڭ, ونىڭ ىشىندە كۇرەستىڭ وبلىستاعى دامۋىنا وزىندىك ۇلكەن ۇلەس قوسقان ازامات. كەزىندە ول پەتروپاۆل قالالىق پارتيا كوميتەتىندە قىزمەت ىستەگەن ەكى قازاقتىڭ ءبىرى بولعان ەدى. بۇل جەردە دە ول دەنەشىنىقتىرۋ مەن سپورت سالاسىنىڭ دامۋىن قاداعالاعان. ءوز ىسىنە بەرىك جانە بىلىكتى ازاماتتىڭ ۇلتتىق نامىسى دا جوعارى بولدى. ول سولتۇستىكتە قازاق كۇرەسىنىڭ دامۋىنا زور ەڭبەك ءسىڭىردى.
ءبىز قالاداعى جالعىز قازاق مەكتەبىندە وقىپ, جاسوسپىرىمدەردىڭ سپورت مەكتەبىندەگى كۇرەس سەكتسياسىنا قاتىسىپ جۇرگەندە باۋىرجان قۇلجانوۆ اعامىزدى ءجيى كورەتىنبىز. ول سول تۇستا كۇرەستە عانا ەمەس, ومىردە دە ەشكىمگە ەسەسىن جىبەرمەيتىن قىزۋقاندى ازامات بولىپ كورىنەتىن.
ەلىمىزدىڭ تاۋەلسىزدىك العان جىلدارىندا جاڭادان قۇرىلعان, بۇرىن بولماعان كەدەن قىزمەتىن دە باۋىرجان قۇلجانوۆ باسقاردى. وسىندا قىزمەتتەن قول ۇزبەي ءجۇرىپ, رەسەيدىڭ كەدەن اكادەمياسىن دا العاشقىلاردىڭ ءبىرى بولىپ سىرتتان وقىپ ءبىتىردى. ودان ءارى جامبىل وبلىستىق كەدەن باسقارماسىنىڭ باستىعى بولىپ, كەدەن قىزمەتىنىڭ پولكوۆنيگى دارەجەسىندە زەينەت دەمالىسىنا شىقتى.
قازىر ونىڭ اتىندا وبلىستا جىل سايىن كۇرەستەن جارىستار وتكىزىلىپ تۇرادى. ول پەتروپاۆل قالاسى مەن اققايىڭ اۋدانىنىڭ قۇرمەتتى ازاماتى. «مەن قازاق كۇرەسىمەن اينالىسا باستاعان جىلداردا بۇل كۇرەس بىزدە مۇلدە دامىماعان ەدى. بىراق ماعان ونىڭ ءادىس-تاسىلدەرى سونشالىقتى جاقىن بولدى. سوندىقتان ولاردىڭ كوبىن ايناعا قاراپ وتىرىپ, وزدىگىمنەن يگەرىپ كەتتىم. سول جىلدارى العاش رەت شىمكەنتتە رەسپۋبليكالىق جارىس بولىپ, وبلىستان سوعان جالعىز ءوزىم بارىپ, ءبىرىنشى ورىن الىپ قايتقان ەدىم», دەپ ەسكە الادى باۋىرجان نياز ۇلى. ال قازىر ءبىزدىڭ وبلىستا كۇرەستىڭ وسى تۇرىمەن مىڭنان استام جاس اينالىسادى.
كەدەن قىزمەتىنە كەلگەنگە دەيىن باۋىرجان قۇلجانوۆ ىشكى ىستەر ورگاندارىندا قىزمەت ىستەگەن ەدى. جاڭا قىزمەت العاشىندا وسى ورگاننىڭ بازاسىندا قۇرىلعان. سول جىلدارى باۋكەڭ ىشكى ىستەر ورگاندارىنىڭ «دينامو» سپورت قوعامىن باسقاردى. سوندىقتان دا ونى قازىر «دينامو» سپورت قوعامى ءوزىنىڭ ارداگەرى دەپ سانايدى.
بيىل «دينامو» سپورت قوعامىنىڭ رەسپۋبليكالىق ورتالىق كەڭەسى دەنەشىنىقتىرۋ مەن سپورتتى ناسيحاتتاۋ ماقساتىمەن وسى تاقىرىپقا تۇسىرىلگەن باق ونىمدەرىنە بايقاۋ جاريالاعان بولاتىن. سونىڭ ىشىندە سولتۇستىك قازاقستان وبلىسى پوليتسيا دەپارتامەنتىنىڭ ءباسپاسوز قىزمەتى «سپورتسىز كۇنىم جوق» دەگەن بەينەروليك ءتۇسىرىپ, كونكۋرسقا قاتىسقان. بۇل تۇتاسىمەن «دينامونىڭ» ارداگەرى باۋىرجان قۇلجانوۆتىڭ بۇگىنگى سپورتتىق ومىرىنە ارنالعان شاعىن فيلم ەدى. ءوزىنىڭ سپورتپەن بىتە قايناسقان ءومىرى تۋرالى ايتقان قارت سپورتشىنىڭ اڭگىمەلەرى وتە تارتىمدى بولىپ, ونى الەۋمەتتىك جەلىلەردە 1700-دەن استام ادام قاراعان. ءسويتىپ, وسى شاعىن بەينەروليك رەسپۋبليكالىق كونكۋرستا ەكىنشى ورىن الىپ, ونى تۇسىرۋشىلەر مەن باستى كەيىپكەرىن عانا ەمەس, بارشا سولتۇستىكقازاقستاندىقتاردى قۋانىشقا بولەدى.
«باۋىرجان قۇلجانوۆ سولتۇستىك قازاقستان سپورتىنىڭ ەڭبەك سىڭىرگەن ارداگەرلەرىنىڭ ءبىرى», – دەيدى دشسق وبلىستىق فيليالى توراعاسىنىڭ ءبىرىنشى ورىنباسارى تالعات تۋعانباەۆ. – ول جاس كەزىندە-اق ۇلتتىق سپورت – قازاق كۇرەسىنەن سپورت شەبەرى اتاندى. كومسومول ۇيىمىندا, كەيىن پوليتسيادا جۇمىس ىستەدى, «دينامو» توراعاسىنىڭ ورىنباسارى بولدى, كەدەن قىزمەتىنىڭ پولكوۆنيگى شەنىندە زەينەتكە شىقتى. بايقاۋ جاريالانعان كەزدە ءبىز ويلانباستان بەينەروليكتىڭ كەيىپكەرى بولۋعا باۋىرجان نيازۇلىن تاڭدادىق. «سپورتسىز كۇنىم جوق» قاعيداسىن ول ءوز بويىنا سىڭىرگەن ادام. ول بارلىق ۋاقىتتا دا جاتتىعۋدى تاستاعان ەمەس. قازىردىڭ وزىندە اۋا رايىنىڭ قولايسىزدىعىنا دا قاراماستان جۇگىرۋمەن اينالىسىپ, كوشەدەگى ترەناجەرلەردىڭ جانىنان توقتاماي وتە المايدى».
باۋىرجان قۇلجانوۆ ءوز ۇيىندە سولتۇستىك قازاقستان سپورتىنىڭ ناعىز جەكە مۇراجايىن جيناقتادى. «سپورت مەنىڭ قانىمدا بار جانە بۇل بەكەر ايتىلعان ءسوز ەمەس», دەيدى ءوزى.
جاقىندا وعان رەسپۋبليكالىق كونكۋرستىڭ قورىتىندىسى بويىنشا بەرىلگەن «دينامو» دشسق ورتالىق كوميتەتىنىڭ II دارەجەلى ديپلومى تاپسىرىلدى. جۇلدە وبلىستىق پوليتسيا دەپارتامەنتىنىڭ اپپاراتتىق جينالىسىندا تاپسىرىلدى. دەپارتامەنت باستىعى, پوليتسيا پولكوۆنيگى مارات تولەباەۆ سپورتتى كەڭىنەن ناسيحاتتاۋعا قوسقان ۇلەسى ءۇشىن بەينەروليكتى جاساعان «دينامو» دشسق سقوف باس مامانى گالينا سكورىح پەن سقو پد ىشكى جانە سىرتقى كوممۋنيكاتسيالار ءبولىمىنىڭ باس مامانى ەرلان ماحمەتوۆكە دە العىس حاتتار تاپسىردى.
سولتۇستىك قازاقستان وبلىسى
