اگروونەركاسىپ كەشەنىن دامىتۋعا ارنالعان قۇجاتتار
دەپۋتاتتار باستاماشى بولعان «استىق تۋرالى» قازاقستان رەسپۋبليكاسىنىڭ زاڭىنا تولىقتىرۋلار ەنگىزۋ تۋرالى» زاڭ جوباسى تابيعي جانە تەحنوگەندىك سيپاتتاعى توتەنشە جاعدايلار تۋىنداعان, توتەنشە جاعداي ەنگىزىلگەن كەزدە ەلدى ازىق-ت ۇلىك استىعىمەن كەپىلدى تۇردە قامتاماسىز ەتۋ, سونداي-اق «ازىق-ت ۇلىك كەلىسىمشارت كورپوراتسياسى» ۇلتتىق كومپانياسى» اق-نىڭ مارتەبەسى مەن ءرولىن زاڭنامالىق تۇرعىدان ايقىنداۋ ماقساتىندا ازىرلەندى.
قۇجاتقا ەنگىزىلەتىن تۇزەتۋلەردە استىقتىڭ تۇراقتى جۇمىس ىستەيتىن رەزەرۆ قورىن قالىپتاستىرۋ ارقىلى ەلدىڭ ازىق-ت ۇلىك قاۋىپسىزدىگىن قامتاماسىز ەتۋ دەڭگەيىن ارتتىرۋ, سونىڭ ناتيجەسى رەتىندە ىشكى استىق نارىعىن تۇراقتاندىرۋعا مۇمكىندىك بەرۋ قاراستىرىلعان. زاڭ جوباسى جونىندە بايانداما جاساعان ءماجىلىس دەپۋتاتى سەرگەي زۆولسكيدىڭ ايتۋىنشا, استىقتىڭ رەزەرۆ قورىن ساقتاۋعا رەسپۋبليكالىق بيۋدجەتتەن شامامەن 2,4 ملرد تەڭگە مولشەرىندە قاراجات كەرەك.
بۇدان باسقا, زاڭ جوباسىندا ۇسىنىلىپ وتىرعان جاڭالىقتار مال شارۋاشىلىعى مەن قۇس شارۋاشىلىعى سالالارىنا ارنالعان جەم-ءشوپ بازاسىن دامىتۋعا, سونداي-اق تۇقىمدىق جانە جەمدىك قورلاردى قالىپتاستىرۋ ارقىلى جوعارى ساپالى تۇقىمدار ءوندىرىسىنىڭ كولەمىن ۇلعايتۋعا باعىتتالعان. ءماجىلىس توراعاسى نۇرلان نىعماتۋلين جيىن بارىسىندا ءسوز سويلەپ, «استىق تۋرالى» زاڭ جوباسىنىڭ ماڭىزى تۋرالى ايتىپ بەردى.
– سوڭعى كەزدە پاندەمياعا بايلانىستى كوپتەگەن مەملەكەتتەر شەكتەۋ رەجىمدەرىن ەنگىزدى. ساۋدا-ەكونوميكالىق بايلانىستار ازايدى. بۇل جاعداي, ارينە ازىق-ت ۇلىك ماسەلەسىنە دە اسەر ەتەدى. ال استىق ماسەلەسى – ءبىرىنشى كەزەكتەگى الەۋمەتتىك ماسەلە. سوندىقتان وسى زاڭ جوباسىندا قارالعان استىق قورلارىن ساقتاۋدى مەملەكەتتىك قامتاماسىز ەتۋ, وسى سالاداعى وپەراتوردىڭ مارتەبەسىن انىقتاۋ تۋرالى نورمالار وتە ماڭىزدى, بۇگىن وتە كەرەك, – دەدى ن.نىعماتۋلين.
سونىمەن قاتار وتىرىستا دەپۋتاتتار ۆەتەريناريا ماسەلەلەرى بويىنشا زاڭ جوباسىن ءبىرىنشى وقىلىمدا ماقۇلدادى. ءماجىلىس دەپۋتاتى رومان كيمنىڭ ايتۋىنشا, زاڭ جوباسىمەن ەكى زاڭنامالىق اكتىگە – «قازاقستان رەسپۋبليكاسىنداعى كەدەندىك رەتتەۋ تۋرالى» كودەكسكە جانە «ۆەتەريناريا تۋرالى» زاڭعا وزگەرىستەر مەن تولىقتىرۋلار ەنگىزىلىپ وتىر.
زاڭ جوباسى ارقىلى ۆەتەرينارلىق پاسپورتتى ەلەكتروندى فورماتتا بەرۋ بويىنشا مەملەكەتتىك قىزمەت كورسەتۋ مۇمكىندىگى ىسكە اسىرىلادى. كورسەتىلەتىن قىزمەتتى اۆتوماتتاندىرۋ بۇرىن قاعاز فورماتتا دايىنداۋعا جىبەرىلەتىن بيۋدجەت قاراجاتىن ۇنەمدەۋگە مۇمكىندىك بەرەدى, ادامي فاكتوردىڭ اسەرىن جويادى, وسى قۇجاتتى بەرۋدى جەڭىلدەتەدى جانە الۋدى تەزدەتەدى.
سونىمەن قاتار سىبايلاس جەمقورلىق قۇقىق بۇزۋشىلىق جاساۋدىڭ العىشارتتارىن بارىنشا ازايتۋ ماقساتىندا زاڭ جوباسىندا مەملەكەتتىك ۆەتەرينارلىق-سانيتارلىق ينسپەكتورلارعا مەملەكەتتىك ۆەتەرينارلىق-سانيتارلىق باقىلاۋ جانە قاداعالاۋ جۇرگىزۋ كەزىندە فوتو جانە بەينەتۇسىرىلىمدى جۇزەگە اسىرۋعا, سونداي-اق تەحنيكالىق قۇرالداردى (جابدىقتاردى, اسپاپتاردى, ولشەۋ قۇرالدارىن, قۇرىلعىلار مەن قۇرالداردى) پايدالانۋعا قۇقىق بەرۋ ۇسىنىلۋدا. بۇدان باسقا, كەدەن زاڭناماسىنا وزگەرىستەر كوزدەلىپ وتىر.
سوعان سايكەس ەۋرازيالىق ەكونوميكالىق وداقتىڭ كەدەندىك شەكاراسىندا مەملەكەتتىك باقىلاۋ مەن قاداعالاۋدى جۇزەگە اسىراتىن كەدەن ورگاندارى مەن مەملەكەتتىك ۆەتەرينارلىق-سانيتارلىق ينسپەكتورلار مەن وسىمدىكتەر كارانتينى جونىندەگى مەملەكەتتىك ينسپەكتورلاردىڭ ءوزارا ءىس-قيمىل جاساۋ ءتارتىبى قارجى جانە اۋىل شارۋاشىلىعى سالالارى مينيسترلەرىنىڭ بىرلەسكەن اكتىسى ارقىلى ايقىندالادى.
اگروونەركاسىبىن دامىتۋعا باعىتتالعان زاڭ جوبالارىنىڭ قاتارىندا «ماقتا سالاسىن دامىتۋ تۋرالى» قازاقستان رەسپۋبليكاسى زاڭىنىڭ كۇشى جويىلدى دەپ تانۋ جانە قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
زاڭ قولدانىستا بولعان 13 جىل ىشىندە ماقتا قولحاتىن ماقتا وڭدەۋ ۇيىمدارى بىردە-ءبىر رەت بەرمەگەن ءارى بانكتەر كەپىلدىك قامتاماسىز ەتۋ رەتىندە بىردە-ءبىر رەت قابىلداماعان. وسى سەبەپتەن زاڭنامادا كوزدەلگەن ماقتا قولحاتتارىن قامتاماسىز ەتۋ جونىندەگى جۇيە سالانىڭ سۋبەكتىلەرى اراسىنداعى كەدەرگى كەلتىرىپ وتىر. ال بۇل ءوز كەزەگىندە سالادان ينۆەستيتسيالار مەن اقشا قاراجاتىنىڭ كەتۋىنە جانە ونىڭ بارلىق نەگىزگى كورسەتكىشتەرىنىڭ تومەندەۋىنە الىپ كەلەدى.
سالانىڭ توقىراۋىن تۋعىزاتىن پروبلەمالار ماقتا وسىرۋشىلەردىڭ, ۋاكىلەتتى مەملەكەتتىك ورگانداردىڭ, جەرگىلىكتى مەملەكەتتىك ورگانداردىڭ وكىلدەرى مەن پارلامەنت دەپۋتاتتارىنىڭ قاتىسۋىمەن ءارتۇرلى ديالوگ الاڭدارىندا بىرنەشە رەت تالقىلاندى. بارلىق دەرلىك مۇددەلى تاراپتار سالانىڭ تارتىمدى بولماۋى ونىڭ شامادان تىس ءارى ءتيىمسىز رەتتەلۋىنەن تۋىنداپ وتىر دەگەن پىكىرگە توقتادى.
وسىعان بايلانىستى, سالاداعى پروبلەمالاردى زاڭنامالىق تۇرعىدان شەشۋ ماقساتىندا پارلامەنت دەپۋتاتتارى وسى زاڭ جوباسىن ازىرلەدى. وندا ءبىر مەزگىلدە قولدانىستاعى زاڭنامانىڭ نورمالارىنا ءتيىستى وزگەرىستەر ەنگىزە وتىرىپ, سالالىق زاڭنىڭ كۇشىن جويۋ ارقىلى ماقتا قولحاتتارى جۇيەسىن قايتا رەتتەۋ ۇسىنىلادى. سونىمەن قاتار ماقتا قولحاتتارىن شىعارا وتىرىپ, قويما قىزمەتى بويىنشا قىزمەتتەر كورسەتۋ جونىندەگى ماقتا وڭدەۋ ۇيىمدارىنىڭ قىزمەتىن ليتسەنزيالاۋ الىپ تاستالادى.
ىندەتپەن كۇرەسۋگە قاجەت قاراجات
بۇدان بولەك, جالپى وتىرىستا دەپۋتاتتار بىرقاتار راتيفيكاتسيالىق زاڭ جوبالارىن ماقۇلدادى. ولار – قازاقستان مەن ازيا دامۋ بانكى اراسىنداعى قارىز تۋرالى كەلىسىمدەر (COVID-19-عا قارسى كۇرەس جونىندەگى بەلسەندى شارالار مەن شىعىستاردى قولداۋ باعدارلاماسى). اتالعان قۇجات جونىندە بايانداما جاساعان قارجى ءمينيسترى ەرۇلان جاماۋباەۆتىڭ ايتۋىنشا, پرەزيدەنتتىڭ 2020 جىلعى 13 تامىزداعى جارلىعىنا سايكەس, ازيا دامۋ بانكىنەن 908 ملن 596 مىڭ ەۋرو قارىز الىنادى.
– قارىز 2021 جىلعا ارنالعان بيۋدجەت تاپشىلىعىن قارجىلاندىرۋعا باعىتتالادى. بۇل قازاقستان رەسپۋبليكاسى ۇكىمەتىنىڭ Covid-19 پاندەمياسىنىڭ سالدارىمەن كۇرەس جانە ەكونوميكانى قالپىنا كەلتىرۋ جونىندەگى شارالارىن قولداۋعا مۇمكىندىك بەرەدى.
وتەۋ مەرزىمىنە قاتىستى قارىز ەكى بولىككە بولىنگەن. قارىزدىڭ ءبىر بولىگى – 454 ملن 298 مىڭ ەۋرو, ياعني جارتىسى 3 جىلدىق جەڭىلدىك كەزەڭدى قوسا العاندا, 10 جىل مەرزىمگە بەرىلەدى. قالعان 454 ملن 298 مىڭ ەۋرو سوماسىنداعى ەكىنشى جارتىسى 3 جىلدىق جەڭىلدىك كەزەڭدى قوسا العاندا, 5 جىل مەرزىمگە بەرىلەدى, – دەدى ە.جاماۋباەۆ.
ۆەدومستۆو باسشىنىڭ سوزىنە سۇيەنسەك, قارىزدى وتەۋ رەسپۋبليكالىق بيۋدجەت قاراجاتى ەسەبiنەن جۇزەگە اسىرىلماق. كورسەتىلگەن قاراجاتتى تارتۋ بيۋدجەتتىڭ بەكىتىلگەن تاپشىلىعى جاعدايىندا اسا قاجەت.
جالپى وتىرىستا «قازاقستان رەسپۋبليكاسى مەن ازيا ينفراقۇرىلىمدىق ينۆەستيتسيالار بانكى اراسىنداعى قارىز تۋرالى كەلىسىمدى (COVID-19-عا قارسى كۇرەس جونىندەگى بەلسەندى ءىس-شارالار مەن شىعىستاردى قولداۋ باعدارلاماسى) راتيفيكاتسيالاۋ تۋرالى» قازاقستان رەسپۋبليكاسى زاڭىنىڭ جوباسى تالقىلاندى.
قارجى ءمينيسترى ە.جاماۋباەۆتىڭ سوزىنە قاراعاندا, پرەزيدەنتتىڭ 2020 جىلعى 13 تامىزداعى جارلىعىنا سايكەس, قازاقستان رەسپۋبليكاسى مەن ازيا ينفراقۇرىلىمدىق ينۆەستيتسيالار بانكى اراسىنداعى قارىز تۋرالى كەلىسىمگە قول قويىلعان. ونىڭ سوماسى 661 ملن 800 مىڭ ەۋرونى قۇرايدى.
– قارىز 2021 جىلعا ارنالعان بيۋدجەت تاپشىلىعىن قارجىلاندىرۋعا باعىتتالادى. ياعني Covid-19 پاندەمياسىنىڭ سالدارىنا قارسى كۇرەس جانە ەكونوميكانى قالپىنا كەلتىرۋ بويىنشا قازاقستان رەسپۋبليكاسى ۇكىمەتىنىڭ ءىس-شارالارىن قولداۋعا مۇمكىندىك بەرەدى. قارىز 3 جىلدىق جەڭىلدىكتى كەزەڭدى قوسا العاندا, 10 جىل وتەۋ مەرزىمىنە بەرىلەدى. سىياقى مولشەرلەمەسى ‒ ەۋريبور+0,50%.
كەلىسىمدە بەلگiلەنگەن قارجىلىق شارتتارعا سايكەس قارىزعا قىزمەت كورسەتۋدى جانە ونى وتەۋدى رەسپۋبليكالىق بيۋدجەت قاراجاتى ەسەبiنەن جۇزەگە اسىرىلادى. كورسەتىلگەن قاراجاتتى تارتۋ بيۋدجەتتىڭ بەكىتىلگەن تاپشىلىعى جاعدايىندا وتە ماڭىزدى. بۇل قاراجات ازيا ينفراقۇرىلىمدىق ينۆەستيتسيالار بانكىنىڭ پاندەمياعا قارسى كۇرەس جونىندەگى ارنايى باعدارلاماسى شەڭبەرىندە قازاقستان رەسپۋبليكاسى ءۇشىن 2020 جىلعا رەزەرۆتەلگەن, – دەدى ە.جاماۋباەۆ.
سونداي-اق راتيفيكاتسيالانعان قۇجاتتار قاتارىندا ەركىن ساۋدا ايماعىن قۇرۋ تۋرالى كەلىسىمگە قاتىسۋشى مەملەكەتتەردىڭ اراسىندا تاسىمالداناتىن تاۋارلاردى كەدەندىك رەسىمدەۋدىڭ جانە كەدەندىك باقىلاۋدىڭ ءتارتىبى تۋرالى كەلىسىمگە وزگەرىستەر ەنگىزۋ تۋرالى حاتتاما بار.
اتالعان قۇجات جونىندە دە قارجى ءمينيسترى ەرۇلان جاماۋباەۆ بايانداما جاسادى. ۆەدومستۆو باسشىسىنىڭ ايتۋىنشا, زاڭ جوباسىن راتيفيكاتسيالاۋ تاۋارلاردى كەدەندىك رەسىمدەۋ جانە كەدەندىك باقىلاۋ تارتىبىنە تۇجىرىمدامالىق وزگەرىستەر ەنگىزۋدى كوزدەمەيدى. حاتتاما تمد-عا قاتىسۋشى مەملەكەتتەر اراسىندا ىنتىماقتاستىقتى كەڭەيتۋگە جانە تەرەڭدەتۋگە, ىقپالداسۋعا جانە ءوزارا كومەك كورسەتۋگە باعىتتالعان.
– حاتتاماعا 2019 جىلعى 31 مامىردا اشحاباد قالاسىندا تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ پرەمەر-مينيسترلەرى قول قويدى. 2011 جىلعى 18 قازاندا سانكت-پەتەربۋرگتە تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ جاڭا ەركىن ساۋدا ايماعى تۋرالى شارتقا قول قويىلعاننان كەيىن زاڭ جوباسىن ازىرلەۋ قاجەتتىگى تۋىندادى. ونىڭ كۇشىنە ەنۋىنە بايلانىستى بىرقاتار حالىقارالىق شارتتار, ونىڭ ىشىندە 1994 جىلعى 15 ساۋىردەگى ەركىن ساۋدا ايماعىن قۇرۋ تۋرالى كەلىسىم توقتاتىلدى. سوندىقتان جوعارىدا كورسەتىلگەن شارتقا سايكەس كەلتىرۋ ماقساتىندا قاتىسۋشى مەملەكەتتەردىڭ اراسىندا تاسىمالداناتىن تاۋارلاردى كەدەندىك رەسىمدەۋدىڭ جانە كەدەندىك باقىلاۋدىڭ ءتارتىبى تۋرالى كەلىسىمنىڭ كىرىسپەسىنە وزگەرىس ەنگىزىلەدى.
ەكىنشىدەن, جوعارىدا كورسەتىلگەن شارتقا سايكەس كەلتىرۋ جانە بىرىڭعاي «تاۋەلسىز مەملەكەتتەر دوستاستىعىندا تاۋارلاردىڭ شىعارىلعان ەلىن ايقىنداۋ ەرەجەسىن» بەلگىلەۋ ماقساتىندا كەلىسىمنىڭ 2-بابى 2009 جىلعى 20 قاراشاداعى اتاۋى وسىنداي ەرەجەگە سىلتەمەمەن تولىقتىرىلدى.
ۇشىنشىدەن, كەلىسىمنىڭ 6-بابى جاڭا رەداكتسيادا جازىلدى. ونىڭ ءمانى – قاجەت بولعان جاعدايدا تاۋەلسىز مەملەكەتتەر دوستاستىعىنا قاتىسۋشى مەملەكەت وتكىزۋ پۋنكتتەرىندە بىرلەسكەن كەدەندىك باقىلاۋدى جانە كەدەندىك وپەراتسيالاردى جۇزەگە اسىرۋ ءۇشىن جاعداي جاساپ بەرەدى. بۇل تاۋارلاردىڭ ءوتۋىن جەدەلدەتۋگە مۇمكىندىك بەرەدى جانە كەدەن ورگانداردىڭ باقىلاۋ ۋاقىتىن قىسقارتادى, – دەدى مينيستر.
سەنات ەنگىزگەن تۇزەتۋ قابىلداندى
جالپى وتىرىستا ءماجىلىس ەكىنشى وقىلىمدا «قازاقستان رەسپۋبليكاسىنىڭ ۇكىمەتى تۋرالى» جانە مەملەكەت باسشىسىنىڭ جولداۋىندا جەكەلەگەن ەرەجەلەرىن ىسكە اسىرۋ ماسەلەسىنە قاتىستى زاڭ جوبالارىن ماقۇلدادى.
وسى قۇجاتتار تۋرالى بايانداما جاساعان دەپۋتات سنەجاننا يماشەۆانىڭ ايتۋىنشا, زاڭ جوباسى مەملەكەت باسشىسىنىڭ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىنىڭ جەكەلەگەن ەرەجەلەرىن ىسكە اسىرۋعا باعىتتالعان.
– زاڭ جوباسىندا لاۋازىمدارى قىسقارتىلاتىن جاۋاپتى حاتشىلاردىڭ مىندەتتەرىن اپپارات باسشىلارىنا جۇكتەۋ; باس بوستاندىعىنان ايىرۋ مەرزىمدەرىن ۇلعايتۋدى, جازانى وتەۋ رەجىمىن كۇشەيتۋدى, زاڭدا كوزدەلگەننەن اناعۇرلىم جەڭىل جازانى قولدانۋ قۇقىعىن, سونداي-اق جازانى وتەۋ كەزەڭىندە ونى جەڭىلدەتۋ قۇقىعىن الىپ تاستاۋدى جانە باسقالارىن قوسا العاندا, كامەلەتكە تولماعاندارعا قاتىستى سەكسۋالدىق سيپاتتاعى قىلمىستار ءۇشىن جازانى قاتاڭداتۋ; كۆازيمەملەكەتتىك سەكتور قىزمەتكەرلەرىندە قوس ازاماتتىق انىقتالعان كەزدە ولارعا قاتىستى شارا قولدانۋ; سۇيىتىلعان مۇناي گازى ساۋداسىن ەلەكتروندى ساۋدا الاڭدارىنا كوشىرۋ مەرزىمدەرىن ۇزارتۋ ۇسىنىلادى. زاڭ جوباسىن تالقىلاۋ كەزىندە دەپۋتاتتار قۇقىقتىق كولليزيالاردى بولعىزباۋعا باعىتتالعان بىرقاتار وزگەرىستەر مەن تولىقتىرۋلار ەنگىزدى. سونىمەن قاتار زاڭ جوباسىنىڭ نورمالارىن ءبىر-بىرىنە جانە قازاقستان رەسپۋبليكاسىنىڭ زاڭناماسىنا سايكەس كەلتىرۋ ماقساتىندا زاڭ جوباسىنىڭ بۇكىل ءماتىنى بويىنشا رەداكتسيالىق, ناقتىلاۋشى سيپاتتاعى تۇزەتۋلەر ەنگىزىلدى, – دەدى س.يماشەۆا.
دەپۋتاتتىڭ سوزىنە سۇيەنسەك, ءماجىلىس كوميتەتتەرى زاڭ جوباسى بويىنشا وڭ قورىتىندىلارىن بەرگەن. وسىلاردى ەسكەرە كەلە, س.يماشەۆا زاڭ جوباسىن ەكىنشى وقىلىمدا ماقۇلداپ, ونى قازاقستان رەسپۋبليكاسى پارلامەنتى سەناتىنىڭ قاراۋىنا جىبەرۋدى ۇسىندى.
سونداي-اق دەپۋتاتتار جىلجىمايتىن م ۇلىككە قۇقىقتاردى جانە زاڭدى تۇلعالاردى مەملەكەتتىك تىركەۋ جانە ەكونوميكالىق ءوسۋدى قالپىنا كەلتىرۋ مەن ورتالىق جانە جەرگىلىكتى مەملەكەتتىك ورگاندار اراسىندا اۋىزسۋمەن جابدىقتاۋدى سۋبسيديالاۋ جونىندەگى وكىلەتتىكتەردىڭ اراجىگىن اجىراتۋ ماسەلەلەرىنە قاتىستى زاڭ جوبالارىن ەكىنشى وقىلىمدا ماقۇلدادى. سونىمەن قاتار قىلمىستىق جانە قىلمىستىق-پروتسەستىك كودەكستەرىنە قىلمىستىق پروتسەستە ازاماتتاردىڭ قۇقىقتارىن قورعاۋدى كۇشەيتۋ جانە كەدەندىك رەتتەۋ تۋرالى زاڭ جوبالارى دا ەكىنشى وقىلىمدا ماقۇلداندى.
ءماجىلىستىڭ جالپى وتىرىسىندا دەپۋتاتتار سالىق كودەكسى مەن «2021 – 2023 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنا سەنات ەنگىزگەن وزگەرىستەر مەن تولىقتىرۋلاردى قارادى.
وسى قۇجاتقا قاتىستى بايانداما جاساعان ءماجىلىس دەپۋتاتى تاتيانا ياكوۆلەۆا سەنات زاڭ جوباسىنا 39 تۇزەتۋ ەنگىزگەنىن اتاپ ءوتتى. تۇزەتۋلەر زاڭ جوباسىنىڭ ماتىنىنە ەنگىزىلەتىن وزگەرىستەر مەن تولىقتىرۋلارعا (3 تۇزەتۋ) جانە رەسپۋبليكالىق بيۋدجەتتىڭ شىعىس بولىگىنە ەنگىزىلگەن وزگەرىستەرگە (36 تۇزەتۋ) بايلانىستى. ءماجىلىس دەپۋتاتتارى اتالعان تولىقتىرۋلاردى قولدادى.
– سەنات ەنگىزگەن تۇزەتۋلەر 2021 – 2023 جىلدارعا ارنالعان رەسپۋبليكالىق بيۋدجەتتىڭ نەگىزگى پارامەترلەرىن وزگەرتپەيدى. جوعارىدا ايتىلعانداردى ەسكەرە وتىرىپ, قارجى جانە بيۋدجەت كوميتەتى «2021 – 2023 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنا پارلامەنت سەناتى ەنگىزگەن وزگەرىستەرمەن جانە تولىقتىرۋلارمەن كەلىسۋدى ۇسىنادى, – دەدى ت. ياكوۆلەۆا.
سونداي-اق پالاتا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىمەن جۇمىستى جالعاستىرۋ جونىندە بەيىندى كوميتەتتىڭ ۇسىنىسىمەن كەلىستى.
جالپى وتىرىستا ءماجىلىس ء«ولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» زاڭ جوباسى بويىنشا قورىتىندى ازىرلەۋ ءۇشىن پالاتانىڭ حالىقارالىق ىستەر, قورعانىس جانە قاۋىپسىزدىك كوميتەتىنە جاڭا راتيفيكاتسيالىق زاڭ جوباسى بويىنشا قورىتىندى دايىنداۋ مەرزىمىن تاعايىندادى.
– ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قازاقستان رەسپۋبليكاسىنىڭ ەسكەرتپەسىمەن 2020 جىلعى 23 قىركۇيەكتە نيۋ-يورك قالاسىندا قول قويىلعان. حاتتاما ەلىمىزدە ءولىم جازاسىن جويۋ جونىندەگى حالىقارالىق مىندەتتەمەلەردى قابىلداۋىنا باعىتتالعان. ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتى زاڭ جوباسى بويىنشا 2021 جىلدىڭ 23 ماۋسىمعا دەيىنگى مەرزىمدە قورىتىندى ازىرلەۋگە دايىن, – دەدى وسى ماسەلە جونىندە بايانداما جاساعان دەپۋتات مۇحتار ەرمان.
وتىرىس سوڭىندا ءماجىلىس دەپۋتاتتارى مەملەكەتتىك ورگاندار باسشىلارىنا ءوز ساۋالدارىن جولدادى.
