فورۋمدا ەكولوگيا, ىشكى تۋريزم, ازاماتتاردىڭ قۇقىقتارى مەن قازاق مادەنيەتىنىڭ قۇندىلىقتارى كەڭىنەن قامتىلدى. اتالعان ماسەلەلەرگە بايلانىستى 50 ۇكىمەتتىك ەمەس ۇيىم وكىلدەرىنە «تاڭ», «اقپارات», «ادامگەرشىلىك» قوعامدىق قورلارى جانە «ەلسانا» رۋحانيات كلۋبىنىڭ جەتەكشىلەرى شىنار ىزتىلەۋوۆا, گۇلجان ەلەشوۆا, سالتانات راحيموۆا مەن نۇرجان ەرمۇحانوۆ ساراپتامالىق ديالوگ الاڭىن وتكىزدى.
وبلىس اكىمىنىڭ ورىنباسارى باقىتگۇل حامەنوۆانىڭ ايتۋىنشا, ۇەۇ وكىلدەرى ۇكىمەت پەن قوعامدى بايلانىستىراتىن التىن كوپىر بولۋى كەرەك.
– مەملەكەت باسشىسىنىڭ قازاقستان حالقىنا جولداۋىندا بيلىك پەن قوعام اراسىنداعى تۇراقتى ديالوگتى ورناتۋ ءۇشىن «حالىق ۇنىنە قۇلاق اساتىن مەملەكەت» تۇجىرىمداماسىنا باسا ءمان بەرىلدى. وسىعان وراي جەرگىلىكتى اتقارۋشى ورگانداردىڭ باسشىلارى ۇكىمەتتىك ەمەس ۇيىمدار وكىلدەرىمەن تۇراقتى كەزدەسۋلەر وتكىزىلۋدە. بۇل فورۋمعا قوعامدىق ۇيىمداردىڭ ۇزدىك الەۋمەتتىك ماڭىزدى جوبالارى مەن باستامالارىنا قولداۋ كورسەتۋ ماقساتىندا شەتەلدىك جانە وتاندىق كاسىپورىندار قاتىسىپ وتىر, – دەدى باقىتگۇل حامەنوۆا.
ۇكىمەتتىك ەمەس ۇيىمدار اراسىندا قوعامعا پايدالى ءىس اتقارىپ جۇرگەنى بار. ماسەلەن, «ينكليۋزيا بولاشاق اتىراۋ» قوعامدىق بىرلەستىگى ەرەكشە بالالارعا ارنالعان ينكليۋزيۆتى قولداۋ سىنىبىن اشىپ, ولاردىڭ ءبىلىم الۋىنا جول اشىپ وتىر. ال ء«مولدىر كوز» قوعامدىق بىرلەستىگى زاعيپ جانداردى ءبىر ورتالىققا جيناپ, «جارتىلاي فابريكاتتالعان ونىمدەر» تسەحىن اشتى. قازىر تسەحتا 20 ادام جۇمىسپەن قامتىلدى. «مەن بارمىن!» قوعامدىق قورى داۋن سيندرومى بار بالالارعا بي ۇيرەتەدى. «اينالايىن بالادان» قوعامدىق قورى ماقات كەنتىندە 20 بالانى كاسىپتىڭ قىر-سىرىنا ۇيرەتۋ ءۇشىن تەگىن ءدارىس وتكىزۋدە.
وبلىس اكىمىنىڭ ورىنباسارى باقىتگۇل حامەنوۆا التى ۇەۇ وكىلىنە «حالىق العىسى» مەدالىن تابىستادى. سونداي-اق ون ءتورت ۇەۇ وكىلى وبلىس اكىمىنىڭ العىس حاتىن يەلەندى.
اتىراۋ وبلىسى
