قوعام • 24 قاراشا، 2020

"دارىن" سىيلىعىنىڭ لاۋرەاتتارى انىقتالدى

71 رەت كورسەتىلدى

قر ۇكىمەتىنىڭ قاۋلىسىنا سايكەس 2020 جىلعى "دارىن" مەملەكەتتىك جاستار سىيلىعىنىڭ يەگەرلەرى بەلگىلى بولدى، دەپ حابارلايدى Egemen.kz

اتالعان سىيلىق جەمىستى عىلىمي، شىعارماشىلىق، قوعامدىق قىزمەتى مەن جوعارى سپورتتىق جەتىستىكتەرى ءۇشىن بەرىلەدى.

"ەسترادا" نوميناتسياسى بويىنشا سىيلىق ت.ق. جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى ءداريا وڭالعازىقىزى بولسانبەك جانە بەكسۇلتان تالعات ۇلى كەنىشقاليەۆكە بەرىلدى.

"كلاسسيكالىق مۋزىكا" اتالىمىندا قازاق ۇلتتىق ونەر ۋنيۆەرسيتەتىنىڭ وقىتۋشىسى قالقامان باعدات ۇلى دۇيسەمباەۆ جانە اتالعان ۋنيۆەرسيتەت ستۋدەنتى جىبەك قاناتقىزى مۇسىرعاليەۆا ۇزدىك دەپ تانىلدى.

"حالىق شىعارماشىلىعى" نوميناتسياسى بويىنشا قر مادەنيەت جانە سپورت مينيسترلىگىنىڭ "قازاقكونتسەرت" مەملەكەتتىك كونتسەرتتىك ۇيىمى" رمك ءسوليسى مۇقيات اسقار جانە قىزىلوردا وبلىستىق فيلارمونياسى كمك ءارتىسى كۇنسۇلۋ تۇرىكپەنقىزى تۇرىكپەن ماراپاتتالدى.

"ادەبيەت" نوميناتسياسى بويىنشا "ادەبيەت پورتالى" ينتەرنەت جوباسىنىڭ قىزمەتكەرى ارمان ماناربەك ۇلى شەريزاتوۆ توپ جاردى.

"تەاتر جانە كينو" نوميناتسياسى بويىنشا ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرى ءابىلمانسۇر ءابدىناسىر ۇلى سەرىكوۆ جانە حاديشا بوكەەۆا اتىنداعى وبلىستىق قازاق دراما تەاترىنىڭ اكتەرى جاسقايرات ءسابيت ۇلى ۆاليۋلليەۆ جەڭىمپاز اتاندى.

"سپورت" اتالىمىندا قر ۇلتتىق وليمپيادا كوميتەتىنىڭ فريستايل بويىنشا نۇسقاۋشى-سپورتشىسى يۋليا ەۆگەنەۆنا گالىشەۆا جانە جەڭىل اتلەتيكا جانە پاۋەرليفتينگ بويىنشا پاراليمپيادالىق سپورتشى، "TSG contruction" جشس وندىرىستىك-تەحنيكالىق ءبولىمى ينجەنەرىنىڭ كومەكشىسى جىگەر مالىك ۇلى كەنجەعاليەۆ جۇلدە الدى.

"ديزاين جانە بەينەلەۋ ونەرى" نوميناتسياسى بويىنشا زەرگەر، قازاقستان قولونەرشىلەر وداعىنىڭ مۇشەسى ارداق وتانعالي ۇلى ابىشەۆ جانە "Zeken Moda" جشس باس ديزاينەرى اقبوتا جولداسبەكقىزى توقتاسىنوۆا وزا شاپتى.

"جۋرناليستيكا" نوميناتسياسى بويىنشا "حابار" اگەنتتىگى" اق "حابار 24" تەلەارناسىنىڭ ءجۋرناليسى راۋان ەرۇزاق ۇلى مىڭباەۆ جانە "قازاقستان" رەسپۋبليكالىق تەلەراديوكورپوراتسياسى" اق ماڭعىستاۋ وبلىستىق فيليالىنىڭ جەتەكشى رەداكتورى اسەم باقىتقىزى سارتباەۆا يەگەرى اتاندى.

"قوعامدىق قىزمەت" نوميناتسياسى بويىنشا قازاقستان حالقى اسسامبلەياسى "جاڭعىرۋ جولى" رەسپۋبليكالىق جاستار قوزعالىسىنىڭ توراعاسى سپوتكاي ماكسيم الەكساندروۆيچ جانە "قازاقستان جاستارىنىڭ كونگرەسى" قاۋىمداستىعى زتب اتقارۋشى ديرەكتورى توقتار كوممۋنار ۇلى بولىسوۆ ماراپات الدى.

"عىلىم" نوميناتسياسى جۇلدەسىن قر ءبىلىم جانە عىلىم مينيسترلىگى "م.ءا. ايتقوجين اتىنداعى مولەكۋليارلىق بيولوگيا جانە بيوحيميا ينستيتۋتى" شجق رمك عىلىمي قىزمەتكەرى جۇسىپبەك ەركىن ۇلى مۇقاتاەۆ جانە "نازارباەۆ ۋنيۆەرسيتەتى" دەربەس ءبىلىم بەرۋ ۇيىمىنىڭ دوكتورانتى اسەم نۇرجانقىزى ءاشىموۆا يەلەندى.

سوڭعى جاڭالىقتار

ىندەت جۇقتىرعاندار سانى كوبەيدى

كوروناۆيرۋس • بۇگىن، 13:58

سەمەيگە جاڭا اكىم تاعايىندالدى

تاعايىنداۋ • بۇگىن، 11:57

الماتىدا 10 كىتاپحانا جاڭارتىلدى

ايماقتار • بۇگىن، 10:47

قازاقستان «قىزىل» ايماققا كىردى

قازاقستان • بۇگىن، 09:30

ۇقساس جاڭالىقتار