ەكونوميكا • 24 قاراشا، 2020

شوب نەسيەلەرىنە سۇرانىس ارتىپ كەلەدى

14 رەت كورسەتىلدى

قۇب قارجىلىق تۇراقتىلىق جانە زەرتتەۋلەر دەپارتامەنتى ديرەكتورىنىڭ ورىنباسارى ولجاس كۋبەنباەۆ بۇگىن ونلاين كونفەرەنتسيا بارىسىندا  شوب وكىلدەرى تاراپىنان سۇرانىس ارتىپ كەلە جاتقانىن ايتىپ،  2020 جىلعى III توقسانعا ارنالعان نەسيە بەرۋ ماسەلەلەرى بويىنشا بانكتەر اراسىندا جۇرگىزىلگەن ساۋالنامانىڭ ناتيجەلەرىمەن تانىستىردى، دەپ حابارلايدى Egemen.kz  ۇلتتىق بانكتىڭ ءباسپاسوز قىزمەتىنە سىلتەمە جاساپ.

ولجاس كۋبەنباەۆ بيزنەس-سۇرانىستىڭ تازا پايىزدىق وزگەرىسى (NPI) 2020 جىلدىڭ ءۇشىنشى توقسانىندا 34% قۇراعانىن، كارانتيندىك شارالاردىڭ السىرەۋى اياسىندا ەكونوميكانىڭ زارداپ شەككەن سەكتورلارىنا جاتاتىن كەيبىر كاسىپكەرلەر ءوز قىزمەتىن بىرتىندەپ قالپىنا كەلتىرىپ، نەسيە بويىنشا تولەمدەردى قايتا باستاعانىن دا ايتىپ ءوتتى.  

بانكتەردىڭ مالىمەتتەرى بويىنشا، نەسيەلەندىرۋگە سۇرانىستىڭ ءوسۋى 2020 جىلدىڭ ءۇشىنشى توقسانىندا نەگىزىنەن شوب تاراپىنان كەيىنگە قالدىرىلعان سۇرانىسقا، سونداي-اق مەملەكەتتىك باعدارلامالاردى ىسكە اسىرۋعا بايلانىستى بولدى. شاعىن جانە ورتا بيزنەستەگى نەسيەگە سۇرانىستىڭ SIP كورسەتكىشتەرى سايكەسىنشە 41% جانە 38% قۇرادى. سونىمەن قاتار، جەكەلەگەن بانكتەردىڭ ءونىم جەلىسىنىڭ كەڭەيۋى شاعىن كاسىپكەرلىك سۋبەكتىلەرىنەن كەلىپ تۇسەتىن وتىنىشتەر سانىنىڭ 10 ەسەگە وسۋىنە اكەلدى، ال نەسيەنىڭ ورتاشا مولشەرى تومەندەدى

«ياعني سۇرانىستىڭ ءوسۋى بايقالدى، بىراق كولەمدە ەمەس»، - دەپ اتاپ ءوتتى ولجاس كۋبەنباەۆ.

نەسيەلەر بويىنشا پايىزدىق مولشەرلەمەلەر جانە بانكتەردىڭ بيزنەسكە نەسيە بەرۋگە دايىندىق دەڭگەيى سول دەڭگەيدە قالدى. بىرقاتار بانكتەر كەپىلگە جانە قارىز الۋشىنىڭ قارجىلىق جاعدايىنا قويىلاتىن تالاپتاردى كوتەردى. «تالاپتاردىڭ جوعارىلاۋىنا سەبەپ بولعان نەگىزگى فاكتور بانكتەر ەكونوميكانىڭ جەكەلەگەن سالالارىندا تاۋەكەلدەر ءپروفيلىنىڭ ناشارلاۋىن قاراستىرادى»، - دەپ ءتۇسىندىردى ول.

رەسپوندەنتتەردىڭ پىكىرىنشە، كەلەسى توقساندا ورتا جانە ءىرى بيزنەس سۋبەكتىلەرىنىڭ نەسيەلەندىرۋگە سۇرانىسى وزگەرمەيدى دەپ كۇتىلۋدە. سونىمەن قاتار، جەكەلەگەن بانكتەردىڭ جاڭا بانكتىك ونىمدەردى شىعارۋى شاعىن كاسىپكەرلىك سۋبەكتىلەرىنىڭ سۇرانىسىنا وڭ اسەر ەتۋى مۇمكىن.

«جەكە تۇلعالارعا نەسيە بەرۋگە كەلەتىن بولساق، 2020 جىلدىڭ ءۇشىنشى توقسانىندا بولشەك نەسيەگە سۇرانىس بارلىق سەگمەنتتەردە دە ءوستى. كوپتەگەن سالالاردا جۇمىسپەن قامتۋدى قالپىنا كەلتىرۋ كەزىندە يپوتەكالىق جانە تۇتىنۋشىلىق نەسيەلەر الۋعا وتىنىشتەر سانى ارتتى. بانكتەردىڭ پىكىرى بويىنشا ەكىنشى توقساندا يپوتەكالىق نەسيەلەندىرۋگە سۇرانىس ارتتى، بۇعان جىلجىمايتىن م ۇلىك نارىعىنىڭ دامۋ پەرسپەكتيۆالارى جانە مەملەكەتتىك باعدارلامالار شەڭبەرىندە بەرىلەتىن نەسيەلەردىڭ بولۋى اسەر ەتتى»، - دەدى ولجاس كۋبەنباەۆ.

وتكەن توقسانمەن سالىستىرعاندا يپوتەكالىق نەسيەلەندىرۋگە كەلىپ تۇسكەن وتىنىشتەر سانى 85% ءوستى. كەپىلسىز نەسيەلەندىرۋ سەگمەنتىندە وتىنىمدەر سانى 52% ءوستى. جەڭىلدەتىلگەن اۆتونەسيەلەر باعدارلاماسى بويىنشا قاراجاتتى يگەرۋ اياسىندا اۆتونەسيەگە سۇرانىستىڭ ءوسۋى بايقالدى، وتىنىشتەردىڭ سانى 109% ءوستى، نەسيەلەردىڭ ورتاشا مولشەرى ازداپ تومەندەدى.

«جوعارىدا اتالعان فاكتورلاردان باسقا بانك وكىلدەرى كليەنتتەردىڭ نەسيەگە دەگەن قىزىعۋشىلىعىنىڭ جوعارىلاۋىن كارانتيندىك شارالار كەزەڭىندە كەيىنگە قالدىرىلعان سۇرانىستىڭ ورىندالۋىمەن، سونداي-اق ماركەتينگتىك كامپانيالارمەن تۇسىندىرەدى»، - دەدى ول. 2020 جىلدىڭ 4-توقسانىندا بانكتەر بولشەك نەسيەلەندىرۋدىڭ بارلىق سەگمەنتتەرى بويىنشا سۇرانىستىڭ شامالى ءوسۋىن كۇتەدى. بانكتەردىڭ تۇتىنۋشىلىق نەسيە بەرۋگە دايىندىعى دا شامالى ارتادى. تۇتىنۋشىلىق نەسيەلەۋ شارتتارى نەسيەلىك ليميت جانە كليەنتتىڭ تولەم قابىلەتتىلىگىنە قويىلاتىن تالاپتار تۇرعىسىنان جۇمسارادى.

ساۋالناماعا ەكىنشى دەڭگەيلى 24 بانك قاتىستى.

سوڭعى جاڭالىقتار

ۇقساس جاڭالىقتار