ايماقتار • 24 قاراشا، 2020

پاترۋلدىك پوليتسيا جولدا قالىپ قويعان جۇرگىزۋشىگە كومەكتەستى

38 رەت كورسەتىلدى

پاترۋلدىك پوليتسيانى جۇرگىزۋشىلەر تەك تەكسەرۋدى بىلەتىن، تەكسەرسە ءبىر ۇساق-تۇيەككە بولا جولدان قالدىرىپ، حاتتاما تولتىراتىن مازاسىز قىزمەت دەپ بىلەدى. سوندىقتان ولاردىڭ قارا جولدىڭ بويىندا كەزدەسپەگەنىن قالايدى. ال ولاردىڭ كومەك قولىن سوزىپ، قيىندىقتان قۇتقاراتىن ساتتەرى دە بولاتىنىن بىلە بەرمەيدى، دەپ حابارلايدى Egemen.kz.

جۋىردا سقو پاترۋلدىك پوليتسياسى سونداي كومەكتىڭ ءبىرىن جاساپ، شىمكەنتتىك جۇرگىزۋشىلەردى ريزا قىلدى. بۇل تۋرالى شىمكەنتتىك اعايىندار وزدەرى بەينەكورىنىسپەن سقو پد جەتكىزىپ، العىستارىن ايتقان. وقيعا بىلاي بولعان: تۇركىستان وبلىسىنىڭ ءبىر شارۋاشىلىعىنا سقو جامبىل اۋدانىنداعى ورتالىق اۋىلىنان مال العان ەكى جۇك ماشيناسىنىڭ ءبىرىنىڭ دوڭگەلەگى جارىلىپ جولدا قالادى. بۇل ۋاقىتتا قاراڭعى تۇسكەن، دالادا 13 گرادۋس اياز. تاجىريبەسى از جۇك ماشيناسىنىڭ جۇقا كيىنگەن جۇرگىزۋشىسى ءارى توڭىپ، ءارى ەبى كەلمەي قينالىپ جاتقاندا جانىنا پاترۋلدىك پوليتسيا توقتاي قالادى. جەتپەگەنى وسىلار ەدى دەپ قينالعان جىگىتكە پاترۋلدىك پوليتسەيلەر ءامىرجان توققوجين مەن قانات تەڭىزباەۆ كومەك قولىن سوزىپ، دوڭگەلەكتەرىن اۋىستىرىپ بەرەدى. بۇلاردىڭ ەكەۋى دە مۇندايدى كوپ كورگەن تاجىريبەلى جىگىتتەر ەكەن. ءسويتىپ الىس جولدان كەلگەن جۇرگىزۋشى ابدەن ريزا بولىپ كەتەدى.

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار