قوعام • 24 قاراشا، 2020

ءبىر جوباعا ەكى رەت تاپسىرىس بەرىلدى

9 رەت كورسەتىلدى

ورال اۋەجايىنىڭ بۇعان دەيىنگى عيماراتى سوناۋ جەتپىسىنشى جىلداردىڭ اياق كەزىندە سول كەزدەگى وبلىس باسشىسى، بەلگىلى مەملەكەت جانە قوعام قايراتكەرى مۇستاحيم ىقسانوۆتىڭ تىكەلەي قولداۋىمەن سالىنعان ەدى. سودان بەرى قىرىق جىلدان استام ۋاقىت ءوتىپتى. ەگەر دەر كەزىندە وعان كۇردەلى جوندەۋ جۇرگىزىلسە، ەسكى اۋەجايدىڭ الەۋەتى مەن مۇمكىندىگىن ءالى دە پايدالانا بەرۋگە بولار ما ەدى. الايدا اۋەجايدىڭ ۇشۋ جولاعى قايتا توسەلگەنىمەن، ونىڭ سىرتقى جانە ىشكى قاباتتارىن جاڭعىرتۋ ءىسى ەسكەرۋسىز قالا بەردى.

ەشتەن دە كەش جاقسى دەگەندەي، بىلتىر شىلدە ايىندا ورال اۋەجايىن قالپىنا كەلتىرۋ جۇمىستارى باستالعان كەزدە باتىسقازاقستاندىق اۋە كولىگىنىڭ جاناشىرلارى «ە، باسە!» دەپ ءبىر سەرپىلىپ قالعان ەدى. بۇل ءىستى قولعا العاندار اۋەجاي عيماراتىنىڭ نەگىزگى قاڭقاسى مەن ىرگەتاسىن قالدىرىپ، جاڭعىرتۋ جۇمىستارىن جۇرگىزۋدى ءجون كورىپتى. ەندىگى كەزەكتە جوبا قالاي جالعاسىن تابار ەكەن دەپ جۇرگەندە ونىڭ بۇگىنگى گەودەزيالىق تالاپتار مەن نورماتيۆتەرگە مۇلدەم سايكەس كەلمەيتىنى انىقتالدى. باستاپقى جۇمىستارعا ءتيىستى تەكسەرۋلەر جۇرگىزگەن ارنايى مامانداندىرىلعان كاسىپ­ورىن­نىڭ ساراپشى ماماندارى وسىن­داي قورىتىندىعا كەلدى. سوعان سايكەس بۇعان دەيىنگى قال­پىنا كەلتىرۋ جۇمىستارى شۇعىل توقتاتىلادى. ءسوز جوق، وسىن­داي ءۇستىرت جۇمىستىڭ، سالاقتىق­تىڭ سال­دارىنان ءبىراز قاراجات زايا كەتىپ، جەلگە ۇشقانىنا شەك كەلتىرۋ قيىن-اق.

ءسويتىپ، بيىلعى 2020 جىل­دىڭ باسىندا اۋەجاي قۇرىلى­سى­نا قايتادان تاپسىرىس بەرۋ­گە تۋرا كەلدى. مۇندا ەڭ الدى­­مەن ىشكى لوگيستيكالىق جۇيە­لەردى جە­تىل­دىرۋگە باسا نازار اۋدا­رىل­عانىن ايتتى باتىس قازاقستان وب­لى­سىنىڭ اكىمى عالي ەسقاليەۆ پرەزيدەنت جانىنداعى ورتالىق كوم­مۋنيكاتسيالار قىزمەتى الا­ڭىندا وتكەن بريفينگتە باق وكىل­دەرى ساۋالىنا وراي قايتارعان جاۋا­بىندا. وبلىس باسشىسىنىڭ اي­تۋىنشا جاڭا جوبا بويىنشا قول­عا الىنعان جولاۋشىلاردىڭ ۇشاق سالونىنا دەيىن جەتۋىنە مۇم­كىن­دىك بەرەتىن تەلەتراپ قايتا­دان تاپسىرىس بەرىلگەن جوبانىڭ باستى ارتىقشىلىعى بولماق.

سونىمەن بىرگە كەيىنگى جوبا­نىڭ 3000 شارشى مەترگە دە­يىن كەڭەيتىلىپ جاسالعانى دا ونى حالىقارالىق اۋەجايعا قويى­لا­تىن ستاندارتتار مەن كريتەريلەرگە ءبىرتابان جاقىنداتا تۇسەدى. مۇندا ديزاين توڭىرەگىن­دەگى ماسەلەلەر دە مۇقيات ويلاس­تىرىلعانى اۋەجايدىڭ جاڭا كەيىپكە ەنەتىنىنە كەپىلدىك بەرە الادى دەۋگە بولادى.

قازىرگى كۇنى بۇگىنگى اڭگىمە ار­قاۋىنا اينالىپ وتىرعان ورال اۋە­جايىن جاساقتاۋ جونىندەگى جاڭا جوباعا تاپسىرىس بەرۋشى باتىس قازاقستان وبلىستىق اكىم­دىگى تاراپىنان مەملەكەتتىك ساراپ­تاماعا جىبەرىلگەن. جەرگىلىكتى اتقارۋ ورگاندارى جەتەكشىلەرىنىڭ مالىمدەۋىنە سۇيەنسەك، ونى قۇپ­تاعان جاۋاپ جىل اياعىنا دەيىن كەلەدى دەپ كۇتىلۋدە.

ەگەر وسى بولجام ناقتى شىن­دىق­قا اينالسا اۋەجاي قۇرىلىسىن ال­داعى 2021 جىلدىڭ باسىندا باس­­تاپ كەتۋگە تولىق نەگىز بار دەپ تۇ­جى­رىم جاساۋدىڭ ءجونى بار. قال­پىنا كەلتىرۋ جۇمىستارى بەل­­گى­­لەنگەن ۋاقىتتا باستالعان جاع­­­داي­دا ونى 2021 جىلدىڭ جەل­توق­سان ايىنا دەيىن اياقتاۋ كوزدەل­گەن. ال ازىرگە ونىڭ تۋماعان تۋ سيىر­دىڭ سارى ۋىزىنا ۇقساپ تۇر­عا­نى­مەن ەرىكسىز كەلىسۋگە تۋرا كەلەدى.

ال بۇگىنگى كەزدە ورالدان ىشكى رەيستەر بويىنشا ۇشاتىن جولاۋ­­شىلارعا ۋاقىتشا تەرمينالدار­دا قىزمەت كورسەتۋ جولدارى قاراس­تىرىلعان. بۇعان قوسا جولاۋشىلاردى قارسى الۋشىلار مەن شى­عارىپ سالۋشىلار ءۇشىن ارنايى ۆاگون­دار قويىلعان.

پرەمەر-ءمينيستردىڭ ورىنباسارى رومان سكليار باتىس قازاق­ستان وبلىسىنا جاساعان جۇ­مىس ساپارىندا الداعى ۋاقىتتا قول­عا الىناتىن جوبانىڭ جاي-كۇيى­نە كوڭىل اۋدارعانىن دا ايتا كەت­كەنى­مىز ءجون. ۆيتسە-پرەمەرگە جەر­گىلىكتى بيلىك وكىلدەرى تاراپىنان تومەندەگىدەي دەرەكتەر بەرىلدى. قۇنى 6،8 ملرد تەڭگەنى قۇرايتىن قازىرگى جوبانى «كپو بۆ» كومپانياسى قارجىلاندىراتىنى جانە جاڭعىرتۋ جۇمىستارى ناتي­جەسىندە تەرمينالدىڭ اۋماعى 4،5 تەن 6،5 مىڭ شارشى مەترگە دەيىن ۇلعاياتىنى ايتىلدى. بۇعان قوسا ءبىر ساعاتتا وتەتىن جولاۋشىلار سانى 200-دەن 400-گە دەيىن ارتپاق. ءسوز جوق، مۇنىڭ ءبارى ءجون اڭگىمە. ايتسە دە وسى تۇستا كوڭىل­دى كۇپتى قىلىپ جۇرگەن تاعى ءبىر باستى ماسەلە جونىندە وي-پىكىر قوزعاۋدىڭ رەتى كەلىپ تۇر. بۇل اڭگىمە ورال اۋەجايىنىڭ حالىقارالىق دەپ ايتىلىپ جۇر­گەن اتاۋىنان تۋىندايدى. ارينە ونى بۇلايشا اسقاقتاتا ايتۋدىڭ ەشقانداي ايىبى جوق، تەك ءاربىر ءسوز ءوزىنىڭ اتى مەن زاتىنا سايكەس كەلگەنى ءجون ەمەس پە؟ ايتالىق سوڭعى جىلدارى ورال اۋەجايىنان الىس شەتەلدەردى بىلاي قويعان­دا، تاياۋ شەتەلدەرگە، ياعني تمد اۋماعىنداعى قالالارعا، سونىڭ ىشىندە ىرگەدەگى رەسەيدىڭ استاناسى ماسكەۋگە بىردە-ءبىر رەيس ۇشپاعان بولسا، ونى حالىقارالىق دەپ دامىتۋدىڭ قانداي قاجەتى بار؟

وسى ورايدا حالىقارالىق دەپ اتالاتىن اقتاۋ جانە اقتوبە اۋەجا­يىندا بولعانىمىزدا مۇن­دا سىرتقى رەيستەردىڭ سونشاما كوپ­تىگىنە ءارى جيىلىگىنە تاڭ-تاماشا قالعانىمىز بار. سون­داي-اق وسى وڭىرلەردەگى باسشىلار Air Astana ۇلتتىق اۋە­كوم­­پانياسىمەن ءوزارا كەلىسىم-شارت جا­ساسىپ، ۇشاقپەن ۇشقىسى كەلە­­تىن ءوڭىردىڭ قاراپايىم تۇر­عىندارىنا قولجەتىمدى باعامەن بيلەت ۇسىنىپ وتىرعانى دا جىلى اسەر قالدىرعان ەدى.

وسىنداي ءۇردىس پەن تاجىريبەنى باتىس قازاقستان وبلىسىنداعى اتقارۋى ورگان جەتەكشىلەرى دە ىسكە اسىراتىن بولسا، بۇل جاعىمدى ءجايت ءوڭىر تۇرعىندارى ءۇشىن جاسال­عان الەۋمەتتىك-تۇرمىستىق تۇرعى­داعى قولداۋدىڭ تاعى ءبىر تۇت­قاسى بولىپ شاعار ما ەدى دەگەن وي كەلەدى. قالاي دەگەندە دە الداعى ۋاقىتتا ورال اۋەجا­يى قۇرىلىسى بوي كوتەرگەن كەزدە ونىڭ حالىقارالىق دەپ اتال­عان اتاۋى مەن مارتەبەسى ساق­تا­لىپ قالا بەرەتىنى انىق. ەن­دەشە جوعارىدا ايتىلعانداي ونىڭ سوعان سايكەس ءىس-قيمىل تانىت­قانىنا نە جەتسىن؟ بۇل ماسەلەنى رەتتەۋدىڭ باستى جولى ەلىمىزدىڭ باتىستاعى قاقپاسى ىسپەتتەس ورال اۋەجايىنان حالىقارالىق ماڭىزى بار جاڭا رەيستەر اشۋ ەكەنى تالاس تۋعىزبايتىن ماسەلە.

 

 

ورال

 

سوڭعى جاڭالىقتار

ۇقساس جاڭالىقتار