نياز سۇندەتاليەۆتىڭ ءوزى قازان ايىنان بەرى وبلىس اكىمى جەڭىس قاسىمبەكتىڭ شتاتتان تىس كەڭەسشىسى قىزمەتىن اتقارىپ كەلەدى.
– وبلىس باسشىسىنىڭ ەڭ وزەكتى جانە پارمەندى ۇسىنىستارىنىڭ ءبىرى – قاراعاندى وبلىسىنىڭ قالالارى مەن اۋداندارىندا مۇگەدەكتىگى بار ادامدار ماسەلەلەرى بويىنشا شتاتتان تىس كەڭەسشىلەردى تاعايىنداۋ تۋرالى شەشىم بولدى. بۇل دەگەنىڭىز – قۇرعاق ءسوز بەن ەسەپ بەرە سالۋ ءۇشىن جاسالعان نارسە ەمەس. ءبىزدىڭ وبلىستا مۇگەدەكتىگى بار ادامدار تۇرعىلىقتى جەرلەرىنە قاراماستان, وزدەرىنە كومەكتەسە الاتىن ادامنىڭ تەلەفون ءنومىرىن ءبىلۋى كەرەك, – دەيدى بەلسەندى جاس.
بۇگىندە مۇگەدەكتىگى بار بەلسەندى ازاماتتاردىڭ, ۇكىمەتتىك ەمەس ۇيىمداردىڭ جانە اكىمدەردىڭ ۇسىنىسى بويىنشا تاعايىندالعان كەڭەسشىلەر ءوز مىندەتتەرىن اتقارۋعا كىرىسىپ كەتكەن. مۇنداعى ماڭىزدى شارۋانىڭ ءبىرى – مۇمكىندىگى شەكتەۋلى ادامداردىڭ ماسەلەلەرىمەن اينالىساتىن مەملەكەتتىك ورگانداردىڭ, ۇكىمەتتىك ەمەس ۇيىمداردىڭ باسشىلارى, بەلسەندى ازاماتتار مەن كەڭەسشىلەردىڭ وزدەرى باس قوساتىن جەرلەردە ۇنقاتىسۋ الاڭدارىن قۇرا ءبىلۋ كەرەك. ال جەرگىلىكتى كەڭەسشىلەردىڭ ءوز جۇمىستارى تۋرالى ەسەپ بەرۋگە مىندەتتىلىگى بۇل قىزمەتتىڭ جاۋاپكەرشىلىگىن ارتتىرا تۇسەدى.
قازىرگى ۋاقىتتا كەڭەسشىلەر تۇرعىندارعا الەۋمەتتىك قىزمەتتەر پورتالدىڭ قالاي جۇمىس ىستەيتىنىن جانە ونىڭ نە ءۇشىن كەرەك ەكەنىن ءتۇسىندىرۋ سىندى ماڭىزدى شارۋانى قولعا العان. ويتكەنى مۇگەدەكتىگى بار ادام وڭالتۋدىڭ تەحنيكالىق قۇرالدارىنا, جەكە كومەكشىنىڭ, ىمداۋ ءتىلى ماماندارىنىڭ قىزمەتتەرىنە جانە ساناتوري-كۋرورتتىق ەمدەلۋگە وسى الەۋمەتتىك پورتال ارقىلى عانا تىكەلەي تاپسىرىس بەرە الادى.
جالپى, شتاتتان تىس كەڭەسشىلەردىڭ باستى مىندەتى – قوردالانعان جانە تۋىنداعان ماسەلەلەردى تەزىرەك شەشۋگە ىقپال ەتۋ. مۇمكىندىگى شەكتەۋلى جاندارعا قاتىستى جەرگىلىكتى جەرلەردەگى پروبلەمالار شەشىمىن تاپپاي جاتسا, بۇل ءىستى تىندىرۋ ءۇشىن ءوڭىر باسشىسى جەتەكشىلىك ەتەتىن ۇيلەستىرۋ كەڭەسى كومەككە كەلەدى. ال ۇكىمەت دەڭگەيىندەگى شاعىن جۇمىس توبى زاڭنامالىق سيپاتتاعى, نورماتيۆتىك-قۇقىقتىق اكتىلەردىڭ, سونداي-اق مينيسترلىكتەردىڭ جۇمىسىنا قاتىستى پروبلەمالارمەن شۇعىلدانادى. وسى ورايدا ن.سۇندەتاليەۆتىڭ ۇكىمەت جانىنداعى ۇيلەستىرۋ كەڭەسىنىڭ مۇشەسى ەكەنىن دە ايتا كەتكەن ءلازىم.
شتاتتان تىس كەڭەسشىلەر – جۇيەلى تۇردە جوسپارلانعان ۇلكەن جۇمىستىڭ باسى عانا. مىسالى, قاراعاندى وڭىرىندە مۇمكىندىگى شەكتەۋلى جانداردىڭ ءومىر ءسۇرۋ ساپاسىن جاقسارتۋ ءۇشىن باعدارلامالار ازىرلەنىپ, ارنايى الەۋمەتتىك قىزمەتتەر كورسەتىلىپ جاتقانى بەلگىلى. دەگەنمەن اقپاراتتى جەتكىزۋ جاعىنان ولقىلىقتار بار. ال ن.سۇندەتاليەۆتىڭ ءوزى شتاتتان تىس كەڭەسشىلەر مۇگەدەكتىگى بار ادامدار مەن مەملەكەتتىك ورگاندار اراسىنداعى «التىن كوپىرگە» اينالۋى ءتيىس دەپ سانايدى.
– بۇگىندە ءبىزدىڭ وبلىستىڭ بارلىق كەڭەسشىسى اقپارات الماساتىن, سۇراقتار قوياتىن, الەۋمەتتىك ساياسات سالاسىنداعى جاڭالىقتاردى تالقىلايتىن ورتاق چات قۇرىلدى. ءبىزدىڭ وبلىس قازاقستاننىڭ وڭىرلەرىنە ۇلگى بولادى دەپ ۇمىتتەنەمىن. مۇگەدەكتىگى بار ءاربىر ادام كەڭەسشىنى جاقسى تانۋى ءوز الدىنا, وعان كەز كەلگەن ماسەلەمەن تىكەلەي جۇگىنە الادى, – دەيدى ن.سۇندەتاليەۆ.
قازىرگى تاڭدا قاراعاندى وبلىسىندا بارلىعى 67 510 مۇگەدەك بار ەكەن. شىنتۋايتىنا كەلگەندە, مۇمكىندىگى شەكتەۋلى وسى جانداردىڭ ماڭدايىنا سوققى بولىپ ءتيىپ جۇرگەن ماسەلە از ەمەس. قوعامدى كەڭ جايلاعان مۇنداي كوكەيكەستى پروبلەمالاردى شەشۋ ءۇشىن كەشەندى تۇردە قاراستىرىلاتىن قادامدار كەرەك. ال ن.سۇندەتاليەۆ سىندى نيەتى وڭ كەڭەسشىلەردىڭ بۇل ىسكە قۇلشىنا كىرىسۋى قامكوڭىل جاندارعا قانات ءبىتىرىپ, ولاردىڭ ەرتەڭگى كۇن بۇگىنگىگە قاراعاندا جاقسىراق بولۋى ءتيىس دەگەن سەنىمدەرىن ارتتىرا تۇسەدى.
قاراعاندى
