«وكم وپەراتورى» جشس مالىمەتىنە سۇيەنسەك, ءتورت جىل ىشىندە توزىعى جەتكەن تەحنيكالاردى وتكىزگەن قازاقستاندىقتارعا 14 ملرد تەڭگەدەن استام قارجى تولەنگەن.
سەرتيفيكات باعدارلاماسى بويىنشا 54 635 اۆتوكولىك قابىلدانعان. ناتيجەسىندە, وتاندىق وندىرۋشىلەردەن 28 141 سۋ جاڭا اۆتوكولىك ساتىپ الىندى.
اتاپ وتەرلىگى, بيىل ەسكى كولىكتى تاپسىرعاندارعا بەرىلەتىن وتەماقى كولەمى ايلىق ەسەپتىك كورسەتكىشكە بايلانىستى ءوسىرىلدى. ماۋسىم ايىنان باستاپ جەڭىل كولىك تاپسىرعاندارعا بەرىلەتىن وتەماقى 150 مىڭنان 200 مىڭ تەڭگەگە (72 اەك) دەيىن ۇلعايدى.
2020 جىلدىڭ 2 قاراشاسىنان باستاپ «وكم وپەراتورى» جشس توزىعى جەتكەن اۋىلشارۋاشىلىق تەحنيكاسىن قايتا وڭدەۋگە قابىلداۋدىڭ قاناتقاقتى باعدارلاماسىن ىسكە قوستى. باعدارلاما اياسىندا اگروتەحنيكانى تاپسىرۋشىلارعا 560 مىڭنان 2 ملن تەڭگە ارالىعىنداعى جەڭىلدىك سەرتيفيكاتىن بەرۋدى باستادى.
جاڭا باعدارلاما ىسكە قوسىلعاننان بەرى 47 اۋىلشارۋاشىلىق تەحنيكاسى قابىلداندى. ونىڭ 33-ءى – تراكتور, 14-ءى – كومباين. جىل سوڭىنا دەيىن اۋىلشارۋاشىلىق تەحنيكاسىن قابىلداۋعا 120 كۆوتا (100 تراكتور جانە 20 كومباين) قاراستىرىلعان.
ەسكى كولىكتەردى جويۋ باعدارلاماسى بويىنشا ايماقتاردان جينالعان ماشينالار قاراعاندى وبلىسىنداعى زاۋىتقا جەتكىزىلەدى. ىستەن شىققان كولىك قۇرالدارى سول جەردە قايتا وڭدەلەدى. قازىرگى تاڭدا زاۋىت 146 705 كولىكتى قايتا وڭدەدى.
