كورمەنىڭ اشىلۋىندا ءسوز العان ۇلتتىق مۋزەيدىڭ ديرەكتورى ارىستانبەك مۇحامەدي ۇلى: «ۇلتتىق مۋزەي تاريحي وقيعالاردى زەرتتەۋدە ءبىر عانا ەجەلگى نەمەسە ورتاعاسىرلار كەزەڭىمەن شەكتەلىپ قالمايدى. ءبىز ءۇشىن جاڭا زاماندا ورىن العان وقيعالار دا وتە ماڭىزدى. بۇعان فاشيستىك گەرمانيانىڭ ءىس-ارەكەتىن ايىپتاعان نيۋرنبەرگ پروتسەسىنىڭ باستالۋىنىڭ 75 جىلدىعىنا وراي ۇيىمداستىرىلىپ وتىرعان بۇگىنگى كورمەمىز دالەل بولادى», دەدى.
شارا بارىسىندا رەسەي تاريحي قوعامى باسقارماسىنىڭ توراعاسى, «يستوريا وتەچەستۆا» قورىنىڭ اتقارۋشى ديرەكتورى كونستانتين موگيلەۆسكي, قازاقستانداعى رەسەي ىنتىماقتاستىق وكىلدىگىنىڭ باسشىسى الەكسەي كوروپچەنكو, ءبىلىم جانە عىلىم مينيسترلىگى مەملەكەت تاريحى ينستيتۋتى ديرەكتورىنىڭ ورىنباسارى, تاريح عىلىمدارىنىڭ دوكتورى بۇركىتباي اياعان ءسوز سويلەپ, نيۋرنبەرگ پروتسەسىنىڭ تاريحي ماڭىزىن اشىپ كورسەتتى.
كورمە گيتلەرلىك ءفاشيزمنىڭ قىلمىسىن ايىپتاعان جانە ەكىنشى دۇنيەجۇزىلىك سوعىستىڭ نۇكتەسىن قويعان الەمدىك تاريحتاعى العاشقى حالىقارالىق اسكەري تريبۋنال تۋرالى سىر شەرتەدى. ءتۇرلى تاريحي دەرەكتەرمەن قاتار كورمەدە نيۋرنبەرگ پروتسەسىنىڭ تىكەلەي قاتىسۋشىسى, كيەۆتىك ارسەني كۋدرياۆتسەۆتىڭ جەكە مۇراعاتىنان الىنعان ەرەكشە فوتوسۋرەتتەر مەن قۇجاتتار ەكسپوزيتسيالاندى.
