ۇقك شەكارا اكادەمياسىنىڭ ءباسپاسوز حاتشىسى جانات جابىربەكوۆتىڭ ايتۋىنشا, كۋرسانتتار بيىل اقپان ايىنىڭ سوڭىندا وتكەن اشىق تۋرنيردە شەبەرلىك دارەجەسىن تاعايىنداۋ تالاپتارىن ويداعىداي ورىنداعان. بىراق ەلىمىزدە ىندەت تارالىپ, كارانتين رەجىمىنە بايلانىستى اتالعان ءىس-شارانىڭ قورىتىندىسى كەيىنگە شەگەرىلگەن.
مما فەدەراتسياسىنىڭ جۇمىس جوسپارىنا سايكەس 22-23 اقپان ارالىعىندا الماتى قالاسىنداعى «مەدينا» سپورت كەشەنىنىڭ بازاسىندا «اراشي-كاراتە-ميكس-كومبات» ارالاس جەكپە-جەكتەن رەسپۋبليكالىق اشىق تۋرنير وتكەن. بايراقتى باسەكەگە 27 سپورت كلۋبىنان ءار سالماق دارەجەسى بويىنشا 350-دەن اسا جەكپە-جەك ونەرىنىڭ قىراندارى قاتىسقان بولاتىن. جارىس قورىتىندىسى بويىنشا ۇقك شەكارا اكادەمياسىنىڭ كۋرسانتتارى جۇلدەلى ورىندارعا يە بولدى. سونداي-اق سپورتتىڭ «اراشي-كاراتە» تۇرىنەن «سپورت شەبەرى» اتاعىن يەلەندى. ولار – شاكارىم ابەن, ارحات ايسانوۆ, نۇربەك مانازاروۆ, ەراسىل مۋكاشەۆ, بەكزات نۇرعازينوۆ, داۆلەت قاناتبەكوۆ. بۇعان قوسا بىرقاتار كۋرسانتقا «سپورت شەبەرىنە ۇمىتكەر» اتاعى بەرىلدى.
سونىمەن قاتار قويان-قولتىق ۇرىستان ەلىمىزدىڭ ەڭبەك سىڭىرگەن سپورت شەبەرى, قر ۇقك شەكارا اكادەمياسى ارنايى-تاكتيكالىق فاكۋلتەتى دەنە شىنىقتىرۋ دايىندىعى كافەدراسىنىڭ وقىتۋشىسى كاپيتان بەرىك شىناليەۆكە جوعارى دارەجەلى سپورتشىلاردى دايىنداعانى جانە سپورتتى دامىتقانى ءۇشىن «اراشي-كاراتە» جاتتىقتىرۋشىسى اتاعى بەرىلدى.
جاقىندا جارىسقا قاتىسقان جوعارىداعى شەكاراشى كۋرسانتتارعا «سپورت شەبەرى» جانە «سپورت شەبەرىنە ۇمىتكەر» اتاعىن ايقىندايتىن ارنايى كۋالىك دايىندالىپ, وقۋ ورنىنىڭ مەكەنجايىنا جولدانعان ەكەن. وسىعان وراي ۇقك شەكارا اكادەمياسىندا ۇقك توراعاسىنىڭ ورىنباسارى گەنەرال-مايور مارات قالقاباەۆتىڭ قاتىسۋىمەن سالتاناتتى ءىس-شارا ۇيىمداستىرىلدى. شارا بارىسىندا شەكاراشى سپورتشىلار «سپورت شەبەرىنە ۇمىتكەر» كۋالىگىن الدى.
