قازاقستان رەسپۋبليكاسى پرەزيدەنتىنىڭ ءارحيۆى وڭىرلىك ارحيۆتەرمەن سەرىكتەستىك قارىم-قاتىناس ورناتۋ ماسەلەسىنە ۇنەمى ءجىتى كوڭىل ءبولىپ كەلەدى. 2017 جىلدان باستاپ جەرگىلىكتى جەرلەردەگى ارحيۆ مەكەمەلەرىمەن بىرلەسكەن عىلىمي-زەرتتەۋلەردى جۇرگىزۋ, تاريحي-قۇجاتتىق كورمەلەردى دايىنداۋ, دوڭگەلەك ۇستەلدەردى ۇيىمداستىرۋ, تاجىريبە الماسۋ جانە تاعى باسقا جوبالاردى جۇزەگە اسىرۋدى قامتيتىن «قازاقستان رەسپۋبليكاسى پرەزيدەنتى ءارحيۆىنىڭ وڭىرلەردەگى كۇندەرى» شارالار كەشەنى وتكىزىلۋدە. مۇنداي شارالاردىڭ ۇيىمداستىرىلۋى قازاقستان رەسپۋبليكاسى ۇلتتىق ارحيۆ قورىنىڭ قۇجاتتارىن ايگىلەپ, ناسيحاتتاۋعا جانە ارحيۆشىلەردىڭ كاسىبي ماسەلەلەردى بىرلەسە وتىرىپ شەشۋىنە دە باعىتتالعان. وتكەن جىلداردا قازاقستان رەسپۋبليكاسى پرەزيدەنتى ءارحيۆىنىڭ كۇندەرى نۇر-سۇلتان قالاسىندا, جامبىل, تۇركىستان, اتىراۋ, پاۆلودار وبلىستارىندا وتكىزىلگەن.
باتىس قازاقستان وبلىسىنداعى قازاقستان رەسپۋبليكاسى پرەزيدەنتى ءارحيۆىنىڭ كۇندەرى ەكىنشى دۇنيەجۇزىلىك سوعىستاعى جەڭىستىڭ 75 جىلدىعى اياسىندا ۇيىمداستىرىلدى. شارانى اشۋ بارىسىندا پرەزيدەنت ءارحيۆىنىڭ ديرەكتورى ءجاميلا ابدىقادىروۆا وتاندىق ارحيۆ سالاسىنىڭ الدىندا تۇرعان وزەكتى مىندەتتەرگە جانە ونىڭ دامۋ كەلەشەگىنە توقتالدى. «قازىرگى ۋاقىتتا ارحيۆ سالاسى كادرلىق الەۋەتتى ساقتاپ قالۋ جانە كۇشەيتۋ بويىنشا ءتيىستى شارالاردى قابىلداۋدى قاجەت ەتەدى. ەلىمىزدەگى ارحيۆ سالاسىندا بىلىكتى ماماندار جەتىسپەي وتىرعانىن دا جاقسى بىلەمىز. بۇعان قوسا قازىر ارحيۆ سالاسىندا جاڭا باعىتتار قالىپتاسۋدا, زاماناۋي تەحنولوگيالاردى قولدانۋ قولعا الىنىپ, جۇمىس ادىستەرى جەتىلدىرىلۋدە. بۇل ءوز كەزەگىندە كاسىبي دايىندىق پەن بىلىكتىلىكتى ارتتىرۋدىڭ جاڭا جوعارى دەڭگەيدە جۇزەگە اسىرىلۋىن قاجەت ەتەدى», دەپ اتاپ ءوتتى.
ءجاميلا ابدىقادىروۆا ءوز سوزىندە سونىمەن قاتار بيىل جەڭىستىڭ 75 جىلدىعىنا وراي ارحيۆ قىزمەتكەرلەرى تاراپىنان دايىندالىپ, باسپادان شىققان «راسسەكرەچەننايا ۆوينا: «وسوبىە پاپكي» تسك كپ (ب) كازاحستانا. 1941-1945 گگ.» قۇجاتتىق جيناعى تۋرالى دا ايتىپ ءوتتى. شاراعا ارنايى دايىندالعان تاريحي-قۇجاتتىق كورمەدە دە جوعارىدا اتالعان قازاقستان كوممۋنيستىك پارتياسى ورتالىق كوميتەتىنىڭ «ەرەكشە پاپكالارىنىڭ» قۇجاتتارى كوپشىلىك نازارىنا ۇسىنىلدى.
شارانىڭ اشىلۋىندا باتىس قازاقستان وبلىسىنىڭ اقپاراتتاندىرۋ, مەملەكەتتىك قىزمەت كورسەتۋ جانە ارحيۆتەر باسقارماسى باسشىسىنىڭ ورىنباسارى ابات اشىق جانە باتىس قازاقستان وبلىسى مەملەكەتتىك ءارحيۆىنىڭ ديرەكتورى ايجان ساۆگاباەۆا دا ءسوز سويلەدى. عالىم-زەرتتەۋشىلەر باقتىلى بورانباەۆا مەن ايبولات قۇرىمباەۆ اتالعان تاقىرىپ اياسىندا ءوز باياندامالارىن ۇسىندى.
شارانىڭ باعدارلاماسىنا سايكەس قازاقستان پرەزيدەنتى ءارحيۆىنىڭ باس ساراپشىسى اقجان يساەۆا قاتىسۋشىلارعا « ۇلى وتان سوعىسىنىڭ تاريحى بويىنشا اسا قۇندى قۇجاتتار: قازاقستان رەسپۋبليكاسى پرەزيدەنتىنىڭ ءارحيۆى مەن باتىس قازاقستان وبلىسى مەملەكەتتىك ءارحيۆىنىڭ توپتاماسىنان» تاقىرىبىنداعى تاريحي-قۇجاتتىق كورمەنى تانىستىردى.
باعدارلامادا سونىمەن قاتار «مەملەكەتتىك ارحيۆتەر جۇمىسىنىڭ نەگىزگى باعىتتارى: نورماتيۆتىك-ادىستەمەلىك بازا جانە تاجىريبە» اتتى ارحيۆ ءىسى بويىنشا سەمينار جوسپارلانعان ەدى. اتالعان سەمينار بارىسىندا پرەزيدەنت ءارحيۆىنىڭ قىزمەتكەرلەرى جانىبەك زەينەلوۆ, گاۋحار بەكىشەۆا مەن اقجان يساەۆا باتىسقازاقستاندىق ارىپتەستەرمەن ارحيۆ ءىسىنىڭ وزەكتى ماسەلەلەرى, ۆەدومستۆولىق ارحيۆتەرمەن جۇمىس, ارحيۆ قۇجاتتارىن ەسەپكە الۋ, ساقتاۋ جانە ولاردى پايدالانۋ بويىنشا تاجىريبەلەرىمەن ءبولىستى. سەمينار سوڭىندا بارلىق قاتىسۋشىلارعا سەرتيفيكاتتار تابىستالدى.
مۇحاممەد جىلگەلدينوۆ,
پرەزيدەنت ءارحيۆىنىڭ قۇجاتتاردى عىلىمي جاريالاۋ باسقارماسىنىڭ باسشىسى
