«اتا داڭقىمەن قىز وتەر, ماتا داڭقىمەن ءبوز وتەر» دەمەكشى تاڭدالعان ءۇش كانديداتتىڭ دا اكەلەرى وبلىس تۇرعىندارىنا جاقسى تانىمال جاندار ەدى. سونىڭ ىشىندە «زەنچەنكو ي ك» كوممانديتتىك سەرىكتەستىگىنىڭ قازىرگى باس ديرەكتورى گ.زەنچەنكونىڭ اكەسى ەڭبەك ەرى گ.زەنچەنكو بولسا, «سولتۇستىك» اكك اق باسقارما توراعاسى ەسجان ءورازاليننىڭ اكەسى قابي مەن دميتري كولودانىڭ اكەسى ۆلاديمير دە اۋدان اكىمى بولعان, وبلىسقا بەلگىلى ادامدار. بىراق بۇلاردىڭ ءوزى دە وبلىس حالقىنا ىسكەرلىگىمەن تانىلىپ جۇرگەن جاستار, ەلىمىز ءوز تاۋەلسىزدىگىن العان جىلداردا قالىپتاسقان تۇلعالار. ولار وزدەرىمەن تالاسقا تۇسكەن باسقا ون ۇمىتكەردەن گورى كوپ داۋىس جيناي الدى. ءومىردىڭ بارلىق سالاسى بويىنشا كوتەرىلگەن تاقىرىپتاردا ولار باسقالاردان وزىق كورىندى.
سونىمەن بىرگە وسى كونفەرەنتسيادا سولتۇستىك قازاقستان وبلىسىنىڭ ءماسليحاتىنا پارتيالىق تىزىممەن تۇسەتىن ۇمىتكەرلەردىڭ ءتىزىمى بەكىتىلدى. ولاردىڭ جالپى سانى 48 ادام بولدى. كانديداتتاردىڭ تۋرا ۇشتەن ءبىرى – ايەلدەر. سونداي-اق جاستاردىڭ ۇلەسى دە 21 پايىزعا جەتىپ وتىر. بۇرىنعى دەپۋتاتتاردىڭ اراسىنان 10 ادام عانا جاڭا قۇرامعا ەنگىزىلدى.
كاسىبي قۇرامىنا كەلەتىن بولساق, ۇمىتكەرلەردىڭ ەڭ ۇلكەن بولىگى, ياعني 27 پايىزى اۋىل شارۋاشىلىعىنان, 17 پايىزى كاسىپكەرلىكتەن, جانە 10 پايىزدان ارتىعى دەنساۋلىق ساقتاۋ سالاسىنان بولىپ وتىر.
كونفەرەنتسيادا دەلەگاتتار Nur Otan پارتياسىنىڭ ايماقتىق سايلاۋالدى باعدارلاماسىن دا بەكىتتى. وندا دامۋدىڭ جەتى باسىمدىعى ناقتىلانعان ەدى. سونىمەن بىرگە دەلەگاتتار پارتيانىڭ حح سەزىنە باراتىن دەلەگاتتاردى سايلادى جانە وبلىستىق فيليالدىڭ ساياسي كەڭەسىنىڭ جاڭا قۇرامىن بەكىتتى.
كونفەرەنتسيا بەكىتكەن جەتى باسىمدىقتىڭ اراسىندا ايماق ەكونوميكاسىنىڭ دامۋى, حالىقتىڭ ءال-اۋقاتىن ارتتىرۋ, تۇرعىندار قاۋىپسىزدىگىنىڭ ارتۋى جانە ت.ب. بار. جالپى, وبلىس بويىنشا ءبىر وبلىستىق, ءبىر قالالىق جانە 13 اۋداندىق سايلاۋالدى باعدارلاما ازىرلەنگەن.
پارتيانىڭ وبلىستىق فيليالى توراعاسىنىڭ ءبىرىنشى ورىنباسارى اسەم راحمەتوۆانىڭ ايتۋىنا قاراعاندا, مۇشەلەردەن 1150 ۇسىنىس مەن پىكىر تۇسكەن. سونىڭ ىشىندە 1088-ءى سايلاۋالدى باعدارلامالارىنا بايلانىستى. سونىڭ ىشىندە 978 ۇسىنىس سايلاۋالدى باعدارلامالارىنىڭ جوبالارىنا ەنگىزىلگەن. 19 ۇسىنىس بويىنشا شارالار قابىلدانۋدا, ال 10 ۇسىنىستىڭ شەشىمى رەسپۋبليكالىق دەڭگەيگە جاتاتىندىقتان قاراستىرىلماعان. ۇسىنىستار مەن پىكىرلەردىڭ نەگىزگى بولىگى, ياعني 34 پايىزى كولىك پەن ينفراقۇرىلىم, 25 پايىزى تۇرعىن ۇيلەر مەن ءتۇش, 8 پايىزى ءبىلىم بەرۋ سالاسىن قامتىعان.
ايتا كەتەتىن جايت, پارتيالىق كونفەرەنتسيالار بارلىق اۋداندار مەن پەتروپاۆل قالاسىنداعى فيليالداردا وتكىزىلدى. وبلىستىق پرايمەريزگە 632 پارتيا مۇشەسى قاتىسىپ, ءبىر ايدىڭ ىشىندە سايلاۋشىلارمەن 6500 كەزدەسۋ وتكىزدى. وعان شامامەن 125 مىڭداي ادام قاتىستى.
سولتۇستىك قازاقستان وبلىسى
