– ماقسات – ىشكى ىستەر ورگاندارىنىڭ ەسەبىنە الىنعان كامەلەتكە تولماعان بالالار مەن وقۋ ورىندارىنىڭ ستۋدەنتتەرى اراسىندا پروفيلاكتيكالىق جۇمىس جۇرگىزۋ. سونداي-اق زاڭعا قايشى ارەكەتتەر جاساۋعا بەيىم جاسوسپىرىمدەردى, كامەلەتكە تولماعاندار توبىن, بالالاردى قۇقىقبۇزۋشىلىقتارعا تارتاتىن ەرەسەك ادامداردى انىقتاۋ. پوليتسيا قىزمەتكەرلەرى ۇرلىق جاساعانى ءۇشىن ءبىر جىل مەرزىمگە باس بوستاندىعىنان ايىرۋ تۋرالى سوت ۇكىمىنەن جالتارىپ, ىزدەۋدە جۇرگەن 17 جاستاعى ءجاسوسپىرىمدى ۇستادى. ءۇش كۇندە اتا-انالار تاراپىنان 147 اكىمشىلىك قۇقىقبۇزۋشىلىق جاسالعانى بەلگىلى بولدى. ولاردىڭ 14-ءى اتا-انالىق مىندەتىن ورىنداماسا, بىرەۋى كامەلەتكە تولماعاندارعا الكوگولدىك ىشىمدىك ساتقان. ءبىر ءجاسوسپىرىم قوعامدىق ورىندا ماساڭ كۇيدە جۇرگەن. تۇنگى ساعات 23.00-دەن كەيىن كوشە كەزگەن 131 ءجاسوسپىرىم انىقتالدى, – دەپ ءمالىم ەتتى وبلىستىق پوليتسيا دەپارتامەنتىنىڭ ءباسپاسوز حاتشىسى گۇلنازيرا مۇحتاروۆا.
سونداي-اق پوليتسەيلەر ەسەپتە تۇرعان 92 جايسىز وتباسى مەن 44 ءجاسوسپىرىمنىڭ مەكەنجايىن تەكسەردى. ەندى بۇلاردىڭ قاتارىنا تاعى دا ءبىر ءجاسوسپىرىم مەن جايسىز التى وتباسى قوسىلىپ وتىر.
ال وبلىس اكىمىنىڭ ورىنباسارى باقىتگۇل حامەنوۆانىڭ توراعالىعىمەن وتكەن كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى وبلىستىق كوميسسيانىڭ وتىرىسىندا جاعا ۇستاتار دەرەكتەر ءمالىم بولدى. ماسەلەن, جىلىوي اۋدانىندا پوليتسيانىڭ ەسەبىندە كامەلەتكە تولماعان توعىز بالا تۇر. ءتىپتى ءبىر وتباسىنىڭ ەكى بالاسى ناركولوگيالىق ەسەپكە الىنىپتى. مۇنداي جايت الاڭداتپاي قويمايدى.
– ولاردىڭ تورتەۋى – ورتا مەكتەپتىڭ وقۋشىسى, ال بەسەۋى ارنايى جانە جوعارى وقۋ ورىندارىنىڭ ستۋدەنتى. ورتا مەكتەپتە وقيتىن ءتورت وقۋشىنىڭ ۇشەۋى «كامەلەتكە تولماعاندار اعزاسىنىڭ پسيحيكالىق جانە فيزيكالىق فۋنكتسيالارىنا تەرىس اسەر ەتەتىن پسيحوتروپتىق جانە وزگە دە كۇشتى اسەر ەتەتىن زاتتاردى تەرىس پايدالاناتىن» ساناتىنا جاتقىزىلدى, – دەيدى جىلىوي اۋدانى اكىمىنىڭ ورىنباسارى ءانۋار شاكىروۆ.
وبلىس اكىمىنىڭ ورىنباسارى باقىتگۇل حامەنوۆانىڭ ايتۋىنشا, وسى جايتقا وراي جىلىوي اۋدانىنىڭ باسشىلارى ءتيىستى شارالاردى قابىلداۋى قاجەت. ويتكەنى كامەلەتكە تولماعان بالالاردىڭ ناركولوگيالىق ەسەپكە الىنۋى – الاڭداتارلىق جايت. ال caspianlife.kz تاراتقان اقپاراتقا سۇيەنسەك, اۋداندا كامەلەتكە تولماعان قىزداردىڭ اراسىنداعى جۇكتىلىك ازايار ەمەس. ماسەلەن, بىلتىرعى توعىز ايدا 27 دەرەك تىركەلىپتى. بيىل وسىنداي كورسەتكىش 31-گە جەتىپ وتىر.
– ءبىز ءار بالانىڭ بولاشاعى ءۇشىن جاۋاپتى ەكەنىمىزدى ۇمىتپاعانىمىز ءجون. بارلىق ءجاسوسپىرىمنىڭ, اسىرەسە ەسەپتە تۇرعان بالالاردىڭ جاقسى تاربيە الۋىنا, قوعامنان ءوز ورنىن تابۋىنا ىقپال ەتۋىمىز كەرەك. وسى سالانىڭ جاۋاپتى ماماندارى ءار بالاعا تولىققاندى تۇلعا رەتىندە قاراۋى ءتيىس, – دەيدى باقىتگۇل حامەنوۆا.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ مالىمەتىنە قاراعاندا, ارنايى ورتالىقتا پسيحياتريالىق ەسەپتە تۇرعاندار ءۇشىن 145 توسەكتىك ورىن قاراستىرىلعان ەكەن. ال ناركولوگيالىق پاتولوگياسى بار كامەلەتكە تولماعاندارعا ارنالعان بەس ورىن جاساقتالىپتى. قازىر ۋىتقۇمارلىققا تاۋەلدى ءۇش ءجاسوسپىرىم تىركەلگەن. ەندى جات قىلىققا اۋەس بالالار ناركولوگيالىق تەكسەرۋدەن وتەدى.
بۇرىنعىنىڭ كونەكوزدەرى «...بالانىڭ كوڭىلى – دالادا» دەۋشى ەدى. بۇگىنگى بالانىڭ كوڭىلى جات قىلىق پەن ەسىرتكىگە اۋىپ بارا جاتقانداي. ۋاقىتىنىڭ كوبىن سمارتفونعا ۇڭىلۋمەن وتكىزىپ, بالاسىنىڭ كوشەدە نە ىستەپ جۇرگەنىنەن بەيحابار اتا-انانىڭ كوڭىلى شە؟..
اتىراۋ وبلىسى
