ۆەدومستۆو باسشىسى جاڭا جۇيەنى ەنگىزۋدىڭ باستى ماقساتى كوپشىلىك ءۇشىن ءبىلىم سالاسىنداعى قارجىلاندىرۋدىڭ اشىقتىعىن جانە تيىمدىلىگىن باقىلاۋدى قامتاماسىز ەتۋ ەكەنىن جەتكىزدى.
«بۋحگالتەريانى, كادرلاردى, ەسەپكە الۋ مەن بيۋدجەتتى جوسپارلاۋدى اۆتوماتتاندىرۋ سىبايلاس جەمقورلىق تاۋەكەلدەرىن الدىن الۋعا جانە قارجىنى ءتيىمدى پايدالانۋدى ارتتىرۋعا جاعداي جاسايدى. ياعني, مەكتەپتىڭ بيۋدجەتىنە, ونىڭ ءاربىر جۇمساعان تەڭگەسىنە قاتىستى اقپاراتقا ءبىزدىڭ مينيسترلىك, باسقا قۇزىرلى مەملەكەتتىك ورگاندار جانە ازاماتتىق قوعام وكىلدەرى قول جەتكىزە الادى. بۇل – ماڭىزدى باستاما. ءبىلىم بەرۋ سالاسىن قارجىلاندىرۋ جىلدان جىلعا ارتىپ كەلەدى.
ارينە, ونىڭ قانشالىقتى جەتكىلىكتى نەمەسە جەتكىلىكسىزدىگى جونىندە كوپ ايتۋعا بولادى. الايدا سول بولىنگەن قاراجاتتى ءتيىمدى پايدالانۋ ماڭىزدىراق», دەدى ا.ايماعامبەتوۆ.
مينيستر ءوز سوزىندە كوپشىلىكتىڭ «مەكتەپتەردى, بالاباقشالار مەن كوللەدجدەردى ءبىلىم جانە عىلىم مينيسترلىگى رەسپۋبليكالىق بيۋدجەت ەسەبىنەن قارجىلاندىرادى, سونداي-اق جالاقىنىڭ ۋاقتىلى, دۇرىس ەسەپتەلۋى, وقۋلىقتاردى ساتىپ الۋ نەمەسە ءبىلىم بەرۋ ۇيىمدارىنداعى جوندەۋ جۇمىستارىن دا مينيسترلىكتىڭ ءوزى تىكەلەي جۇرگىزەدى», دەپ قاتە ويلايتىنىنا توقتالدى.
«زاڭعا سايكەس بۇل جۇمىس – اكىمدىكتەردىڭ قۇزىرىندا. ەلىمىزدە ءبىلىم بەرۋدى باسقارۋ ورگاندارىنىڭ سانى 200-دەن اسادى, ياعني قارجىلاندىرۋ دا سول قالالار, اۋداندار مەن وبلىستاردىڭ بيۋدجەتىنەن وتەدى. اكىمشىلەندىرۋ دەڭگەيى ءارتۇرلى ءارى كوپ بولعان سوڭ ولاردى قاداعالاپ وتىرۋ وتە قيىن. سول سەبەپتى وبلىستىق ءبىلىم باسقارمالارىنىڭ ءوزى كوپ جاعدايدا جالاقىنى ۋاقتىلى تولەۋگە, وقۋلىقتاردى ساتىپ الۋعا نەمەسە مەكتەپ, كوللەدجدەردى جوندەۋ جۇمىستارىنا قاتىستى پروبلەمالاردى بۇقارالىق اقپارات قۇرالدارىنا شىققاندا نەمەسە شاعىمدار كەلىپ تۇسكەندە ءبىلىپ وتىرادى. بۇل مۇلدەم دۇرىس ەمەس. اتا-انالار مەن مۇعالىمدەرگە ورىن العان پروبلەمالارعا كىم جاۋاپ بەرەتىنى, نەگە بۇلاي بولعانى ەمەس, ولقىلىقتاردىڭ ورىن الماۋى ماڭىزدى عوي. سوندىقتان قارجىلاندىرۋ مەحانيزمدەرىن ەنگىزۋ جانە بارلىق قارجىلاندىرۋ جۇيەسىن تسيفرلاندىرۋ بويىنشا باستامانى قولعا الدىق», دەدى مينيستر.
اتالعان جۇيە وسى ۋاقىتقا دەيىن ەلوردا مەن پاۆلودار وبلىسىنداعى ءبىلىم بەرۋ ۇيىمدارىندا پيلوتتىق جوبا رەتىندە اپروباتسيادان ءوتىپتى. نۇر-سۇلتان قالاسى ءبىلىم باسقارماسىنىڭ باسشىسى شولپان قادىروۆا باس شاھارداعى ءبىلىم بەرۋ ۇيىمدارىنىڭ 2018 جىلدان بەرى وسى جۇيەمەن جۇمىس ىستەيتىنىن ايتتى.
«ەڭ الدىمەن, بۇل جۇيە بىزگە بۋحگالتەرلەر سانىن 40 پايىزعا دەيىن قىسقارتۋعا مۇمكىندىك بەردى. سونداي-اق قارجىعا قاتىستى اشىقتىق پەن ادىلدىكتى قامتاماسىز ەتەدى. سەبەبى اقپارات قولجەتىمدى. ءبىلىم بەرۋ ۇيىمىنىڭ باسشىسى قاي وپەراتسيانىڭ قاشان جانە كىم ورىنداعانىن ءبىلىپ وتىرادى. ەلوردادا بيۋدجەت قاراجاتىنان بىرنەشە ملرد تەڭگە ۇنەمدەلىپ, ءبىلىم بەرۋ ۇيىمدارىنىڭ قارجىلىق قىزمەتى رەتتەلدى. بۋحگالتەرلىك جانە سالىق ەسەبىنە الۋ بارىسىندا بۇزۋشىلىقتار سانى ەداۋىر قىسقارىپ, شىعىندار بويىنشا تاۋەكەلدەر ازايدى. اتالعان جوبا جالاقىنى دۇرىس ەسەپتەمەۋ, قارجىلىق بۇزۋشىلىقتار, جوسپارلاۋ, قارجىلاندىرۋ كەزىندەگى سۋبەكتيۆيزم سياقتى پروبلەمالاردى شەشۋگە جانە ءبىلىم بەرۋ مەكەمەلەرىنىڭ قارجىلىق جاعدايىنا جەدەل مونيتورينگ جۇرگىزۋگە جاعداي جاسايدى. بۋحگالتەريامەن قوسا بيۋدجەتتى جوسپارلاۋ, مەملەكەتتىك ساتىپ الۋ, تاريفيكاتسيالاۋ, جۇمىسقا الۋ پروتسەستەرى دە اۆتوماتتاندىرىلادى», دەدى ش.قادىروۆا.
مينيسترلىكتىڭ مالىمدەۋىنشە, جاڭا جۇيەگە كوشۋ ءۇشىن جەتكىلىكتى ۋاقىت بەرىلگەن, الداعى قاڭتار ايىنان باستاپ بۇل جوبا بارلىق ءبىلىم بەرۋ ۇيىمدارىنا ەنگىزىلەدى. قاراپايىم تىلمەن ايتقاندا, «بۇلتتى بۋحگالتەريا» جۇيەسى جەمقورلىقتىڭ الدىن الادى, مۇعالىمدەردىڭ جالاقىسىنا جانە مەكەمەلەرگە ساتىپ الىناتىن جابدىقتارعا (مىسالى, سوڭعى كەزدەرى ساتىپ الىنعان كومپيۋتەرلەردىڭ قۇنىنا) قاتىستى ءتۇرلى داۋلى پىكىرلەرگە دە نۇكتە قويماق.
