قازىر پوليتسەيلەر وسىنداي التى بەكەتتە تاۋلىك بويى كەزەكشىلىك اتقارادى. جىل باسىنان بەرى ءمودۋلدى ستاتسيونارلىق بەكەتتەردىڭ كەزەكشى قىزمەتكەرلەرىنە ءتۇرلى ماسەلە بويىنشا 500-دەن استام ازامات جۇگىنىپتى. مۇنداي بەكەتتەر قوعامدىق ورىنداردا بولاتىن قۇقىقبۇزۋشىلىقتار سانىنىڭ ەكى ەسەگە تومەندەۋىنە, جالپى قىلمىستىق ارەكەتتەردىڭ اشىلۋىنا وڭ اسەرىن تيگىزىپتى.
– وبلىس اكىمدىگىنىڭ قولداۋىمەن بيىل جوسپارلانعان 34 ۋچاسكەلىك پوليتسيا پۋنكتتەرىنىڭ 28-ءى ىسكە قوسىلدى. قۇقىقبۇزۋشىلىقپەن كۇرەسكە جەدەل دەن قويۋ, تۇرعىندار قاۋىپسىزدىگىن قورعايتىن ۋچاسكەلىك ينسپەكتور قىزمەتىنىڭ قولجەتىمدىلىگىن ارتتىرۋ ءۇشىن سالىنعان ۋچاسكەلىك پوليتسيا بەكەتتەرىنىڭ 22-ءسى تۇرعىن ۇيمەن بىرىكتىرىلدى. قازىر وبلىس اۋماعىندا 92 ۋچاسكەلىك پوليتسيا بەكەتى قىزمەت اتقارادى. اتىراۋ قالاسىنداعى 27 ۋچاسكەلىك پوليتسيا بەكەتىندە 90-نان استام ۋچاسكەلىك پوليتسيا ينسپەكتورى مەن 30-دان اسا ولاردىڭ كومەكشىسى قىزمەت اتقارادى. بۇعان قوسىمشا تاعى دا ۋچاسكەلىك پوليتسيا بەكەتتەرىن اشۋ قاراستىرىلۋدا, – دەيدى قامزا ۇمبەتقاليەۆ.
ونىڭ ايتۋىنشا, وڭىردە 232 ۋچاسكەلىك پوليتسيا ينسپەكتورى جۇمىس ىستەيدى. ينسپەكتورلاردىڭ جۇمىسىنىڭ تيىمدىلىگىن ارتتىرۋعا سەپتەسەتىن 71 كومەكشىسى بار. ولاردىڭ ءبارى ءپورتاتيۆتى بەينەتىركەگىش, راديوستانسا, پلانشەت سەكىلدى زاماناۋي تەحنيكالارمەن قامتاماسىز ەتىلىپ وتىر. جاقىندا ىشكى ىستەر ءمينيسترى ەرلان تۇرعىمباەۆتىڭ تاپسىرماسىمەن ۋچاسكەلىك پوليتسيا ينسپەكتورلارىنا اۆتوكولىكتەر ءبولىندى. سونداي قىزمەتتىك كولىكتىڭ ءبىرى اتىراۋ قالاسىنداعى №14 ۋچاسكەلىك پوليتسيا بەكەتىنە بەرىلدى. وڭىردەگى ۇزدىك ۋچاسكەلىك پوليتسيا بەكەتىنە «نيۆا» كولىگىن وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى قامزا ۇمبەتقاليەۆ تابىس ەتتى.
– مەملەكەت باسشىسىنىڭ جولداۋىنداعى تاپسىرمالاردى ىسكە اسىرۋ ماقساتىندا ۋچاسكەلىك پوليتسيا قىزمەتكەرلەرىنىڭ مارتەبەسىن كوتەرۋ, ولاردىڭ وكىلەتتىگىن كەڭەيتىپ, ماتەريالدىق-تەحنيكالىق جاعدايىن جاقسارتۋ قولعا الىندى. قازىر حالىقپەن ۇدايى بايلانىستا بولاتىن ۋچاسكەلىك ينسپەكتورلار جۇمىسىنىڭ تيىمدىلىگىن ارتتىرۋدا ماتەريالدىق-تەحنيكالىق بازانى نىعايتۋ جۇرگىزىلۋدە. مەملەكەت تاراپىنان ازاماتتاردىڭ قاۋىپسىزدىگىن قامتاماسىز ەتىپ, جەدەل ارەكەت ەتۋ ءۇشىن پوليتسيا قىزمەتكەرلەرىنە بارىنشا قولداۋ كورسەتىلۋدە, – دەيدى دەپارتامەنت باستىعى قامزا ۇمبەتقاليەۆ.
اتىراۋ قالاسىنداعى №14 ۋچاسكەلىك پوليتسيا بەكەتىنىڭ ينسپەكتورلارى 48 مىڭعا جۋىق تۇرعىنى بار «نۇرسايا», «بولاشاق», «جەتى قازىنا», «تۇلپار», «جەرۇيىق» بىرنەشە شاعىن اۋدانداعى قوعامدىق ءتارتىپتى قاداعالايدى. مۇندا جاڭادان سالىنعان كوپقاباتتى جانە جەكە تۇرعىن ۇيلەر, سپورتتىق كەشەن, كاسىپتىك ءبىلىم بەرەتىن جوعارى كوللەدج, نازارباەۆ زياتكەرلىك مەكتەبى, ءۇش ورتا مەكتەپ, اۋرۋحانا, بىرنەشە كوڭىل كوتەرۋ ورنى سەكىلدى نىساندار بار. بۇل ۋچاسكەلىك پوليتسيا بەكەتى دە پلانشەتتەرمەن, بەينەتىركەگىش, بايلانىس قۇرالدارىمەن قاتار, اكىمشىلىك اۋماقتاعى اۋلالار مەن باسقا دا قوعامدىق ورىندار بەينەباقىلاۋ كامەرالارىمەن جابدىقتالعان.
– مەن 2014 جىلدان بەرى ۋچاسكەلىك پوليتسيا قىزمەتكەرى بولىپ جۇمىس ىستەيمىن. عيماراتىمىز 2018 جىلى پايدالانۋعا بەرىلدى. ەندى مىنە, جاڭا كولىككە يە بولدىق. بۇل ءبىزدىڭ شاقىرتۋلارعا جەدەل جەتىپ, قوعامدىق ءتارتىپتى بۇزۋشىلاردى «قۇرىقتاۋعا» ىقپال ەتەدى, – دەيدى اعا ۋچاسكەلىك پوليتسيا ينسپەكتورى, پوليتسيا كاپيتانى رۇستەم جۇماباەۆ.
اتىراۋ وبلىسى
