تايىنشا اۋداندىق پوليتسيا ءبولىمىنىڭ جەدەل ۋاكىلى, اعا لەيتەنانت ولجاس بالتاباي مەن كەللەروۆكا پوسەلكەلىك پوليتسيا بولىمشەسىنىڭ ۋچاسكەلىك پوليتسيا ينسپەكتورى, لەيتەنانت ۆيكتور پشەنيچنىي ليپوۆكا اۋىلىندا ەسىرتكى زاتتارىن وتكىزبەسە دە ساقتاعان 61 جاسار باقتاشىنى ۇستادى. ونىڭ ۇيىنەن ەكى تۇيىنشەككە تۇيىلگەن جانە بۇدان باسقا ءۇش سىرىڭكە قورابىنا سالىنعان, سونداي-اق ىستالعان پلاستيك بوتەلكەدە بولعان كەپتىرىلگەن قاراسورا تابىلدى. سونىمەن بىرگە تىركەلمەگەن «يج-27» ماركالى اڭشى مىلتىعى جانە 16 كاليبرلى پاتروندار انىقتالدى.
تايىنشا اۋدانى پوليتسيا ءبولىمىنىڭ باستىعى, پوليتسيا پودپولكوۆنيگى نۇرلىجان اقتانوۆتىڭ ايتۋىنا قاراعاندا ۇستالعان ادام ليپوۆكا اۋىلىنىڭ مالىن باعۋعا جۋىردا عانا ورنالاسقان. ول بۇرىن ەسىرتكى قىلمىستارىن جاساعانى ءۇشىن جاۋاپقا تارتىلعان ەكەن. قازىر ونىڭ ءىسى سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. تەرگەۋ جۇرگىزىلۋدە.
جىل باسىنان سقو پوليتسەيلەرى زاڭسىز اينالىمنان 400 كگ استام ءتۇرلى ەسىرتكى زاتىن تاركىلەدى. ونىڭ 350 كگ استامى ماريحۋانا, 1كگ 690 گرامم – سينتەتيكالىق ەسىرتكى, سونداي-اق 372 گرامم گەروين. «ۋچاسكە» ءىس-شاراسى اياسىندا پوليتسەيلەر 180 مىڭنان استام تەكسەرىس جۇرگىزىپ, 9302 ءتۇرلى قۇقىق بۇزۋشىلىقتى انىقتادى.
سولتۇستىك قازاقستان وبلىسى
