د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىندەگى عىلىمي قىزمەتكەرلەردىڭ ايتۋىنشا, جول-كولىك وقيعاسى سوقتىعىسقانداردىڭ عانا ەمەس, باسقا دا كولىك جۇرگىزۋشىلەرىنىڭ, جولاۋشىلاردىڭ التىن ۋاقىتتارىن الىپ قويادى. مامانداردىڭ مولشەرلەۋىنشە, پوليتسيا قىزمەتكەرلەرى ولشەپ, حاتتاما تولتىرعانشا كەم دەگەندە ءبىر, ءبىر جارىم ساعات ۋاقىت وتەدى. ال تەحنولوگيانىڭ دامىعان زامانىندا وقيعا سەبەبىن انىقتاۋدىڭ جەدەل جولدارى بار.
– جول-كولىك وقيعاسىندا كىنالى جاقتى انىقتاۋ ءۇشىن ءار سانتيمەتر ماڭىزدى. سوندىقتان بارلىق ولشەمدەر دۇرىس بولۋى كەرەك. ءبىز كوپتەر ارقىلى اۋەدەن فوتوعا ءتۇسىرىپ, وقيعا كورىنىسىن مودەلدەۋدى ۇسىنىپ وتىرمىز. سودان كەيىن دەرەكتەر نەگىزىندە اۆتوتەحنيكالىق ساراپتاما جۇرگىزۋگە بولادى. ەڭ ماڭىزدىسى, بۇل ءادىس پوليتسەيلەر مەن جولاۋشىلاردىڭ ۋاقىتىن ۇنەمدەيدى, – دەدى «Veritas» وزىق دامۋ ورتالىعىنىڭ باس مامانى اندرەي وحوتەنكو.
اۋەدەن جاسالعان ءفوتوتۇسىرىلىم ارقىلى قاجەتتى پارامەترلەر اۆتوماتتى تۇردە ەسەپتەلەدى ەكەن. ناقتىراق ايتساق, اۆتوكولىكتىڭ زاقىمدانۋى انىقتالادى, كولىكتىڭ توقتاعان جولى ولشەنەدى. قاجەت بولعان جاعدايدا اۆتوكولىك پەن ۇشىپ كەتكەن سىنىقتار اراسىنداعى قاشىقتىق ەسەپتەلەدى.
«Veritas» ورتالىعى مامانىنىڭ پىكىرىنشە, اۋە ءفوتوتۇسىرىلىم راسىمىنەن كەيىن سوعىلىپ قالعان كولىكتەردى جولدان الىپ تاستاۋعا بولادى.
وبلىستىق پروكۋراتۋرا ماماندارى قاتىسقان جيىندا ۇسىنىلعان جوباعا پوليتسيا دەپارتامەنتىنىڭ قىزمەتكەرلەرى قىزىعۋشىلىق تانىتتى. قوسىمشا جول-كولىك وقيعاسى بولعان جەرلەردى بەلگىلەۋ ءۇشىن 3D فورماتتا كومپيۋتەرلىك مودەلدەۋدى قولدانۋ كەرەكتىگى ايتىلدى. جوبا قابىلدانىپ, جۇزەگە اسىپ جاتسا, پوليتسيا دەپارتامەنتى ۇشقىشسىز ۇشۋ اپپاراتتارىمەن, قوسىمشا باعدارلامالارمەن قامتىلۋى كەرەك. سونداي-اق ءاربىر جول پاترۋلدىك پوليتسياسى كوپتەر ۇشىرۋدى مەڭگەرۋى ءتيىس.
وسكەمەن
