قازاقستاندىقتاردىڭ داعدىلارىن ارتتىرۋ بويىنشا جوبا قر ەڭبەك جانە حالىقتى الەۋمەتتىك قورعاۋ مينيسترلىگى مەن «ەڭبەك رەسۋرستارىن دامىتۋ ورتالىعى» اق-نىڭ Coursera تانىمال ونلاين-وقىتۋ پلاتفورماسىمەن ىنتىماقتاستىعىنىڭ ارقاسىندا ىسكە اسىرىلۋدا. كۋرستاردان وتۋگە وتىنىمدەردى قابىلداۋ اعىمداعى جىلعى 14 جەلتوقساندا اياقتالادى, وقىتۋ 2021 جىلعى 15 اقپانعا دەيىن وتەۋسىز نەگىزدە وتەدى.
تىركەۋ باستالعاننان بەرى 32 مىڭ ازامات وقۋعا كىرىستى. ولاردىڭ ىشىندە 4,5 مىڭ قاتىسۋشى 2 جانە ودان دا كوپ كۋرستاردا, 2,5 مىڭ قاتىسۋشى 3 كۋرستا جانە 6,5 مىڭ قاتىسۋشى ءبىر مەزگىلدە 4 كۋرستا وقۋدا. ورتا ەسەپپەن ءبىلىم الۋشىلار وقۋعا اپتاسىنا 2,5 كۇن جۇمسايدى.
2 مىڭعا جۋىق ادام وقۋىن كەم دەگەندە ءبىر كۋرس بويىنشا اياقتادى. Coursera پلاتفورماسىنىڭ اقپاراتى بويىنشا, 500-گە جۋىق كۋرس قازاقستاندىقتاردىڭ قىزىعۋشىلىعىن تۋدىردى, ولاردىڭ ىشىندە كومپيۋتەرلىك جانە ستاتيستيكالىق باعدارلامالاۋ داعدىلارىن, وپەراتسيالىق جۇيەلەردى, ماتەماتيكالىق جانە كوممۋنيكاتسيالىق داعدىلاردى, دەرەكتەردى تالداۋدى جانە ت. ب. ارتتىرۋ بويىنشا باعىتتاردى ءبولىپ كورسەتۋگە بولادى.
ەستەرىڭىزگە سالا كەتەيىك, Coursera ءبىلىم بەرۋ پلاتفورماسى الەمنىڭ جەتەكشى كومپانيالارى مەن ۋنيۆەرسيتەتتەرىنەن (GOOGLE, IBM, Facebook, Stanford University, Yale University, Johns Hopkins University, Princeton University جانە ت.ب.) 4 مىڭنان استام تەگىن كۋرستاردان وتۋگە بىرەگەي مۇمكىندىك بەرەدى. اتالعان كۋرستاردا ءتۇرلى داعدىلاردى, سونىڭ ىشىندە ماتەماتيكالىق, كوممۋنيكاتيۆتىك, كاسىپكەرلىك, باعدارلامالاۋ, ستاتيستيكالىق تالداۋ, دەرەكتەردى باسقارۋ جانە كوشباسشىلىق داعدىلارىن مەڭگەرۋگە بولادى. كۋرستاردى ءساتتى اياقتاعاننان كەيىن ءبىلىم الۋشىلار سەرتيفيكات الادى.
اعىمداعى جىلعى 14 جەلتوقسانعا دەيىن https://www.enbek.kz/ru/free-coursera ەلەكتروندىق ەڭبەك بيرجاسى ارقىلى ءوتىنىم بەرگەندەر جانە www.coursera.org پلاتفورماسىندا تىركەلگەنىن راستاعاندار ءۇشىن Coursera الاڭىندا وقىتۋ كۋرستارى 2021 جىلعى 15 اقپانعا دەيىن قولجەتىمدى.
