اتالعان زالدىڭ اشىلۋ سالتاناتىندا بەتاشار ءسوزدى ۇلتتىق مۋزەيدىڭ ديرەكتورى ارىستانبەك مۇحامەدي ۇلى الدى.
– ادامزات تاريحىندا تۇركى وركەنيەتىنىڭ الاتىن ورنى وتە زور. ۇلان-عايىر اتىراپتى باعىندىرعان تۇركىلەر كوشپەلىلىك پەن وتىرىقشىلىق مادەنيەتتى شەبەر ۇشتاستىرىپ, ونەر مەن عىلىمنىڭ ىرگەلى ورداسىنا اينالدى. سوندىقتان اتا-بابا ەرلىگىن ۇلىقتاۋ – ءبىزدىڭ مىندەتىمىز! – دەدى ا.مۇحامەدي ۇلى.
شارا بارىسىندا تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي, وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ, قىرعىزستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جەەنبەك كۋلۋباەۆ, ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسىنىڭ ءبىرىنشى حاتشىسى ەيۆاز مۋساەۆ قۇتتىقتاۋ ءسوز سويلەپ, كونە تۇركى وركەنيەتىنىڭ مادەني جانە رۋحاني مۇرالارىن سارالاپ, ولاردىڭ بۇگىنگى ۇرپاق ءۇشىن ماڭىزىن اتاپ ءوتتى.
ايتا كەتەيىك, ءىس-شارانىڭ نەگىزگى ماقساتى – ەۋرازيانىڭ دالالىق اۋماعىندا يمپەريالىق دارەجەگە جەتكەن كونە تۇركى وركەنيەتىنىڭ مادەني جانە رۋحاني مۇرالارىن بۇگىنگى تۇركى حالىقتارىنىڭ مىزعىماس مۇراسى رەتىندە ناسيحاتتاۋ.
«كونە تۇركى وركەنيەتى» زالى ۇلى دالا توسىندە الىپ مەملەكەتكە اينالعان ورتاعاسىرلىق تۇركىلەردىڭ رۋحاني جانە ماتەريالدىق مادەنيەتىنە ارنالعان. جالپى, زال ەكسپوزيتسياسى ءۇش بولىكتەن تۇرادى. العاشقىسى تۇركىلەردىڭ جازبا مادەنيەتىنە ارنالسا, ەكىنشى بولىگىندە تۇركىلەردىڭ ءدىني سەنىمىنەن سىر شەرتەتىن تاس مۇسىندەر قويىلعان. زال ەكسپوزيتسياسىنىڭ ءۇشىنشى بولىگىندە ءتۇرلى قورىمدار مەن وبالاردان تابىلعان تاريحي جادىگەرلەر (ات-ابزەلدەرى, قارۋ-جاراقتار جانە ت.ب.) توپتاستىرىلعان.
ەندى, بۇدان بىلاي ۇلتتىق مۋزەيدىڭ قوناقتارى جاڭادان اشىلعان «كونە تۇركى وركەنيەتى» زالىن تاماشالاپ, ۇلتتىق تاريحىمىز بەن مادەنيەتىمىزگە قاتىستى تىڭ ماعلۇماتتارمەن تانىسا الادى.
