دارىندى بالالاردى انىقتاپ, ولاردىڭ تانىمدىق قىزىعۋشىلىقتارىن وياتۋ, وقۋشىلاردىڭ مادەني جانە ءبىلىم دەڭگەيىن كوتەرۋ, سونداي-اق مەكتەپ وقۋشىلارى اراسىندا بوس ۋاقىتتى ءتيىمدى ۇيىمداستىرۋعا ىقپال ەتۋدى ماقسات تۇتقان شاراعا نۇرسۇلتان نازارباەۆ قورىنىڭ جوبالاۋ ءوفيسىنىڭ جەتەكشىسى ز.تۇركمەنباەۆا, مەملەكەتتىك ءتىلدى دامىتۋ قورىنىڭ باسشىسى ازات شاۋەەۆ قاتىستى.
ايتا كەتەيىك, «كىم بىلگىش؟» ءتۋرنيرى 2016 جىلدان باستاپ وتكىزىلىپ كەلەدى. بۇل ويىن سپورت, ونەر, الەم, تاريح, تابيعات, دەنساۋلىق, عىلىم تاقىرىپتارىنداعى 40 000-نان استام سۇراقتاردان تۇراتىن تۇڭعىش وتاندىق ءموبيلدى قوسىمشا. تۋرنير قاتىسۋشىلاردىڭ تاڭداۋى بويىنشا قازاق, ورىس, اعىلشىن تىلىندە جۇرگىزىلدى.
وسى جىلى وقۋشىلار رەسپۋبليكانىڭ ءار وڭىرىنەن بەلسەندىلىك تانىتىپ, 3000-عا جۋىق مەكتەپ وقۋشىلارى قاتىستى. ويىننىڭ ەكى كەزەڭى ونلاين رەجىمدە, ال قورىتىندى فينال ەلوردادا وتكىزىلدى. وسىلايشا, قازاقتىلدى ويىنشىلار اراسىندا 1-ورىنعا تۇركىستان وبلىسىنىڭ كۇلتوبە نەگىزگى ورتا مەكتەبىنىڭ 9-سىنىپ وقۋشىسى جولتاي گۇلايىم, 2-ورىنعا اقمولا وبلىسىنىڭ №2 ورتا مەكتەبىنىڭ 9-سىنىپ وقۋشىسى قانتاي داۋلەت, 3-ورىنعا اقمولا وبلىسىنىڭ №2 ورتا مەكتەبىنىڭ 10-سىنىپ وقۋشىسى اسىلبەك بوتاگوز يە بولدى.
ال ءورىستىلدى ويىنشىلار اراسىندا 1-ورىن پاۆلودار وبلىسى, اقسۋ قالاسى, №4 ورتا مەكتەبىنىڭ 11-سىنىپ وقۋشىسى ا.سەدوۆاعا, 2-ورىن پاۆلودار وبلىسى, اقسۋ قالاسى, №8 ورتا مەكتەبىنىڭ 11-سىنىپ وقۋشىسى م.نوۆاكقا, 3-ورىن جامبىل وبلىسى, تاراز قالاسى, №3 مەكتەپ-ليتسەيىنىڭ 11-سىنىپ وقۋشىسى ا.ورىنباسارعا تابىستالدى. تۋرنير جەڭىمپازدارىنا «2020 جىلدىڭ ەڭ اقىلدى وقۋشىسى» اتتى ارنايى ديپلوم مەن نوۋتبۋك سياقتى باعالى سىيلىقتار بەرىلدى.
ء«ىس-شارا بالالارعا باسەكەلەستىك رۋحىن سەزىنۋگە, وزدەرىن جانە وزدەرىنىڭ بىلىمدەرىن دالەلدەۋگە مۇمكىندىك بەردى», دەدى مەملەكەتتىك ءتىلدى دامىتۋ قورىنىڭ باسشىسى ا.شاۋەەۆ.
