تەرىسكەيدەگى تولايىم تابىس

سونىڭ ىشىندە اۋىل شارۋاشىلىعى ونىمدەرىنىڭ جالپى كولەمى ون ايدا 700,8 ملرد تەڭگەگە جەتكەن, ال بىلتىر جىل بويىندا ول 612 ملرد تەڭگە بولعان ەدى. ءوسىم وسىمدىك ونىمدەرىنىڭ كولەمى 3,4 پايىزعا ارتقاندىعىنىڭ جانە مال شارۋاشىلىعى ونىمدەرىنىڭ 1,8 پايىزعا ارتقاندىعىنىڭ ەسەبىنەن بولىپ وتىر. ارينە, بۇل جەردە بيىلعى باعانىڭ بىلتىرعىمەن سالىستىرعاندا جوعارى ەكەنىن دە ەسەپكە العان ءجون. دەگەنمەن ءوسىم ايتارلىقتاي. سونىڭ ىشىندە تيميريازەۆ اۋدانىنىڭ اۋىلشارۋاشىلىق ونىمدەرىنىڭ ءوسىمى ءتىپتى 19,6 پايىزعا, شال اقىن اۋدانىنىڭ قارقىنى 18,8 پايىزعا ارتقان.

مال شارۋاشىلىعى ونىمدەرىنىڭ اراسىندا ەت جانە ەت ونىمدەرىنىڭ ارتۋى وبلىس بويىنشا 4,1 پايىز, ال ءسۇت ونىمدەرىنىڭ ارتۋى 5,4 پايىز بولدى. سوڭعىلارىنىڭ ارتۋىنا ءسۇت فەرمالارىنىڭ پايدالانۋعا بەرىلۋلەرى اسەر ەتىپ وتىر. وبلىس اكىمى قۇمار اقساقالوۆتىڭ ءوزى وسىنداي فەر­مالاردىڭ كوبەيۋىن قاتاڭ باقىلاۋعا العان.

– ءبىز ەندىگى جىلى تايىنشا اۋدانىندا 3 مىڭ باس سيىرعا ارنالعان ءسۇت فەرماسىن پايدالانۋعا بەرەمىز. بۇل ءبىزدىڭ وبلىس قانا ەمەس, ەلىمىزدەگى اسا ءىرى ءسۇت فەرماسى بولماق, – دەدى ول وتىرىستا سويلەگەن سوزىندە.

سونىمەن قاتار وبلىس اۋداندارى اراسىندا تەك جامبىل اۋدانىندا عانا ءسۇت فەرماسى ءالى كۇنگە سالىنباعانىن اتاپ ءوتىپ, اۋدان اكىمىنە وسى ماسەلەنى قاراستىرۋ تۋرالى ناقتى تاپسىرما بەردى.

اۋىل شارۋاشىلىعى ونىمدەرىنىڭ اراسىندا تەك جۇمىرتقا الۋ عانا بىلتىرمەن سالىستىرعاندا 23 پايىزعا دەيىن تومەندەپ كەتكەن. بۇل بيىلعى كۇزدە تۇماۋ كەلىپ, قۇستىڭ جاپپاي قىرىلعاندىعىنىڭ كەسىرىنەن بولىپ وتىر.

ەت وڭدەۋ دە بيىل بىلتىردىڭ ساي­كەس مەرزىمىمەن سالىستىرعاندا 4,1 پا­يىز­عا ۇلعايدى. بۇل «مياسوكومبينات» جشس, «لەونتەۆ» جشس جانە تاعى باس­قالارىنىڭ ەسەبىنەن قول جەتكىزىلگەن تابىس. ەت كونسەرۆىلەۋ قارقىنى دا بىل­تىرعىمەن سالىستىرعاندا 28 پايىز ارتتى. جالپى العاندا, بيىل ايماقتا 1300 توننا ەت ونىمدەرى شىعارىلعان ەكەن.

مايلى داقىلدارمەن دە وبلىس دي­قاندارى جەرگىلىكتى تۇرعىنداردى تولى­عىمەن قامتاماسىز ەتە الادى. ولاردىڭ دا ۇلەسى بيىل بىلتىرعىعا قاراعاندا ارت­قان. اۋىلشارۋاشىلىق سالاسى بويىنشا قو­رىتىندى سوزىندە قۇمار اقساقالوۆ بار­لىق اۋدان اكىمدەرىنە بيىلعى وراققا تياناقتى ساراپ جاساپ, ەڭبەك ونىمدىلىگىن ارتتىرا الماعان شارۋالاردىڭ جەرىن الۋ ماسەلەسىن قا­راستىرۋدى ۇسىندى. ويتكەنى ولار جاڭا تەحنولوگيالاردى قولدانباي, تى­ڭايتقىش سەپپەي, تۇقىم ساپاسىن ارت­تىرماي وتىر. جەردى توزدىرىپ, تەك ءونىم الۋدى عانا كوكسەيتىن مۇنداي شارۋا­لارعا ءتيىستى شارالار قولدانىلۋى كەرەك دەدى اكىم.

ونەركاسىپ ونىمدەرىنىڭ جالپى قۇنى بيىلعى 10 ايدا 235,6 ملرد تەڭگەنى قۇ­راپ, بىلتىرعى جىلدىڭ سايكەس مەرزىمى­مەن سالىستىرعاندا 5,5 پايىزعا ارتقان. ال تاۋ-كەن ءوندىرىسىنىڭ ءوسىمى 13 پايىز­عا دەيىن جەتكەن. ونەركاسىپ ونىمدەرى­نىڭ ءوسىمى بويىنشا ەسىل مەن جامبىل اۋداندارى الدا كەلەدى. پەتروپاۆل قالاسى­نىڭ وزىندەگى نەگىزگى زاۋىتتار تۇراق­تى تۇردە تاپسىرىستارمەن قامتاماسىز ەتىلگەن. تاپسىرىس پورتفەلىنىڭ ەكى ەسە ارتقاندىعىن ايرىقشا اتاپ وتۋگە بولادى. سونىڭ ىشىندە زيكستو زاۋىتى ءۇشىن «قازاقستان تەمىر جولى» ۇلتتىق كومپانياسىنان 2 مىڭ ۆاگون دايىنداۋ تۋرالى تاپسىرىسقا قول جەتكىزۋ – ۇلكەن تابىس.

– كەلىسسوزدەردىڭ قانشالىقتى قيىندىقپەن جۇرگىزىلگەندىگىن ايتپاي-اق قويايىن, ايتەۋىر ءبىز ۇلكەن ولجاعا قول جەتكىزىپ, وبلىس ءۇشىن وراسان زور تاپسىرىس الدىق», دەدى اكىم. بۇل تاپسىرىستىڭ قۇنى 45 ملرد تەڭگە. ەندى اتالمىش كاسىپورىن جىل بويى تولىق كۇشىندە جۇمىس ىستەپ, جۇمىسشىلارىنىڭ الەۋمەتتىك احۋالىن, سالىق تولەۋدى ارتتىرادى. قازىردىڭ وزىندە العاشقى قارجىلاندىرۋلار ءتۇسىپ وتىر. الدىمىزداعى جىلدىڭ ءساۋىر ايىنان باستاپ وسى زاۋىت جۇمىسشىلارىنىڭ ەڭبەكاقىسى 20 پايىزعا ارتاتىندىعى كوزدەلگەن.

سونداي-اق «كيروۆ زاۋىتى», «مۇ­نايماش», «پويسك» كاسىپورىندارى دا وزدەرىنىڭ ونىمدەرىن بىلتىرمەن سا­لىستىرعاندا اجەپتاۋىر ارتتىرعان. «سو­نىڭ ىشىندە «كيروۆ زاۋىتى» كا­سىپ­ورنى جوعارى تەحنولوگيالى ءىت ونىم­دەر شىعارادى دەگەندە جۇرتتىڭ ءبارى سكەپتيكالىق كوزقاراستا بولعان ەدى. ال بۇگىنگى تاڭدا وسى زاۋىت 5 مىڭ دانا كومپيۋتەر, 19,5 مىڭ دانا نوۋتبۋك, 8 مىڭ دانا پلانشەت شىعارىپ, 3,8 ملرد تەڭ­گەنىڭ ونىمدەرىن وندىرۋگە قول جەت­كىزدى. ونىڭ ونىمدەرىنە دەگەن تاپسىرىستار كورشىلەس اقمولا, قوستاناي, تۇركىستان وبلىستارىنان دا ءتۇسىپ وتىر», دەدى قۇمار ىرگەباي ۇلى.

قۇرىلىستىڭ ءوسىمى 10,4 پايىزعا دەيىن ارتىپ, بيىلعى ون ايدا 79,9 ملرد تەڭگەنى قۇراپ وتىر. بۇل سالا بويىنشا پەتروپاۆل قالاسىنان باسقا ءۋاليحانوۆ, تيميريازەۆ, شال اقىن اۋداندارى الدا كەلەدى. تۇرعىن-ۇيلەردى پايدالانۋعا بەرۋ بويىنشا بيىلعى 10 ايدا 29,8 پايىز ءوسىم بولعان. ازىرگە 112,5 مىڭ شارشى مەتر تۇرعىن ءۇي پايدالانۋعا بەرىلگەن. جىلدىڭ اياعىنا دەيىن بۇل سان ارتا تۇسەدى. سونداي-اق كىرپىش, پروپيلەن جانە باسقا دا قۇرىلىس ماتەريالدارىن شىعارۋ دا وبلىس بويىنشا ارتىپ وتىر.

وسىلايشا سولتۇستىك قازاقستان وبلىسى جامان ىندەتتى ەلەمەي, ەكونوميكادا جوعارى تابىستارعا جەتىپ وتىر.

سولتۇستىك قازاقستان وبلىسى