بريفينگ بارىسىندا ولجاس بەكتەنوۆتەن مەديتسينالىق ساقتاندىرۋ قورىنىڭ بۇرىنعى باسشىسى ايباتىر جۇماعۇلوۆقا قاتىستى تەرگەۋ ءىسىنىڭ ءمان-جايى سۇرالدى.
"الەۋمەتتىك مەديتسينالىق ساقتاندىرۋ قورىنىڭ قىزمەتى بويىنشا بىزدە سىبايلاس جەمقورلىق تاۋەكەلدەرىنە سىرتقى تالداۋ جۇرگىزىلەدى. بۇل تەكسەرۋ ەمەس, بيزنەس-پروتسەستەردى تالداۋ. قىلمىستىق-قۇقىقتىق اسپەكتىگە سايكەس قوردىڭ بۇرىنعى باسشىسىنا قاتىستى بۇگىنگى كۇنى ەش شاعىم جوق. تالداۋ قورىتىندىلارى بويىنشا ماسق جۇمىسىنىڭ تيىمدىلىگىن ارتتىرۋعا مۇمكىندىك بەرەتىن ۇسىنىمدار دايىندالادى", دەدى ولجاس بەكتەنوۆ.
ەسكە سالا كەتەيىك, اعىمداعى جىلدىڭ شىلدە ايىندا قازاقستاندىقتار ايباتىر جۇماعۇلوۆتىڭ جۇبايى جاريالاعان پىكىرگە قاتىستى جەلىدە نارازىلىقتار تۋىنداپ, سوڭى داۋعا اينالدى. اتالعان جايتتان كەيىن مەملەكەت باسشىسى قوردىڭ بۇرىنعى باسشىسىن ورنىنان ءتۇسىرۋدى بۇيىردى. ءدال سول ايدا سىبايلاس جەمقورلىققا قارسى قىزمەت اگەنتتىگى قوردىڭ قاراجاتىن ۇرلاۋ فاكتىلەرى بويىنشا سوتقا دەيىنگى تەرگەۋدى باستاعانىن مالىمدەدى.
