بۇرىنعى سەمەي سىناق پوليگونىنىڭ تەحنيكالىق الاڭدارى مەن قر ۇلتتىق يادرولىق ورتالىعىنىڭ عىلىمي-زەرتتەۋ بازاسىن ارالاعاننان كەيىن جۇمىس كەزدەسۋى وتكىزىلدى.
جينالىستى اشا وتىرىپ, قر ۇياو باس ديرەكتورى ەرلان باتىربەكوۆ ۇلتتىق يادرولىق ورتالىقتىڭ يادرولىق قارۋدىڭ تارالۋىنا جول بەرمەۋگە باعىتتالعان ماگاتە-مەن كوپجىلدىق ىنتىماقتاستىقتى جوعارى باعالايتىنىن اتاپ كورسەتتى. ماگاتە-ءنىڭ قولداۋ كورسەتۋىنىڭ ارقاسىندا كاسىپورىن نەگىزىندە يادرولىق قارۋدى تاراتپاۋ, يادرولىق ەنەرگەتيكانىڭ قاۋىپسىزدىگىن قامتاماسىز ەتۋ سالاسىنداعى ماڭىزدى مەملەكەتتىك مىندەتتەر جۇزەگە اسىرىلدى.
مىسالى, بۇرىنعى سەمەي سىناق پوليگونىنىڭ اۋماعىن راديوەكولوگيالىق زەرتتەۋ جوباسى مەن اقتاۋدان بن-350 رەاكتورىنىڭ پايدالانىلعان وتىنىن «بايكال-1» الاڭىنا تاسىمالداۋ جونىندەگى جوبالار ەڭ ۇزدىكتەر قاتارىنا جاتادى.
- اتوم ەنەرگياسى جونىندەگى حالىقارالىق اگەنتتىكتىڭ قر ۇلتتىق يادرولىق ورتالىعىنداعى رەاكتورلاردى جاڭعىرتۋ جانە تومەن بايىتىلعان ۋران وتىنىنا اۋىستىرۋ جۇمىستارىن جۇرگىزۋىنە جان-جاقتى قولداۋ كورسەتۋى ىنتىماقتاستىقتىڭ ماڭىزدى باعىتى بولىپ تابىلادى,-دەدى ەرلان باتىربەكوۆ,- ماگاتە-ءنىڭ تىكەلەي قاتىسۋىمەن يۆگ.1م زەرتتەۋ رەاكتورىنىڭ اقپاراتتىق-ولشەۋ جۇيەسى جاڭعىرتىلدى. يۆگ.1م رەاكتورىنىڭ جبۋ-وتىنىن رەسەي فەدەراتسياسىنا اكەتۋ بويىنشا دا جاردەم كورسەتىلۋدە. سونداي-اق يگر رەاكتورىنىڭ ساۋلەلەنگەن ۋران-گرافيتتى جبۋ-وتىنىن سۇيىلتۋ مەن كادەگە جاراتۋدىڭ بىرەگەي تەحنولوگياسىن ازىرلەۋگە ادىستەمەلىك كومەك كورسەتىلۋدە, ونى دا اتاپ وتكەن ءجون.
ءوز كەزەگىندە ماسسيمو اپارو وسى ساپاردى ۇيىمداستىرعانى ءۇشىن جانە بۇرىنعى سەمەي سىناق پوليگونى وبەكتىلەرىن ارالاۋ مۇمكىندىگىنە يە بولعانى ء ۇشىن ۇلتتىق يادرولىق ورتالىققا العىس ءبىلدىردى. ماگاتە بۇرىنعى سەمەي سىناق پوليگونىنىڭ اۋماعىن قاۋىپسىز كۇيگە كەلتىرۋ بويىنشا جۇرگىزىلگەن جۇمىستاردىڭ ناتيجەلەرىن جوعارى باعالادى. سونداي-اق, شەتەلدىك قوناقتارعا قر ۇياو زەرتتەۋ بازاسىندا اتوم ەنەرگەتيكاسىن دامىتۋ مەن راديوەكولوگيا جانە باسقارىلاتىن تەرمويادرولىق سينتەز تەحنولوگيالارى سالاسىندا جۇرگىزىلگەن جۇمىستاردىڭ عىلىمي-تەحنيكالىق ناتيجەلەرى دە جاقسى اسەر قالدىردى.
كۋرچاتوۆ
