شەكتەۋ شارالارىنا بايلانىستى دوڭگەلەتىپ وتىرعان كاسىپتەرى تۇرالاپ قالعاندىقتان, 50-دەن اسا سەمەيلىك كاسىپكەر شاھار باسشىسى ەرماك سالىموۆپەن كەزدەسىپ, نارازىلىقتارىن ءبىلدىردى.
كەزدەسۋدە قالا باسشىلىعى ىندەتتىڭ وبلىس اۋماعىندا تارالۋ قارقىنى تىيىلماي تۇرعانىن ايتىپ, قانداي دا ءبىر بوساڭسۋلار مەن جەڭىلدىكتەر بولمايتىنىن كەسىپ ايتتى. ونىڭ ۇستىنە شىعىس قازاقستان «قىزىل ايماققا» ەنگىزىلگەن. سونىمەن قاتار كاسىپكەرلەردىڭ ءوز بەدەلدەرى مەن سەنىمدەرىنە وزدەرى نۇقسان كەلتىرىپ وتىرعانى دا ءسوز ەتىلدى. ەكىنشى تولقىن كەزىندە ناۋرىز-ماۋسىم ايلارىنداعىداي قاتاڭ شارالار قابىلدانبادى. سونىڭ وزىندە كاسىپكەرلەر سانيتارلىق تالاپتاردى ساقتاماي, ءتارتىپ بۇزۋعا جول بەرىپ وتىر.
ماسەلەن, سەمەي مەيرامحانالارىنىڭ بىرىندە ۇيلەنۋ تويى ۇيىمداستىرىلعان. وندا تانىمال سپورتشىلار, ونەر ادامدارى, كوشباسشى جاستار, بيزنەسمەندەر مەن شوۋمەندەر جينالعانى بەلگىلى. ءبىر قىزىعى, رۇقسات ەتىلمەگەن سالتاناتتى مەرەكەگە قاتىسقانداردىڭ كەيبىرەۋلەرى – كوروناۆيرۋسپەن اۋىرىپ شىققانداردىڭ قاتارىندا.
قالا اكىمىنىڭ ايتۋىنشا, بارلىق ەرەجەلەردى ساقتاۋ قاجەتتىگى تۋرالى جەرلەستەرگە ۇندەۋ تاستالعان. الايدا سانيتارلىق شەكتەۋلەرگە قاراماستان توي وتكىزىلگەن.
وكىنىشكە قاراي مۇنداي جاعداي بىرەۋ عانا ەمەس. جەر-جەرلەردە قۇرىلعان مونيتورينگتىك توپ كوپتەگەن زاڭبۇزۋشىلىقتى انىقتادى. قانشاما حاتتاما تولتىرىلدى.
وسى كەزەڭدە بارلىق كاسىپكەرگە ۋاقىت پەن ادام سانى بويىنشا شەكتەۋلەرمەن, قاشىقتىقتى, ماسكا تاعۋ رەجىمىن جانە دەزينفەكتسيالىق شارالاردى ساقتاي وتىرىپ جۇمىس ىستەۋگە رۇقسات ەتىلدى. سوعان قاراماستان, كەيبىر بيزنەس وكىلدەرى بۇرىنعىداي جۇمىس ىستەپ, كارانتيندىك شەكتەۋلەردى جەڭىلدەتۋدى تالاپ ەتۋدە. دەي تۇرعانمەن, «باستى بايلىق – دەنساۋلىق». سانيتارلىق تالاپتار جەڭىلدەتىلگەن جاعدايدا COVID-19 اۋرۋىنىڭ تارالۋى ودان سايىن كۇشەيۋى مۇمكىن.
توقەتەرى, قالا باسشىلىعى سەمەي كاسىپكەرلەرىنە COVID-19 جاعدايى تۇراقتالعانعا دەيىن جەڭىلدىكتىڭ بولمايتىنىن شەگەلەپ ايتتى. ال شەكتەۋ شارالارى وبلىستىڭ باس سانيتارلىق دارىگەرىنىڭ قاۋلىسىنا سايكەس 25 قاراشاعا دەيىن جالعاسادى.
سەمەي
