"بۇگىن ءبىز ەكولوگيانىڭ جانە جاسىل ەكونوميكانىڭ ەڭ وزەكتى ماسەلەلەرىن تالقىلاۋعا جينالدىق. تازا ەكولوگيا مەن ەكونوميكا قۇرۋ – ايتارلىقتاي كۇردەلى مىندەت. ءبىر جاعىنان, وندىرىستىك سەكتورلار حالىقتى قاجەتتى تاۋارلارمەن قامتاماسىز ەتەدى. ەكىنشى جاعىنان ءدال وسى سەكتورلار قورشاعان ورتانى لاستايدى. بۇل جاعدايدان قالاي شىعامىز؟ پرەزيدەنت بيىلعى قازاقستان حالقىنا جولداۋىندا ەلىمىزدىڭ جاسىل دامۋىنا ەرەكشە نازار اۋداردى. بىرىنشىدەن, بۇل ۇلت دەنساۋلىعىنا, حالىقتىڭ جانە قوعامنىڭ ءال-اۋقاتىنا تىكەلەي قاتىستى. اتالعان مىندەتتەرگە قول جەتكىزۋ ءۇشىن قر ەكولوگيا, گەولوگيا جانە تابيعي رەسۋرستار مينيسترلىگى ۇلكەن جۇمىس اتقارۋدا. جاڭا ەكولوگيالىق كودەكستەگى ءبىرىنشى كەزەكتەگى مىندەت – قازاقستاندىق كاسىپورىنداردى ەڭ وزىق قولجەتىمدى تەحنولوگيالارعا (ەقت) – تەحنيكانىڭ ەڭ ۇزدىك جەتىستىكتەرى قاعيداتتارىنا اۋىستىرۋ بولىپ وتىر", دەپ اتاپ ءوتتى ب. جۇماعۇلوۆ.
ەڭ وزىق قولجەتىمدى تەحنولوگيالار (ەقت) — شارۋاشىلىق قىزمەتتىڭ قورشاعان ورتاعا تەرىس اسەرىن ازايتۋعا باعىتتالعان, ۇيىمداستىرۋ جانە باسقارۋ شارالارىن قامتاماسىز ەتەتىن سالالىق تەحنولوگيالار, تەحنيكا جانە جابدىق. ياعني, وقت ناقتى ءبىر ونەركاسىپ سالاسىنىڭ ەرەكشەلىكتەرىن ەسكەرە وتىرىپ, قورشاعان ورتاعا تەرىس اسەرىن ازايتۋدىڭ اناعۇرلىم ساپالى جانە ەكونوميكالىق نەگىزدەلگەن باقىلاۋ ەلەمەنتى بولۋى ءتيىس.
باقىتجان جۇماعۇلوۆتىڭ حابارلاعانداي, وقت پايدالانۋ – ەلدىڭ جاسىل دامۋىنىڭ, ەكولوگيا مۇددەسىندە ساي تەپە-تەڭدىكتى قامتاماسىز ەتۋدىڭ ۇزدىك الەمدىك تاجىريبەسى. بۇل تەحنولوگيا ەىدۇ-نىڭ 39 ەلىندە جانە بەلارۋس, قىتاي جانە رەسەي ەلدەرىندە قولدانىلادى. ونىڭ ماقساتى – ەكولوگيالىق تازا جانە بيزنەس ءۇشىن قولجەتىمدى تەحنولوگيالاردى قايتا وڭدەۋ. ياعني قورشاعان ورتاعا تەرىس اسەردى بارىنشا ازايتۋ.
"قازىر حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى عىلىمي-تەحنيكالىق كەڭەس مۇشەلەرىمەن بىرلەسىپ, ەنەرگەتيكا, تاۋ-كەن مەتاللۋرگيا, حيميا سالالارىنىڭ 50 ءىرى كاسىپورنى ءۇشىن ءتۇسىندىرۋ, كەشەندى تەحنولوگيالىق باعالاۋ جۇمىستارىن جۇرگىزۋدە. ەلىمىزدىڭ ەنەرگەتيكالىق سەكتورى – لاستايتىن زاتتار شىعارۋدىڭ ەڭ ءىرى كوزى ەكەنىن ەسكەرۋىمىز كەرەك. ونىڭ ۇلەسىندە قازاقستان بويىنشا شىعارىندىلاردىڭ شامامەن 40% بار. وسى فاكتورلاردىڭ بارلىعى ءبىزدى ەنەرگەتيكا سالاسىنان باستاپ ەڭ وزىق قولجەتىمدى تەحنولوگيالارعا كوشۋگە باعىتتاپ وتىر. بىرىنشىدەن, وقت-عا كوشۋدى 14 ەلەكتر ستانتسياسىنان باستايمىز, ولارعا زياندى زاتتاردىڭ جالپى ەل شىعارىندىلارىنىڭ شامامەن 30% تيەسىلى", دەدى دەپۋتات.
ب.جۇماعۇلوۆ ەڭ وزىق قولجەتىمدى تەحنولوگيالار قاعيداتىنا كوشۋدىڭ جان-جاقتى تالداۋ مەن زەرتتەۋدى تالاپ ەتەتىن, ۇزاق ەڭبەكتى قاجەت ەتەتىن پروتسەسس ەكەنىن ناقتىلاپ ءوتتى.
"جاڭا وزگەرىستەر ۇدايى زەرتتەۋ مەن تالقىلاۋدى قاجەت ەتەدى. سوندىقتان بۇگىنگى الاڭدا ەلىمىزدىڭ جاسىل دامۋى ءۇشىن ەڭ وزىق قولجەتىمدى تەحنولوگيالار قاعيداتىنا كوشۋدىڭ ءتيىمدى, قاجەتتى شەشىمدەرىن تالقىلاۋ ءۇشىن, ازىرلەۋ ءۇشىن جينالدىق. بۇگىنگى كونفەرەنتسيا وسى سالادا تاجىريبە مەن ءبىلىم الماسۋ ءۇشىن كاسىبي جانە سىندارلى ديالوگ قۇرۋعا مۇمكىندىك بەرەتىنىنە سەنىمدىمىن", دەدى باقىتجان جۇماعۇلوۆ.
