استانادا دارىگەرلەر ۋلانىپ, اۋرۋحاناعا تۇسكەن قىزعا «اقىلىنان اداسقان» دەگەن دياگنوز قويعان. سونىڭ سالدارىنان اگروتەحنيكالىق ۋنيۆەرسيتەتتىڭ 3-كۋرس ستۋدەنتى جانار نۇرعازينوۆا قايتىس بولىپ كەتكەن.
استانادا دارىگەرلەر ۋلانىپ, اۋرۋحاناعا تۇسكەن قىزعا «اقىلىنان اداسقان» دەگەن دياگنوز قويعان. سونىڭ سالدارىنان اگروتەحنيكالىق ۋنيۆەرسيتەتتىڭ 3-كۋرس ستۋدەنتى جانار نۇرعازينوۆا قايتىس بولىپ كەتكەن.
اۋرۋحاناعا ۋلانۋ سەبەبىمەن كەلگەن 20 جاسار بويجەتكەن وسىلايشا ءوزىن ءبىرىنشى قاراعان ءدارىگەرلەردىڭ قاتەلىگىنەن پسيحياتريالىق ديسپانسەرگە اۋىستىرىلعان. وسى جەردە مۇلدەم باسقا ەم العان ونىڭ جاعدايى كۇرت ناشارلاپ, اقىرى ءجانتاسىلىم ەتكەن.
شىنتۋايتىندا, 29 قىركۇيەك كۇنى استان ۇشىنعان جانار ەكى كۇن ءنار تاتپاي جاتادى. جاعدايى ءتىپتى ناشارلاپ بارا جاتقان سوڭ, قالالىق جۇقپالى اۋرۋلار اۋرۋحاناسىنا بارادى. بۇل كەزدە بويىنان ءال كەتىپ, ابدەن قالجىراپ قالعان قىزعا قالاي بولسا سولاي قاراعان اق حالاتتىلار ونى دۇرىستاپ تەكسەرمەگەن. سونىڭ سالدارىنان ودان ۋلانۋ بەلگىسىن كورە الماعان. اقىرىندا ەسكۋلاپتار ونسىز دا ارەڭ سويلەپ وتىرعان جاناردىڭ بىردە-ءبىر سوزىنە قۇلاق اسپاي, ونىڭ قۇربىسىمەن سوزگە كەلىپ قالعانىن العا تارتىپ, «اقىلىنان اداسقان» دەگەن ۇكىم شىعارا سالعان. مۇنداي دا بولادى ەكەن!
تاپ وسىنداي سالقىن قابىلداۋدى ج.نۇرعازينوۆا كەيىن پسيحياتريالىق ديسپانسەردەن دە كوردى. ونداعى مەديكتەر قىزدىڭ ءحالىن «قالىپتى» دەپ باعالاپ, سول كۇيى قاراۋسىز قالدىرعان. وسىلاي ءىشى ءىرىپ كەتكەن ناۋقاس اقىرى تۇسىنىكسىز جاعدايدا كوز جۇمادى. سوڭىنان ساراپتاما ونىڭ استان ۋلانىپ, ينفەكتسيانىڭ اعزاعا جايىلىپ كەتۋىنەن مي بولىگىنىڭ ىسىنگەنىن انىقتادى.
قازىر استانا قالالىق پروكۋراتۋراسى اتالمىش فاكتىگە بايلانىستى قىلمىستىق ءىس قوزعادى. بۇل دەرەك بويىنشا قىزعا دۇرىس قاراماعان دارىگەرلەردىڭ ۇستىنەن تەرگەۋ جۇرگىزىلە باستالدى.
«سىرقات ۋاقتىلى تەكسەرىلىپ, دياگنوستيكا جۇرگىزىلمەگەن. ساراپتاما شىقپاي تۇرىپ, قۇقىق قورعاۋ ورگاندارى قىلمىستىق ءىس قوزعاۋدان باس تارتقان. الايدا, ساراپتاما ناتيجەسى ءدارىگەرلەردىڭ سالعىرتتىعىن كورسەتتى. سوندىقتان, استانا قالالىق پروكۋراتۋراسى اتالمىش جايتقا قاتىستى قىلمىستىق ءىس قوزعادى», دەيدى استانا قالاسى پروكۋراتۋراسىنىڭ باسقارما باسشىسى دانيار ەرتەكوۆ.
ايتا كەتەيىك, اگروتەحنيكالىق ۋنيۆەرسيتەتتىڭ 3-كۋرس ستۋدەنتى جانار نۇرعازينوۆا بيىلعى 2 قازان كۇنى جۇقپالى اۋرۋلار اۋرۋحاناسىنا ءوز اياعىمەن بارعان. ال ءبىر كۇننەن كەيىن ونىڭ مۇردەسى پسيحياتريالىق ديسپانسەردەن شىققان.
مۇرات ايتقوجا.
