بيىل ۇستاز "ۇزدىك پەداگوگ – 2020" كونكۋرسىنىڭ رەسپۋبليكالىق كەزەڭىندە جەڭىسكە جەتكەن جانە 2,7 ميلليون تەڭگە اقشالاي سىيلىقپەن ماراپاتتالعان. الايدا ول اتىراۋ وبلىسىنىڭ جەرگىلىكتى اتقارۋشى ورگاندارى وبلىستىق كەزەڭدەگى جەڭىسى ءۇشىن تاعايىنداعان 300 اەك كولەمىندەگى سىياقىسىن بەرمەدى دەپ شاعىمدانىپ وتىر. ال ونىڭ ارىپتەستەرى مۇنداي سىياقىنى الىپ قويعان.
"مەن "ۇزدىك پەداگوگ – 2020" كونكۋرسىنىڭ وبلىستىق كەزەڭىندە جەڭىسكە جەتكەنىمدە اتىراۋدىڭ ءبىر مەكتەبىندە جۇمىس ىستەيتىن ەدىم. 2 قازاندا مەنى اتىراۋ وبلىسىنىڭ وكىلى رەتىندە ماراپاتتادى, الايدا جەرگىلىكتى اتقارۋشى بيلىك بەرىلۋى كەرەك سومانى بەرگەن جوق. ال قالعان ارىپتەستەرىم 5 قازاندا بۇل سىيلىقتى الىپ قويدى", دەپ جازادى ا.قازبەكوۆ.
"جەرگىلىكتى اتقارۋشى ورگاندار مۇعالىمدەرگە 300 ايلىق ەسەپتەن كەم ەمەس كولەمدە اقشالاي سىياقى بەرىپ, قوسىمشا ىنتالاندىرۋعا قۇقىلى. بىراق ونى بەرۋ-بەرمەۋدى ءوز بەتىنشە شەشەدى. ونىڭ ۇستىنە ول 1 قىركۇيەكتە باسقا قالاعا كوشىپ كەتتى. ياعني 5 قازاندا ءبىز باسقا مۇعالىمدەردى ماراپاتتاعاندا ول ءبىزدىڭ مەكتەپتە جۇمىس ىستەگەن جوق", دەيدى ايماقتىق ءبىلىم باسقارماسىنىڭ وكىلى.
اتالعان شاعىمدى سىبايلاس جەمقورلىققا قارسى ءىس-قيمىل اگەنتتىگىنىڭ باسشىلىعى باقىلاۋعا الدى.
"بۇل شاعىم اتىراۋ وبلىسىنىڭ ءبىلىم باسقارماسىنا قاراۋ جانە شارا قابىلداۋ ءۇشىن جولداندى", دەپ جاۋاپ بەردى ۆەدومستۆوداعىلار.
