استانانىڭ ماڭىنداعى №36 دەسانتتىق-شابۋىلداۋشى بريگاداسىنىڭ بازاسىندا قازاقستان قارۋلى كۇشتەرى قۇرلىق اسكەرلەرىنىڭ باس قولباسشىسى, گەنەرال-لەيتەنانت مۇرات مايكەەۆتىڭ قاتىسۋىمەن ۇيىمداستىرۋ-ادىستەمەلىك جيىنى بولىپ ءوتتى.
استانانىڭ ماڭىنداعى №36 دەسانتتىق-شابۋىلداۋشى بريگاداسىنىڭ بازاسىندا قازاقستان قارۋلى كۇشتەرى قۇرلىق اسكەرلەرىنىڭ باس قولباسشىسى, گەنەرال-لەيتەنانت مۇرات مايكەەۆتىڭ قاتىسۋىمەن ۇيىمداستىرۋ-ادىستەمەلىك جيىنى بولىپ ءوتتى.
اتالعان جيىندا قۇرلىق اسكەرلەرىنىڭ بارلىق اسكەري ءبولىمدەرى مەن قۇرامالارىنىڭ ءبىرىنشى باسشىلارى تەوريا جانە فيزيكالىق دايىندىقتارى بويىنشا سىناق تاپسىردى. سونداي-اق, ايماقتىق قولباسشىلىقتار باسقارۋ ورگاندارىنىڭ لاۋازىمدى تۇلعالارىنىڭ قاتىسۋىمەن كوماندالىق-شتابتىق ويىن جاتتىعۋلارى وتكىزىلىپ, ولاردىڭ دۇرىس شەشىم قابىلداي الاتىن قابىلەتتەرى جان-جاقتى تەكسەرىلدى. جەدەل قولباسشىلىق ۇجىمىنىڭ ءاربىر قابىلداعان شەشىمدەرى كارتاعا ءتۇسىپ جاتسا, سىمسىز جەلى ولاردى ورتالىقپەن بايلانىستىرىپ تۇردى.
جالپى, اسكەري وقۋ-جاتتىعۋلارى بويىنشا اۋەۇتقىر كۇشتەرى جاقسى ناتيجە كورسەتتى. م.مايكەەۆتىڭ ايتۋىنشا, كەلەسى جىلدان باستاپ باس شتاب قولباسشىسىنىڭ بۇيرىعىنا وراي بارلىق كۇش روتالار مەن ۆزۆودتاردىڭ دايارلىعىنا جۇمىلدىرىلىپ, ولاردىڭ دەربەس ءارى ۇيىمداسقان ارەكەتىن قۇرا بىلۋىنە باعىتتالاتىن بولادى. سونداي-اق, كەلەسى جىلى اۋەۇتقىر كۇشتەرىنىڭ وقۋ-جاتتىعۋى ناتيجەسىندە وزەندى كەشىپ ءوتۋ ارقىلى 400 شاقىرىم جەردەگى سوعىس ايماعىنا دەر كەزىندە جەتۋ ۋاقىتى ەڭسەرىلەتىن بولادى.
سونىمەن قاتار, ۇيىمداستىرۋ-ادىستەمەلىك جيىنى بارىسىندا قۇرلىق اسكەرلەرى قولباسشىسىنىڭ اسكەري دايىندىق بويىنشا ورىنباسارى, گەنەرال-لەيتەنانت ءامىر حاليكوۆتىڭ جەتەكشىلىگىمەن اقتاۋ تەڭىز جاياۋ اسكەرى بازاسىندا نىسانانى مۇلتىكسىز اتۋ جاتتىعۋلارى وتكىزىلدى. جىلجىمالى نەمەسە تەربەلمەلى نىسانالاردى دالدەپ اتۋ وڭايعا تۇسپەدى. ايتسە دە بۇل جاتتىعۋلاردى ورىنداۋدا شەبەرلىگىمەن تانىلعاندار دا جەتكىلىكتى بولدى. جالپى, مۇندا پوليگوندا وتكىزىلۋى ءتيىس اتۋ جاتتىعۋلارى دا ورىندالا بەرەدى. نىسانا مەن كوزدەۋشىنىڭ اراسى 100 مەتر بولعانىمەن, نىسانانى بارىنشا كىشىرەيتۋ ارقىلى 300 نەمەسە 500 مەترلىك اراقاشىقتىققا اتۋ جاتتىعۋلارى ورىندالادى. مۇنداي اتۋ ورىندارى اشىق اسپان استىندا جانە جابىق جاعدايدا دا ۇيىمداستىرىلادى. مىسالى, جابىق تيردە كۇندىزگى ۋاقىتتا دا تۇنگى نىساندى اتۋعا مۇمكىندىك جاسالعان. ينفراقىزىل ساۋلە اتاتىن نىسانانى كوز الدىڭا انىق كەلتىرە قويادى. جانە دە اتىلعان وقتاردىڭ قانشالىقتى نىساناعا ءدوپ ءتيىپ جاتقانىن مونيتوردان باقىلاۋعا مۇمكىندىك جاسالادى. قازىر مۇنداي تيرلەر اسكەري بولىمدەردىڭ كوبىندە ەنگىزىلە باستاعان.
قۇرلىق اسكەرلەرى باس قولباسشىسىنىڭ تاربيە جونىندەگى ورىنباسارى پولكوۆنيك جۇمابەك حاسەنوۆتىڭ سوزىنە قاراعاندا, وسىنداي اتۋ ورىندارىن جەتىلدىرۋ ارقىلى ۋاقىت پەن وق-دارىلەردى ۇنەمدەۋ 30-40 پايىزعا جەتكەن. تيردە سەرجانت سارسەنالى باتىراشەۆتى سوزگە تارتقان كەزىمىزدە, ول دالاداعى وق اتۋ ورنىندا 40 ادام بۇعان ەكى ساعات جىبەرسە, جابىق تيردە وسىنشاما ادامعا 20 مينۋتتىڭ ءوزى جەتكىلىكتى ەكەندىگىن العا تارتتى. وسىلايشا, قۇرلىق اسكەرلەرىندەگى وقۋ-جاتتىعۋلار جىلدان-جىلعا جەتىلدىرىلىپ كەلە جاتقانىن ەرەكشە ايتا كەتۋ كەرەك.
اسقار تۇراپباي ۇلى,
«ەگەمەن قازاقستان».
