مارات تولەگەن ۇلى جاس كەزىندە اتاقتى مارافونشى بولامىن دەپ ويلاماعان شىعار. بىراق ۋاقىت وتە كەلە قاتاڭ تابيعات اياسىندا شىنىعىپ, شىڭدالعان جاس قيىندىقپەن بەتپە-بەت كەلۋدى اڭساپ تۇراتىن كۇيگە جەتتى. ونىڭ سىرتىندا كەڭ دالانىڭ تىلسىم تىرشىلىگىنە باۋىر باسقان بوزبالا كورگەن-بىلگەنىن ساناسىنا ءتۇيىپ, ەپتەپ ونىڭ سۋرەت-سۇلباسىن قاعازعا ءتۇسىرۋدى ادەتكە اينالدىردى.
وسى ادەتى اقىرىندا ماراتتى سۋرەتشى بولۋعا يتەرمەلەدى. ءسويتىپ, ول بەينەلەۋ ونەرى ماماندىعىنا وقىدى. وقي ءجۇرىپ, سپورتتان قول ۇزبەدى. العاش رەت 1990 جىلى رەسەيدىڭ بارناۋل قالاسىندا ۇيىمداستىرىلعان 85 شاقىرىمدىق مارافونعا قاتىسىپ, اتالعان قاشىقتىقتى 6 ساعات 43 مينۋت 23 سەكۋندتا جۇگىرىپ ءوتىپ, ۇزدىكتەر ساپىنان تابىلدى.
مارافونشى باۋىرىمىز – ازيا, افريكا, امەريكا, اۋستراليا قۇرلىقتارىندا ورنالاسقان وتە ۇلكەن قۇمدى, ءشولدى دالالاردى جالعىز ءوزى باسىپ وتكەن كۇللى الەمدەگى العاشقى ادام. سونىمەن قاتار گيننەستىڭ رەكوردتار كىتابىنا ەسىمى جەتى دۇركىن تىركەلگەن تەڭدەسسىز قازاق. اتاپ ايتقاندا:
- 1990 جىلدىڭ 6 قازانى مەن 1991 جىلدىڭ 5 قازانى ارالىعىندا, ياعني ءبىر جىلدا 226 رەت كلاسسيكالىق مارافونعا (قاشىقتىعى 42,2 شاقىرىم) قاتىسقان. ناقتىلاي تۇسسەك, 365 كۇننىڭ 226 كۇنىندە كۇن سايىن 42 شاقىرىم جۇگىرەتىن بولعان.
- 1991 جىلدىڭ 2 ناۋرىزىنان 24 ناۋرىزىنا دەيىن, ياعني 23 كۇن توقتاۋسىز ۇزاق قاشىقتىققا (مارافون) جۇگىرگەن.
- 1991 جىلدىڭ 1-15 تامىز ارالىعىندا 30 كلاسسيكالىق مارافونعا ء(بىر كۇندە ەكى مارافون) قاتىسىپ, ورتا ەسەپپەن ءار مارافونعا 4 ساعات 00 مينۋت 54 سەكۋند ۋاقىت جۇمساعان.
- 1991 جىلدىڭ 2-22 ءساۋىرى ارالىعىندا ازيا قۇرلىعىنداعى اتاقتى قاراقۇم ءشولىن (ۇزىندىعى – 1200 شاقىرىم) 20 كۇندە جۇگىرىپ وتكەن.
- 1993 جىلدىڭ 25 اقپانى مەن 23 ناۋرىزى ارالىعىندا افريكا قۇرلىعىنداعى اتاقتى ساحارا ءشولىن (ۇزىندىعى – 1700 شاقىرىم) 24 كۇندە جۇگىرىپ وتكەن.
- 1993 جىلعى 24 قاراشا مەن 15 جەلتوقسان ارالىعىندا اۋستراليا قۇرلىعىنداعى ۇلكەن ۆيكتوريا ءشولىن (1600 شاقىرىم) 22 كۇندە جۇگىرىپ وتكەن.
- 1994 جىلدىڭ 01-19 ءساۋىرى ارالىعىندا اقش-تىڭ نەۆادا شتاتىنداعى ءتىرى جان ءومىر سۇرمەيتىن موحاۆي ءشولىن (1218 شاقىرىم) 17 كۇندە جۇگىرىپ وتكەن.
سونداي-اق اتاقتى مارافونشى ەۋروپانىڭ بيىك شىڭى – ەلبرۋسقا (5642 مەتر) مارافوندىق ادىسپەن جەتى كۇندە جۇگىرىپ شىققان. 1993-1994 جىلدارى ەلىمىزدىڭ تاڭداۋلى 10 سپورتشىسىنىڭ قاتارىن تولىقتىردى. مارات جىلانباەۆ قازىر نۇر-سۇلتان قالاسىندا تۇرادى. ۇزاق قاشىقتىققا جۇگىرەتىن شاكىرتتەر تاربيلەۋمەن اينالىسادى.
