قىزىلجار وڭىرىندە دە جەرگىلىكتى ماڭىزى بار جولداردىڭ ساپاسى سىن كوتەرمەيدى. ولاردىڭ 43 پايىزىنىڭ توزىعى جەتكەن. سونىڭ سالدارىنان قاۋىپسىزدىكتى قامتاماسىز ەتۋ شارالارى قاتاڭ ساقتالا بەرمەيدى. جىل باسىنان بەرى 300-دەن استام جول-كولىك وقيعاسى ورىن الىپ, 42 ادام كوز جۇمعان.
قىزىلجار وڭىرىندە دە جەرگىلىكتى ماڭىزى بار جولداردىڭ ساپاسى سىن كوتەرمەيدى. ولاردىڭ 43 پايىزىنىڭ توزىعى جەتكەن. سونىڭ سالدارىنان قاۋىپسىزدىكتى قامتاماسىز ەتۋ شارالارى قاتاڭ ساقتالا بەرمەيدى. جىل باسىنان بەرى 300-دەن استام جول-كولىك وقيعاسى ورىن الىپ, 42 ادام كوز جۇمعان.
كولىك جانە كوممۋنيكاتسيا ءمينيسترى اسقار جۇماعاليەۆ پەن وبلىس اكىمى سامات ەسكەندىروۆتىڭ قاتىسۋىمەن وتكەن كەڭەيتىلگەن كەڭەستە وبلىس پەن اۋداندار قاراۋىنا جاتاتىن تاس جولداردى دامىتۋ باعدارلاماسىنىڭ ورىندالۋ بارىسى مەن الداعى مىندەتتەر جان-جاقتى تالقىلاندى. وبلىس اۆتوموبيل جولدارىنىڭ ۇزىندىعى بويىنشا ەلىمىزدە ءۇشىنشى ورىن السا, 4 مىڭداي شاقىرىمى قاناعاتتانعىسىز كۇيدە. بۇل ماقسات ءۇشىن ايماقتىق قازىنادان كەلەسى جىلى 4,5 ميلليارد تەڭگە قاراستىرىلعان. بۇل كورسەتكىش 2012 جىلعا قاراعاندا 1,8 ەسەگە كوپ. مينيستر ءوز سوزىندە ساپا ماسەلەسىنە, جاڭا تەحنولوگيالاردى كەڭىنەن پايدالانۋعا ۇلكەن ەكپىن ءتۇسىردى. بيىل 3 زاماناۋي جىلجىمالى زەرتحانا ساتىپ الىنعانىن, كەلەسى جىلى تاعى 8-ءى جەتكىزىلەتىنىن, ودان ءارى بارلىق وڭىرلەر قامتىلاتىنىن جەتكىزدى. مۇنىڭ ءوزى جۇمىستىڭ جوسپارلى اتقارىلۋىنا مۇمكىندىك بەرەدى. تەندەردى ۇتىپ الا تۇرا, ءوز ىستەرىنە سالدىر-سالاق قارايتىن قۇرىلىس كومپانيالارىنا قاتاڭ جازا قولدانۋدى, ءتىپتى, نەگىزگى جۇمىستان شەتتەتۋگە دەيىن شارا قولدانۋدى تاپسىردى.
سامات ساپاربەك ۇلى ۇكىمەتتىڭ كەڭەيتىلگەن وتىرىسىندا ەلباسى جەرگىلىكتى ماڭىزى بار جولداردى دامىتۋداعى ولقىلىقتاردى اتاپ كورسەتكەنىن ايتا كەلىپ, بيۋدجەتتەن ءبولىنەتىن قاراجاتتىڭ كوبەيگەنىن, ساپاعا باستى نازار اۋدارىلعانىن, استانا – پەتروپاۆل جانە كەللەروۆكا – تايىنشا – چكالوۆ باعىتتارىندا ەكى جوبانىڭ ويداعىداي جۇزەگە اسىپ جاتقانىن اتاپ كورسەتتى.
جيىندا بىرقاتار ۆەدومستۆو جەتەكشىلەرىنىڭ ەسەبى تىڭدالدى. وبلىستىق ىشكى ىستەر دەپارتامەنتىنىڭ باستىعى اقان قاجكەنوۆ ءوڭىر جولدارىنداعى قاۋىپسىزدىكتى قامتاماسىز ەتۋ بويىنشا اتقارىپ جاتقان شارالارمەن تانىستىردى. جول اپاتى 8 پايىزعا, ادام شىعىنى 27 پايىزعا كەمىگەنىنە قاراماستان جاعداي كۇردەلى كۇيىندە قالىپ وتىر. جول-كولىك اپاتتارىنىڭ 80 پايىزى ماس جۇرگىزۋشىلەردىڭ كىناسىنەن جاسالادى. «قازاۆتوجول» ۇك» اق باسقارما توراعاسى ەرىك سۇلتانوۆتىڭ ايتۋىنشا, وڭىرىمىزدەگى 375 شاقىرىم جولدىڭ ساپاسى رەسپۋبليكالىق كورسەتكىشتەن دە تومەن. ۇستىمىزدەگى جىلى جەرگىلىكتى جەردەگى رەسپۋبليكالىق ماڭىزى بار جول جەلىلەرىن دامىتۋعا 3 ميلليارد تەڭگەدەن استام قارجى تارتىلماق. پەتروپاۆل – كوكشەتاۋ قالالارى باعىتىنداعى جولداردى جاڭعىرتۋ جۇمىستارىن 2015 جىلعا دەيىن اياقتاۋ كوزدەلگەن. اۆتوموبيل جولدارى كوميتەتى توراعاسىنىڭ ورىنباسارى امانگەلدى بەكوۆ جەرگىلىكتى جەلىلەردى نىعايتۋعا ۇستىمىزدەگى جىلى 1,5 ميلليارد تەڭگە جۇمسالاتىنىن, الداعى جىلى 1 ميلليارد تەڭگەگە مولاياتىنىن كولدەنەڭ تارتتى.
ايماق باسشىسى جىل وتكەن سايىن جەرگىلىكتى ماقساتتى قارجى مولشەرىنىڭ ۇلعايا تۇسكەنىن, ونىڭ ۇستىنە استىقتى ولكەنىڭ ماڭىزدىلىعىن ەسكەرە وتىرىپ, رەسپۋبليكالىق ترانسفەرتتىڭ دە مولشەرى كوبەيسە دەگەن تىلەگىن جەتكىزدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
